Гъэсэпэтхыдэхэр 9 - ФӀыцӀагъэ ЛъапӀэ

ЕБГЪУАНЭ ӀЫХЬЭ Ӏущыгъэм урегъэблагъэ

¹ Игъэуващ Ӏущыгъэм унэ, пкъощӀэсибли хуищӀыжащ.

² И Ӏэщым щыщу фӀибзщ нэхъыфӀри, удзыфӀкӀэ санэри зэхищӀэри, и Ӏэнэри къиузэдащ.

³ ЗэбгригъэкӀащ абы и унэӀут цӀыхубзхэр къалэ лъагапӀэхэм къыщигъэджэну:

⁴ «ЖыӀэзыфӀэщ псори фыкъекӀуалӀэкъэ си деж! – захуегъазэ абы акъылкӀэ хуэмыщӀахэм, –

⁵ ФыкъакӀуи, зыӀувгъахуэ си шыгъу-пӀастэ, удзыфӀкӀэ зэхэсщӀа си санэми фыкъефэ.

⁶ Фи щӀыб хуэвгъазэмэ акъылыншагъэм – фыпсэунщ; акъыл и гъуэгукӀэ фызэхэзекӀуэ!»

⁷ ЦӀыху щӀэнэкӀалэр зэ бгъэӀущмэ – лъэкъухь къэпхьынщ, бзаджащӀэр къыщӀэбгъэщмэ – уигъэикӀэнщ.

⁸ ЩӀэнэкӀалэм уегиемэ, къыпхуэхъунщ жагъуэгъу; уегиемэ цӀыху Ӏущым, щӀасэгъу уищӀынщ.

⁹ Ӏущым еущии, и зэхэщӀыкӀым нэхъри зиӀэтыну арщ; захуащӀэми еущие – и акъылым хигъэхъуэну арщ.

¹⁰ Тхьэуэ Зиусхьэным уфӀэлӀыкӀыныр – Ӏущыгъэм и пэублэщ, Тхьэ ЛъапӀэр къэпцӀыхуныр – акъылым ищхьэщ.

¹¹ Ӏущыгъэм гъащӀэ кӀыхь уищӀынщ, иригъэкъунщ уи ныбжьри.

¹² УӀущыр пэжмэ, узыхуэӀущыр уи щхьэщ, ущӀэнэкӀалэу щытмэ, уэр-уэрурэ узэхуохъуж зэран.

Акъылыншагъэм урегъэблагъэ

¹³ Акъылыншагъэр хуэдэщ цӀыхубз бырсырым – зэхэщӀыкӀ жыхуаӀэр ищӀэркъым абы;

¹⁴ и унэ бжэщхьэӀу гупэм дежи щысу, къалэ лъагапӀэм къытет тӀысыпӀэм тесуи плъэгъунущ ар,

¹⁵ абдеж къыблэкӀхэм, щызэхэзекӀуэхэм ар йоджэ:

¹⁶ «ЖыӀэзыфӀэщ псори фыкъекӀуалӀэкъэ си деж! – захуегъазэ абы акъылкӀэ хуэмыщӀахэм, –

¹⁷ Узрамыгъафэ псыр аракъэ ӀэфӀыр, гъэпщкӀуауэ пшхыр аракъэ къыпӀурыӀэфӀэр?»

¹⁸ Ар ажалым зэрилӀыкӀуэр къыхэхуэркъым абы я пщӀыхь, хьэщӀэу къыхуепсыхри зы къэмынэу зытетыр хьэдрыхэ гъуэгущ.