Лукас 1 - ФӀыцӀагъэ ЛъапӀэ

ПэщӀэдзэ Ӏыхьэ

¹ Ди деж къыщыхъуа Ӏуэхугъуэхэм теухуа хъыбар кърагъэжьауэ куэдым ятхыж.

² А Ӏуэхугъуэхэм къызэрыщӀадзэрэ ахэр зи нэгу щӀэкӀауэ Тхьэм и Псалъэр цӀыхум яхэзылъхьэу щытахэм къыджаӀэжаращ а хъыбархэм лъабжьэ хуэхъуар.

³ Арати, сэри а Ӏуэхугъуэхэм я щӀэдзапӀэ дыдэм щезгъажьэри, къанэ щымыӀэу псори щызэхэзгъэкӀым, зи пщӀэр лъагэ Теофил, хъыбарыр зэкӀэлъыкӀуэу ныпхуэстхыну мурад сщӀащ,

⁴ узыхуаущия Ӏуэхум и пэжыпӀэр пщӀэн щхьэкӀэ.

Яхья бегъымбарыр къызэралъхунур мелыӀычымкъызэрыжиӀар

⁵ Ехьудейм и пащтыхь Хьирэд и тетыгъуэ зэманым Зэчрей и цӀэу дин гъуазэ гуэр псэуащ. Ар Абий къытехъукӀыжа дин гъуазэ гупым яхэтащ. Абы и щхьэгъусэ Елисавэ Хьэрун къытехъукӀыжахэм ящыщт.

⁶ Зиусхьэну Тхьэм и пащхьэм цӀыху щыпкъэу итт тӀури, Абы и хабзэхэмрэ и унафэхэмрэ ядэбгъуэн щымыӀэу ягъэзащӀэу.

⁷ Ауэ ахэр быныншэт, Елисавэ фызмылъхуэти, абы къищынэмыщӀауэ тӀуми я ныбжьыр фӀыуэ хэкӀуэтат.

⁸ Зэчрей зыхэт дин гъуазэ гупым я чэзур къэсауэ, Тхьэм и Унэм дин Ӏуэху щилэжьырт зэгуэрым.

⁹ Дин гъуазэхэм я хабзэм тету пхъэидзэ щащӀым, Зиусхьэным и Унэм щӀыхьэу, мэ дахэ къызыхих сагъыз Тхьэм папщӀэ игъэсын хуейуэ къылъысащ Зэчрей.

¹⁰ Тхьэм и Унэр зыдэт пщӀантӀэм цӀыхубэр тхьэ щелъэӀурт Зэчрей сагъызыр щигъэс сыхьэтым.

¹¹ Сагъыз гъэсыпӀэм ижьырабгъумкӀэ Зиусхьэным и мелыӀыч Зэчрей къыщыхуэхутащ.

¹² Ар щилъагъум, къащтэри, Зэчрей хуабжьу шынащ.

¹³ Ауэ мелыӀычым къыжриӀащ: – Умышынэ, Зэчрей. Уи лъэӀур Тхьэм зэхихащ. Уи щхьэгъусэ Елисавэ къуэ къыпхуилъхунущ, уэ абы фӀэпщынур Яхьящ.

¹⁴ ГуфӀэгъуэрэ насыпрэ къыпхудэкӀуэнущ абы икӀи ар дунейм къызэрытехьам щхьэкӀэ цӀыху куэд гуфӀэнущ.

¹⁵ Сыту жыпӀэмэ Зиусхьэным и пащхьэм цӀыху щэджащэу итынущ ар, сани нэгъуэщӀ фади ефэнукъым. И анэм и ныбэм щилъыну зэманым щыщӀэдзауэ, Тхьэм и Псэр и гум хыхьауэ щытынущ ар.

¹⁶ Я Тхьэу Зиусхьэным и гъуэгум израил лъэпкъым щыщу куэд тришэжынущ.

¹⁷ Тхьэм и Псэр Иляс бегъымбарым и гум илъу зэрыщытам хуэдэу, абыи и гум илъу икӀи Иляс иӀа лъэкӀыныгъэр иӀэу Зиусхьэным ипэ къихуэу цӀыхухэм къахыхьэнущ ар. Адэхэмрэ бынхэмрэ зэфӀ ищӀыжынущ, Тхьэм емыдаӀуэхэр цӀыху щыпкъэхэм я гъуэгум тришэнущ, израил лъэпкъыр Зиусхьэным и къэкӀуэгъуэм хуигъэхьэзырынущ.

¹⁸ – Ар зэрыпэжыр дауэ сэ къызэрысщӀэнур? – жиӀэри еупщӀащ Зэчрей мелыӀычым. – Сэ лӀыжь сыхъуащ, си щхьэгъусэми и ныбжьыр хэкӀуэтащ.

¹⁹ – Тхьэм и пащхьэ ит ДжэбрэӀилыр сэращ, а хъыбарыфӀыр къыпхузигъэхьащ Тхьэм, – жиӀащ мелыӀычым.

²⁰ – Аращи, и чэзум къэхъун хуейуэ бжесӀар уи фӀэщ зэрымыхъуам щхьэкӀэ уи бзэр иубыдынурэ умыпсэлъэфу ущытынущ, а Ӏуэхур зэщӀэху.

²¹ Зэчрей Тхьэм и Унэм зэрызыщиӀэжьэр ягъэщӀагъуэу, цӀыхубэр пщӀантӀэм къыщыпэплъэрт.

²² Ар Тхьэм и Унэм къыщӀэкӀыжащ, ауэ цӀыхухэм епсэлъэфакъым. ИтӀанэ къагурыӀуащ Тхьэм и Унэм абы телъыджэ гуэр зэрыщилъэгъуар. Зэчрей псэлъэжыфыртэкъым, ӀэпэтэрмэшкӀэ цӀыхухэм зыгуэр яригъэлъагъу фӀэкӀа.

²³ Тхьэм и Унэм щылэжьэн щыхуей махуэхэр щиухым, Зэчрей и унэ кӀуэжащ.

²⁴ Абы и ужькӀэ куэд дэмыкӀыу, Зэчрей и фыз Елисавэ лъэщыджэ хъури, цӀыхухэм мазитхукӀэ защибзыщӀащ.

²⁵ Абы мыпхуэдэу жиӀэрт: «Ар къысхуэзыщӀар Зиусхьэнырщ, и нэфӀ къысщыхуэри, си напэр щӀытекӀ емыкӀур сщхьэщихащ иджы».

Мэрям мелыӀычыр къызэрыхуэкӀуар

^26-27 Елисавэ мазих пӀалъэм иту, Гэлилей хэкум хыхьэ Нэзэрэт къуажэм дэс пщащэм, МэрямкӀэ зэджэм, деж Тхьэм ДжэбрэӀил мелыӀычыр къигъэкӀуащ. Исуф и цӀэу Даут бегъымбарым къытехъукӀыжа лӀы гуэррэ Мэрямрэ зэрышэн хуейуэ зэгурыӀуауэ щытт.

²⁸ Абы деж щӀыхьэри, мелыӀычым жиӀащ: – Сэлам узох, Тхьэм и нэфӀыр зыщыхуа. Зиусхьэным и нэӀэ къыптет зэпытщ.

²⁹ МелыӀычым къыжриӀа псалъэм бзылъхугъэр хуабжьу игъэпӀейтеящ икӀи абы и сэламым игъэгупсысащ.

³⁰ – Умышынэ, Мэрям, – жиӀащ абы, – Тхьэм и нэфӀ къыпщыхуащ.

³¹ Уэ лъэщыджэ ухъунурэ къуэ бгъуэтынущ, уэ Абы фӀэпщынур Хьисэщ.

³² Ар цӀыху щэджащэ хъунущ, Я Нэхъ Лъагэм и КъуэкӀэ еджэнущ Абы. И адэжь Даут и тахътэр Зиусхьэну Тхьэм къритынущ Абы.

³³ Екъуб къытехъукӀа лъэпкъым я тепщэу игъащӀэкӀэ щытынущ, и тепщэныгъэми кӀэ иӀэнукъым.

³⁴ – Сыхъыджэбздэсу ар дауэ къызэрыхъунур? – еупщӀащ Мэрям мелыӀычым.

³⁵ – Тхьэм и Псэр къыпхуехынурэ Я Нэхъ Лъагэм и къарур къыпщхьэщыувэнущ. Абы къыхэкӀкӀэ, къэплъхуну сабийр Тхьэм ейуэ щытынущ икӀи Тхьэм и КъуэкӀэ еджэнущ Абы.

³⁶ Уи благъэ Елисавэ, сабий иӀэнукъым жыхуаӀэу щытари, и жьыщхьэ лъэщыджэ хъуауэ, мазэ еханэм итщ, щӀалэ цӀыкӀу поплъэ;

³⁷ Тхьэм лъэмыкӀын зыри щыӀэкъым.

³⁸ – Зиусхьэным и ӀэмыщӀэм силъщ, – жиӀащ Мэрям. – Уэ зэрыжыпӀам тету ирехъу псори. Мэрям къигъанэри, мелыӀычыр щӀэкӀыжащ.

Мэрям Елисавэ деж зэрыкӀуар

³⁹ Абы и ужькӀэ куэд дэмыкӀыу, Мэрям зигъэхьэзырри, Ехьудей хэкум и бгылъэ щӀыпӀэм ит къуажэм пӀащӀэу кӀуащ.

⁴⁰ Щынэсым, Зэчрей и унэм щӀыхьэри, абы Елисавэ сэлам ирихащ.

⁴¹ Елисавэ Мэрям и сэламыр щызэхихым, абы и ныбэм илъ сабийм зигъэхъеящ икӀи Тхьэм и Псэр Елисавэ и гум хыхьащ.

⁴² Макъ лъагэкӀэ къэпсалъэри, Елисавэ жиӀащ: – ЦӀыхубз псоми я нэхъ лейуэ Тхьэр фӀыгъуэкӀэ къыпхуэупсащ! Къэплъхун хуей сабийм Тхьэм и нэфӀыр къыщыхуащ!

⁴³ Си Зиусхьэным и анэр си деж къэкӀуэну схуэфащэ сэ?

⁴⁴ Уи сэламыр щызэхэсхым, си ныбэм илъ сабийм гуфӀэгъуэшхуэр иӀэу зигъэхъеящ.

⁴⁵ Зиусхьэным къыжиӀар зэрызэщӀэнур уи фӀэщ хъуащи, гъуэгу махуэ утеуващ.

⁴⁶ Абы и ужькӀэ Мэрям жиӀащ: – Си гущӀэм щӀыхьышхуэ къыщыхуоуш Зиусхьэным!

⁴⁷ Си Тхьэу си КъегъэлакӀуэм щогуфӀыкӀыр си псэр,

⁴⁸ пщӀэ зимыӀэ сэ, и унэӀутым, гу къыслъитащи. Нобэ щыщӀэдзауэ къэхъуну щӀэблэ псоми сынасыпыфӀэу жаӀэнущ,

⁴⁹ Тхьэ Лъэщым телъыджэлажьэ къысхуищӀащи. ПхуэмыӀуэтэну лъапӀэщ Абы и цӀэр.

⁵⁰ Зы щӀэблэм адрей щӀэблэр кӀэлъыкӀуэу, Тхьэр псоми яхуэгумащӀэщ Ар зылъытэхэм.

⁵¹ Ӏуэху телъыджэ куэд и ӀэкӀэ зэфӀигъэкӀащ, гупсысэ пагэ зигу илъхэм яхурикъуащ.

⁵² Тепщэхэр я тахътэм къридзыхри, пщӀэ зыхуамыщӀ цӀыхухэм я пщӀэр иӀэтащ.

⁵³ ХуэмыщӀауэ псэухэм фӀыгъуэкӀэ яхуэупсащ, къулейхэр ӀэнэщӀу иутӀыпщыжащ.

^54-55 Ди адэжьхэр зэригъэгугъам тету, и ӀуэхутхьэбзащӀэ Израилым дэӀэпыкъуэгъу хуэхъуащ, Ибрэхьимрэ абы къытехъукӀыжахэмрэ игъащӀэкӀэ яхуэгумэщӀэну псалъэ зэритар ищӀэжырти.

⁵⁶ Елисавэ деж мазищ хуэдизкӀэ щыхьэщӀа нэужь, Мэрям и унэ кӀуэжащ.

Яхья бегъымбарыр къызэралъхуар

⁵⁷ И пӀалъэр къэсри, Елисавэ къуэ къилъхуащ.

⁵⁸ Зиусхьэным абы апхуэдэ фӀыгъуэшхуэ къызэрыхуищӀар щызэхахым, и гуфӀэгъуэр даӀыгъын папщӀэ, и гъунэгъухэмрэ и благъэхэмрэ къызэхуэсащ.

⁵⁹ Махуэ еянэм, сабийр сунэт ящӀыну цӀыхухэр щызэхуэсым, и адэм и цӀэр, Зэчрей, и къуэми фӀащыну мурад ящӀат.

⁶⁰ Ауэ сабийм и анэм яхуимыдэу къажриӀащ: – Зэчрейкъым, атӀэ Яхьящ абы фӀэтщынур.

⁶¹ – Апхуэдэу зэджэ уи Ӏыхьлыхэм яхэткъым, – къыжраӀащ абыхэм.

⁶² ИтӀанэ ӀэпэтэрмэшкӀэ сабийм и адэм еупщӀащ цӀэуэ фӀищынумкӀэ.

⁶³ Зэчрей пхъэбгъу кӀапэ къригъэхьри, псоми яфӀэтелъыджэу, мыпхуэдэу тритхащ: «Абы фӀэтщынур Яхьящ».

⁶⁴ Абдеж дыдэм и бзэр къиутӀыпщыжщ, къэпсалъэри, Тхьэр игъэлъэпӀащ абы.

⁶⁵ Я гъунэгъу псори хуабжьу шынат икӀи Ехьудей хэкум и бгылъэ щӀыпӀэхэм а Ӏуэхум фӀэкӀа нэгъуэщӀ щагъэхъыбарыжтэкъым.

⁶⁶ А псори зэхэзыхахэм, а Ӏуэхум егупсысурэ, ягукӀэ мыпхуэдэу жаӀэрт: «Мы сабийм къыхэкӀынур хэту пӀэрэ?» Зиусхьэным и нэӀэр сабийм зэрытримыгъэкӀыр къагурыӀуати, арат абыхэм апхуэдэу щӀыжаӀэр.

Зэчрей Тхьэм и псалъэ къызэрыжиӀар

⁶⁷ Сабийм и адэм и гум Тхьэм и Псэр хыхьэри, мы псалъэхэр къыжиӀащ:

⁶⁸ – Ди Зиусхьэну Израилым ди Тхьэр дывгъэгъэлъапӀэ, и лъэпкъым щӀэгъэкъуэн къытхуэхъуащи, щхьэхуитыныгъэ къыдитащи.

^69-70 Пасэ зэманым Тхьэм къыхихауэ щыта бегъымбархэм я жьэкӀэ дыкъызэригъэгугъам тету, и ӀуэхутхьэбзащӀэу щыта Даут бегъымбарым къытехъукӀауэ, КъегъэлакӀуэ лъэщ къытхуигъэкӀуащ.

⁷¹ Абы ди бийхэмрэ дыкъэзылъагъу мыхъухэмрэ дакъригъэлынущ.

⁷² Ди адэжьхэм яхуэгумэщӀэну икӀи и ЗэухылӀэныгъэ лъапӀэу абыхэм ярищӀылӀар игу иригъэлъыну къигъэгугъащ ахэр.

^73-74 Тхьэм ди адэжь Ибрэхьим псалъэ быдэ иритащ, ди бийхэм дакъыӀэщӀихыжыну икӀи шынэ дымыщӀэу и гъуэгу дытригъэтыну,

⁷⁵ дыпсэуху гу къабзэрэ напэ хужькӀэ и пащхьэ дитын щхьэкӀэ.

⁷⁶ Ауэ уэ, си щӀалэ, Я Нэхъ Лъагэм и бегъымбаркӀэ къоджэнущ, Зиусхьэным и гъуэгур хуэбгъэхьэзырыну, Абы япэ уиту цӀыхухэм уахыхьэнущи.

⁷⁷ Зиусхьэным и лъэпкъым я гуэныхьхэр къахуигъэгъуу къызэрыригъэлынур уэ абыхэм яхуэпӀуэтэнущ.

⁷⁸ Зигу дапщэщи къытхуэфӀ ди Тхьэм дыгъэ къыкъуэкӀым хуэдэу Нэхушхуэ уафэм къытхуригъэхынущ,

⁷⁹ ажалым и бжьыр зытелъхэмрэ кӀыфӀыгъэм хэту псэухэмрэ къыттепсэн икӀи мамырыгъэм и гъуэгум дытришэн щхьэкӀэ.

⁸⁰ Сабийр хэхъуэрт, гукӀи псэкӀи зиужьырт. Тхьэм израил лъэпкъым яхуигъэкӀуэху, ар къумым щыпсэуащ.