Данил 4 - ФӀыцӀагъэ ЛъапӀэ

¹ Сэ тыншыгъуэ сиӀэу си сэрейм сытхъэжу сыщыпсэут.

² Ауэ зэгуэр пщӀыхьэпӀэ слъагъури сигъэшынащ; си гъуэлъыпӀэм силъу пщӀыхьым хэту къысхуэлъэгъуам гулэгущтэ сищӀащ.

³ Арати, Бабылейм усэрэжу исхэр къашэну унафэ сщӀащ, си пщӀыхьэпӀэм къикӀыр абыхэм жезгъэӀэн папщӀэ.

⁴ Ӏэзэгъуазэхэри, нэщыпхъуэхэри, мэгъухэри, удхэри къакӀуэри си пщӀыхьэпӀэр яхуэсӀуэтащ, арщхьэкӀэ абы къикӀыр зыми къыхуэщӀакъым.

⁵ ИкӀэмикӀэжым Данил, си тхьэм и цӀэкӀэ иджыри БэлътэщэркӀэ зэджэр, тхьэ лъапӀэхэм я псэр зыхэтыр, къакӀуэри си пщӀыхьэпӀэр хуэсӀуэтащ.

⁶ Сэ жысӀащ: «Мэгъухэм я пашэу Бэлътэщэр, сэ сощӀэ тхьэ лъапӀэхэм я псэр зэрыпхэтыр, икӀи уэ къыщӀэбгъэщынкӀэ къогугъуэкӀын щэху зэрыщымыӀэр. КъедаӀуэ си пщӀыхьэпӀэр зыхуэдэми, къикӀыр къызжеӀэ.

⁷ Мыращ сызэпщӀыхьар, си гъуэлъыпӀэм силъу: ЩӀыгум и кум итт жыг лъагэшхуэ –

⁸ уардэрэ лъэ быдэу, и щхьэкӀэр уафэм нэсрэ, щӀым и гъунэми щыплъагъуу;

⁹ и тхьэмпэхэр Ӏуврэ, и пыкӀэр бэву, псоми я шхын абы пыту; и жьауэм хьэкӀэкхъуэкӀэхэр щӀэсрэ, и къудамэхэр къуалэбзухэм я абгъуэу, псэ зыӀут псоми ар я шхыныгъуэу.

¹⁰ Си пӀэщхьагъ силъыжу адэкӀэ солъагъу – ХъумакӀуэ лъапӀэр уафэм къехри,

¹¹ къыжиӀащ макъышхуэкӀэ мыпхуэдэу: „ИвупщӀыкӀ жыгри, гуэвуд и къудамэхэр, и тхьэмпэхэр ффыщӀи, пывгъэщэщ пыкӀэхэр, и лъабжьэм щӀэс хьэкӀэкхъуэкӀэр зэбгрыреж, и къудамэхэм тес къуалэбзухэри зэбгрелъэтыж.

¹² Жыг дакъэ закъуэр лъабжьэм и гъусэу щӀым къыхэвнэ, губгъуэ удзхэм яхэту, жыррэ гъуаплъэкӀи зэщӀэлъэхъауэ. Уафэм къех уэсэпсым ар игъэщӀытэу, хьэкӀэкхъуэкӀэхэми ядэщӀыгъуу, щӀыгу удзыпцӀэр егъэзыпӀэ хурехъу.

¹³ ЦӀыху акъылым икӀынурэ ар, хьэкӀэкхъуэкӀэ гупсысэм ихьэнущ, апхуэдэуи илъэсибл ней дэкӀынущ.

¹⁴ А унафэр ХъумакӀуэхэм ейщ, а хьэкумыр ЛъапӀэхэм я псалъэщ! Псэ зыӀут псоми ящӀапхъэщ, тепщэныгъэр зыхуейм ириту Я нэхъ Лъагэм зэрыӀэщӀэлъыр, уеблэмэ, ямылъытэхэри пащтыхьыпӀэм иришэу“.

¹⁵ Мис аращ сэ сызэпщӀыхьа пщӀыхьэпӀэр зыхуэдэр, – жиӀащ Нэбыхъунэщыр пащтыхьым. – ИӀэ иджы, Бэлътэщэр, абы къикӀыр къызжеӀэ, си пащтыхьыгъуэм и зы усэрэжи ар лъэкӀакъым, ауэ уэ пхузэфӀэкӀынущ, тхьэ лъапӀэхэм я псэр пхэтщи».

Данил пщӀыхьэпӀэм къикӀыр къызэрыжиӀар

¹⁶ БэлътэщэркӀэ зэджэ Данил абдежым заулкӀэ Ӏэнкуну щытащ, и гупсысэхэм хуабжьу игъэгузавэу. Пащтыхьым жиӀащ: «Бэлътэщэр, а пщӀыхьэпӀэми абы къикӀми уримыгузавэ». Бэлътэщэр жэуап къритыжащ: «Си зиусхьэн, а пщӀыхьэпӀэри абы къикӀри уи бийхэм ялъысам нэхъыфӀт!

¹⁷ Уэ плъэгъуа жыгыр – уардэрэ лъэ быдэр, уафэм зи щхьэкӀэр нэсрэ, щӀым и гъунэми щыплъагъур;

¹⁸ зи тхьэмпэхэр Ӏуврэ, зи пыкӀэр бэвыр, псоми я шхыныгъуэ зыпытыр, зи жьауэм хьэкӀэкхъуэкӀэхэр щӀэсрэ, зи къудамэхэр къуалэбзухэм зи абгъуэр –

¹⁹ ар уэращ, ди пащтыхь лъапӀэ! Уэ щэджащэ, лъэщышхуэ ухъуащ; уи инагъыр уафэм нэсащ, уи пащтыхьыгъуэр щӀым и гъунэм нос.

²⁰ Уэ, ди пащтыхь, ХъумакӀуэ лъапӀэр уафэм къехыу плъэгъуащ, мыпхуэдэу жиӀэу: „ИвупщӀыкӀ жыгри вгъэкӀуэд, ауэ и лъабжьэм щӀыгъуу и дакъэр щӀым къыхэвнэ, жыррэ гъуаплъэкӀэ лъэхъауэ губгъуэ удзым хэту, уафэм къех уэсэпсым игъэщӀытэу, хьэкӀэкхъуэкӀэхэм ящӀыгъуу ар ирепсэу, илъэсибл ней дэкӀыхукӀэ“.

²¹ Абы къикӀыращи, ди пащтыхь лъапӀэ, уэ уэхьэлӀауэ Я нэхъ Лъагэм и унафэр мыращ:

²² цӀыхухэм укъыхахунурэ, хьэкӀэкхъуэкӀэхэм уахэту упсэунущ, Ӏэщым хуэдэу удз цӀынэр уи шхыныгъуэу, уэсэпсыр къыптехэу. Апхуэдэу илъэсибл дэкӀынурэ, итӀанэ уэ къыбгурыӀуэнущ – Я нэхъ Лъагэм цӀыхухэм я тепщэныгъэр зыхуейм ириту зэрыӀэщӀэлъыр.

²³ Жыг дакъэр лъабжьэм щӀыгъуу къагъэнэну ящӀа унафэм къокӀыр уи пащтыхьыгъуэр зэрыпфӀэмыкӀуэдынур, Уафэм и къарум псори зэрыщӀэтыр зэхэпщӀыкӀа нэужь ар къызэрыпӀэрыхьэжынур.

²⁴ Абы къыхэкӀкӀэ, ди пащтыхь лъапӀэ, си чэнджэщым ущӀэдэӀуамэ арат: уи гуэныхьхэм пыкӀи, захуагъэ лэжь; тхьэмыщкӀэхэм гущӀэгъу яхуэпщӀурэ уи хабзэншагъэм кӀэ ет; итӀанэ, хэт ищӀэрэ, уи махуэфӀхэм къыпащэнкӀи хъунщ».

ПщӀыхьэпӀэр нэхуапӀэ зэрыхъуар

²⁵ А псори Нэбыхъунэщыр пащтыхьым къыщыщӀащ.

²⁶ Мазэ пщыкӀутӀ дэкӀауэ, абы Бабылейм ит и сэреишхуэм и унащхьэм тету къыздикӀухьым,

²⁷ мыпхуэдэу жиӀащ: «Сыту иныщэ мы Бабылейр! Си щӀыхьымрэ си пщӀэмрэ игъэбагъуэу, пащтыхь къалащхьэу сэ ар зэрызухуар си лъэщыгъэшхуэкӀэщ!»

²⁸ А псалъэхэр жиӀэн имыух щӀыкӀэ уафэм макъ къиӀукӀащ: «Мыращ, Нэбыхъунэщыр пащтыхьым, уи натӀэр: уи пащтыхьыгъуэр къыпӀэщӀахащ.

²⁹ ЦӀыхухэм укъыхахунурэ, хьэкӀэкхъуэкӀэхэм я гъусэу упсэунущ, Ӏэщми хуэдэу удз цӀынэ пшхынущ. Апхуэдэурэ илъэсибл дэкӀынурэ, итӀанэ уэ къыбгурыӀуэнущ: Я нэхъ Лъагэм цӀыхухэм я тепщэныгъэр зыхуейм ириту зэрыӀэщӀэлъыр».

³⁰ Нэбыхъунэщыр теухуауэ жаӀар асыхьэтым къэхъуащ. ЦӀыхухэм къыхахури, абы Ӏэщым хуэдэу удз ишхащ. Уэсэпсыр къытехэу псэуащ ар, и щхьэцыр бгъэм и къабзийхэм хуэдэу кӀыхьышхуэ, и лъэбжьанэхэр къуалэбзу лъэбжьанэм хуэдэ хъуху.

³¹ АдэкӀэ къэхъуари къиӀуэтэжащ Нэбыхъунэщыр: «Зэман дэкӀщ, сэ уафэм сыдэплъейри, си акъылым сихьэжащ. Абдежым Я нэхъ Лъагэм фӀыщӀэ хуэсщӀащ; щытхъу хужысӀэурэ ИгъащӀэкӀэ Псэур згъэлъэпӀащ. Абы и тепщэныгъэр мыкӀуэдыжынщ, и пащтыхьыгъуэми кӀэ иӀэнукъым.

³² ЩӀым щыпсэухэр зыри ищӀыскъым; уафэм и дзэхэри щӀылъэм тетхэри зэрегъакӀуэ Абы Езым и ӀэмыркӀэ. Зыми лъэкӀынукъым Абы и Ӏэр иубыдыну хьэмэрэ „Сыт Уэ пщӀар?“ жриӀэну.

³³ Си акъылым сызэрихьэжу, пащтыхьым и пщӀэри, и щӀыхьри, и лъапӀагъэри къысӀэрыхьэжащ. Си чэнджэщэгъухэми си блыгущӀэтхэми, си деж къагъэзэжри, аргуэру пащтыхьу салъытэ хъужащ, икӀи япэм нэхърэ ӀэджэкӀэ сынэхъ лъэщщ.

³⁴ Иджы сэ сыщотхъу, соӀэт, согъэлъапӀэ уафэм и Пащтыхьыр. Абы ищӀэ псори пэжыгъэщ икӀи захуагъэщ. Абы лъокӀ пагэхэр Ӏэсэ ищӀыну».