Данил 2 - ФӀыцӀагъэ ЛъапӀэ

Нэбыхъунэщыр и пщӀыхьэпӀэр

¹ Тахътэм зэрыдэкӀуейрэ илъэс етӀуанэр екӀуэкӀыу, Нэбыхъунэщыр пащтыхьым пщӀыхьэпӀэхэр илъагъури, абы и псэр игъэгузавэу и напӀэр зэхуимыхьыжыф хъуат.

² Пащтыхьым унафэ ищӀащ Ӏэзэгъуазэхэри, нэщыпхъуэхэри, удхэри, мэгъухэри къыхураджэну, илъэгъуа пщӀыхьэпӀэхэр зищӀысыр къыжраӀэн щхьэкӀэ. Ахэр къакӀуэу и пащхьэ къиува нэужь,

³ пащтыхьым абыхэм яжриӀащ: «ПщӀыхьэпӀэ слъэгъуащи, сегъэгузавэ, ар зищӀысыр сщӀэну сыхуейщ».

⁴ Мэгъухэм пащтыхьым жэуап къратыжащ: [адэкӀэ Ӏэрытхыр арамеибзэкӀэщ къызэрыкӀуэр] «Зи щӀыхьыр ин ди пащтыхь! УзэпщӀыхьар уи пщылӀхэм къытхуэӀуати, къикӀыр бжетӀэнщ».

⁵ Пащтыхьым мэгъухэм яжриӀащ: «Арамэ, си мурадыр зэвгъащӀэ: пщӀыхьэпӀэу слъэгъуамрэ абы къикӀымрэ къызжевмыӀэмэ, цӀыкӀуцӀыкӀуу фезгъэупщӀэтэнущ, фи унэхэри и лъабжьэм нэс зэтрезгъэкъутэнущ.

⁶ Ауэ сызэпщӀыхьар къысхуэфӀуатэрэ къикӀри къызжефӀэмэ, тыгъэхэри саугъэтхэри фэстынущ, пщӀэшхуи фэзгъэгъуэтынущ. Аращи, си пщӀыхьэпӀэр зыхуэдэри къикӀри къызжефӀэ».

⁷ Мэгъухэм аргуэру: «Уи пщылӀхэм уи пщӀыхьыр къытхуэпӀуэтатэмэ, къикӀыр зэхэдгъэкӀынт», – жаӀащ.

^8-9 «СощӀэр сэ зи ужь фитыр! – япидзыжащ пащтыхьым. – Зифлъэфыхьыурэ зэман къызэрыдэвгъэхуэным фещэу аращ! „СызэпщӀыхьар къысхуэвмыӀуатэмэ, псоми мыгъуэр фи махуэщ“ вжесӀащи. Си псалъэр зэрыбыдэр фощӀэри, сыкъэвгъэпцӀэну фызэгурыӀуауэ, жыфӀэр пцӀы зэфэзэщщ. Ӏуэхум зихъуэжыным фыщогугъ. АтӀэ, си пщӀыхьэпӀэр зыхуэдэр къысхуэфӀуати, сщӀэнщ абы къикӀри къызэрызжефӀэфынур».

¹⁰ Мэгъухэм пащтыхьым жэуап къратыжащ: «Узыхуейр зыхуэщӀэн цӀыху дунейм теткъым! Зы пащтыхьи, дапхуэдизу ар щэджащэу щымытами, зэи зы уди, зы Ӏэзэгъуази, зы мэгъуи апхуэдэ къалэн ящищӀакъым.

¹¹ Узыхуейр икъукӀэ гугъущ. Зыми а щэхур уэ къыпхузэӀуихыфынукъым тхьэхэм фӀэкӀа, ауэ ахэр цӀыхухэм я гъусэу псэуркъым».

¹² Абыхэм жаӀам апхуэдизу пащтыхьыр къигъэгубжьат, и пӀэм къришати, Бабылейм усэрэжу ис псори яукӀыну унафэ ищӀащ.

¹³ Усэрэжхэм тращӀыхьа унафэр къыдэкӀауэ, Данили, и ныбжьэгъухэр щӀыгъуу, къалъыхъуэрт, яукӀын щхьэкӀэ.

¹⁴ Данил, губзыгъагъэ хэлъу, и дэтхэнэ зы псалъэри зэпишачэу, пащтыхьым и хъумакӀуэхэм я унафэщӀ Ӏэриуэх, Бабылейм ис усэрэжхэр зэтезыукӀэну ежьам зыхуигъэзащ:

¹⁵ «Сыт пащтыхьым апхуэдэ унафэ ткӀий къыщӀыдигъэкӀар?» – жиӀэри. Ӏэриуэх Данил Ӏуэхур зытетыр къыжриӀащ.

¹⁶ Абдежым Данил пащтыхьым и деж кӀуэри зэман къритыну елъэӀуащ, и пщӀыхьэпӀэм къикӀыр жриӀэн папщӀэ.

¹⁷ ИтӀанэ ар и унэ кӀуэжри къэхъуар и ныбжьэгъухэм яхуиӀуэтэжащ – Хъэнании, МышрэӀили, Уэзии.

¹⁸ Данил абыхэм яжриӀащ уафэр зыӀэщӀэлъ Тхьэм елъэӀуну, гущӀэгъу къахуищӀу, а щэхур къахузэӀуихын папщӀэ, Бабылейм щыпсэу адрей усэрэжхэм ядэщӀыгъуу ахэр ямыукӀын щхьэкӀэ.

^19-20 Тхьэм а щэхур жэщым Данил къыхуигъэлъагъуэри къыхузэӀуихащ. Данил уафэм щыӀэ Тхьэм щытхъу мы псалъэхэмкӀэ хуигъэшащ: «Тхьэм и цӀэр лӀэщӀыгъуэ къэс ирагъэлъапӀэ! Абы Ӏущыгъэшхуи лъэкӀыныгъэшхуи иӀэщи.

²¹ Зэманхэри лъэхъэнэхэри Абы зэблегъэкӀ; зы пащтыхьхэр тредзри, адрейхэр еӀэт. Ӏущхэм зэхэщӀыкӀ, акъылыфӀэхэм щӀэныгъэ ярет.

²² Куууэ щӀэхъума щэхухэр Абы къызэӀуех; кӀыфӀыгъэм хэтым щыгъуазэщ, нэхури дэщӀыгъущ.

²³ ФӀыщӀэрэ щӀыхьрэ пхузощӀыр, си адэжьхэм я Тхьэм, Ӏущыгъэрэ къарурэ Уэ къызэптащи, дыныщӀолъэӀуар сыбгъэлъэгъуащи. Пащтыхьым ищӀэну зыхуейр Уэ къэдбгъэщӀащ!»

Данил пщӀыхьэпӀэм къикӀыр къызэрыжиӀар

²⁴ Арати, Данил Бабылейм ис усэрэжхэр зэтриукӀэну пащтыхьым унафэ зыхуищӀа Ӏэриуэх деж кӀуэри, жриӀащ: «УмыукӀ Бабылейм ис усэрэжхэр. Пащтыхьым и деж сыши, абы и пщӀыхьэпӀэм къикӀыр сэ жесӀэнщ».

²⁵ Асыхьэтым Ӏэриуэх пащтыхьым деж Данил ишэри, жриӀащ: «Ехьудейм гъэру къипшахэм къахэзгъуэтащ уи пщӀыхьэпӀэм къикӀыр къыбжезыӀэфын цӀыху».

²⁶ Пащтыхьыр Данил (иджыри БэлътэщэркӀэ зэджэм) еупщӀащ: «Сэ сызэпщӀыхьар къэпӀуатэу, къикӀри къызжепӀэфынуи уэ?»

²⁷ Данил жэуап къритыжащ: «Зы усэрэжи, зы нэщыпхъуи, зы Ӏэзэгъуази, зы уди къызэӀуихыфынукъым узыщӀэупщӀэ щэхур,

²⁸ ауэ уафэм щыӀэщ Тхьэ, щэхухэр къызэӀузых. Мис Абы лъэхъэнэм и кӀэм къэхъунур уэ къуигъэлъэгъуащ. Уи пӀэщхьагъ уилъыжу, пщӀыхьэпӀэу къыпхуэлъэгъуар мыращ:

²⁹ Уэ, ди пащтыхь лъапӀэ, къэкӀуэнум уегупсысу пӀэм уздыхэлъым, щэхухэр КъызэӀузыхым къэхъунур уигъэлъэгъуащ.

³⁰ А щэхур сэ къыщӀысхузэӀуахар адрей цӀыхухэм нэхърэ сынэхъ Ӏущу аракъым, атӀэ пащтыхьым илъэгъуам къикӀыр къыгурыӀуэн, и гупсысэ щэхухэр зэхищӀыкӀыжын щхьэкӀэщ.

³¹ Моуэ уздэплъэм, ди пащтыхь лъапӀэ, сурэтышхуэ гъэжауэ уи пащхьэ къиту уолъагъу – инышхуэ Ӏейрэ, узримыгъэплъу зэщӀэлыдэу, и теплъэр узижэгъуэну шынагъуэу.

³² Сурэт гъэжам и щхьэр дыщэзэрылэт, и бгъэмрэ и Ӏэхэмрэ дыжьыным къыхэщӀыкӀат, и ныбэмрэ и куэхэмрэ – гъуаплъэм,

³³ и лъэдийхэр гъущӀт, и лъапэхэр иныкъуэр гъущӀт, иныкъуэр ятӀэ гъэжат.

³⁴ Уи нитӀкӀэ плъагъуу, цӀыхуӀэ хэмыту, мывэ гуэр джабэм къыкӀэрыкӀри сурэт гъэжам и лъапэм, иныкъуэр гъущӀу иныкъуэр ятӀэ гъэжауэ щытым, еуэри зэхикъутащ.

³⁵ НапӀэзыпӀэм гъущӀри, ятӀэ гъэжари, гъуаплъэри, дыжьынри, дыщэри щыкъуейуэ зэтещащэри, гъавэ Ӏухыжыгъуэм хьэмым щыщӀэщэщ пыдзахуэм хуэдэу, жьым ирихьэжьэри, и лъэужь къимыгъанэу зэбгрихащ. Ауэ сурэт гъэжам еуа мывэр бгышхуэ хъури щӀылъэр зэрыщыту иубыдащ.

³⁶ Аращ пщӀыхьэпӀэр зыхуэдэр, иджы абы къикӀыр бжесӀэнщ.

³⁷ Уэ, ди пащтыхь лъапӀэ, пащтыхьхэм урапащтыхьыжщ. Уафэр зыӀэщӀэлъ Тхьэм тепщэныгъэшхуи, лъэщагъи, къаруи, щӀыхьи уигъэгъуэтащ;

³⁸ цӀыхухэри, щӀыгум тет хьэкӀэкхъуэкӀэхэри, уэгум ит къуалэбзухэри – псори, дэнэ щӀыпӀэ щыпсэухэри уи ӀэмыщӀэ ирилъхьащ. Дыщэм къыхэщӀыкӀа щхьэр уэращ.

³⁹ Уи ужькӀэ нэгъуэщӀ пащтыхьыгъуэ зыкъиӀэтынущ, ууейм нэхърэ нэхъ цӀыкӀуу. КъыкӀэлъыкӀуэу, ещанэ пащтыхьыгъуэу дуней псом тепщэнур гъуаплъэм хуэдэнущ.

⁴⁰ Ауэ еплӀанэ пащтыхьыгъуэр гъущӀым хуэдэу быдэнущ – гъущӀым псори зэрызэгуиуд, зэрикъутэм хуэдэу, абы адрейхэр зэхикъутэнурэ игъэщэщэнущ.

⁴¹ И лъапэхэмрэ и лъэпхъуамбэхэмрэ и ныкъуэр ятӀэ гъэжауэ и ныкъуэр гъущӀу зэрыплъэгъуам хуэдэу, а пащтыхьыгъуэм зигуэшынущ; ауэ абы гъущӀым и быдагъи хэлъынущ, гъущӀыр ятӀэ гъэжам хэзэрыхьауэ щӀэплъэгъуар аращ.

⁴² И лъэпхъуамбэхэм и ныкъуэр ятӀэ гъэжам и ныкъуэр гъущӀым къыхэщӀыкӀауэ зэрыплъэгъуам хуэдэу, пащтыхьыгъуэр зылъэныкъуэкӀэ быдэу, зылъэныкъуэкӀи махэу щытынущ.

⁴³ ГъущӀыр ятӀэ гъэжам хэзэрыхьауэ зэрыплъэгъуам хуэдэу, абы лъэпкъхэр щызэхэзэрыхьынущ, ауэ зы хъунукъым, гъущӀымрэ ятӀэмрэ зэхэткӀухьу зэщыщ зэрымыхъуфынум хуэдэу.

⁴⁴ А пащтыхьыгъуэхэм я махуэхэм уафэр зыӀэщӀэлъ Тхьэм игъащӀэкӀи мыкъутэжыну, нэгъуэщӀ лъэпкъхэми яӀэщӀэмыхьэну пащтыхьыгъуэ иухуэнущ. Абы адрей пащтыхьыгъуэхэр зэхикъутэнурэ кӀэухыр къахуигъэкӀуэнущ, ауэ езыр игъащӀэкӀи щыӀэнущ.

⁴⁵ Аращ цӀыхуӀэ хэмыту джабэм зыкъыкӀэричу гъущӀри, гъуаплъэри, ятӀэ гъэжари, дыжьынри, дыщэри зыущыкъуея мывэм къикӀыр. Тхьэуэ иным къуигъэлъэгъуащ къэкӀуэнум къэхъунухэр. Аращ шэчыншэу уэ узэпщӀыхьар, абы къикӀыу ныбжесӀари пэжщ».

⁴⁶ Абдежым Нэбыхъунэщыр пащтыхьым Данил и пащхьэ зыщридзыхри щхьэщэ хуищӀащ, икӀи тыхьхэр къыхуащӀу, мэ ӀэфӀ къызыпих сагъыз абы хуагъэсыну унафэ ищӀащ.

⁴⁷ Пащтыхьым Данил жриӀащ: «Уэ а щэхур сэтей къыщыпщӀыфакӀэ, шэч хэлъкъым, фи Тхьэр тхьэуэ щыӀэм зэраТхьэжым, пащтыхьхэм зэраТепщэм, щэхухэри къызэрызэӀуихыфым».

⁴⁸ Абы и ужькӀэ пащтыхьым Данил иӀэтащ, тыгъэ лъапӀэ Ӏэджи иритащ, Бабылей хэгъэгу псори и ӀэмыщӀэ ирилъхьащ, усэрэж псоми тхьэмадэ яхуищӀащ.

⁴⁹ Езы Данил пащтыхьым елъэӀуащ, Шэдрахь, Мешэхь, ӀэведНэгу сымэ и жьауэм къыщӀигъэувэу, Бабылей хэгъэгум и Ӏэтащхьэхэу тригъэувэну. Езыр сэрей пщӀантӀэм къыщынащ.