Yubu 8 - Acoli Baibul

Bildad otito ni tim pa Lubaŋa tye atir

¹ Bildad Lacua ogamo doge kun waco ru,

² “Lok magi ibiloko nio wa awene, kun lokki winnye calo yamo madit ma kodo matek?

³ Lubaŋa pe twero ŋolo kop atir? Won Twer Ducu timo gin ma pe kakare?

⁴ Nen, litinoni gubedo ka timo bal i kome, oweko en omiyo can opoto i komgi ma oporo balgi.

⁵ Ka ibiyenyo Lubaŋa, kun ibako dogi bot Won Twer Ducu,

⁶ ka ii leŋ ma cwinyi atir, adada en bia ci konyi, bidwoko odi kakare pi kiti ma atir.

⁷ Kadi bed yam i acakki ibedo ki jami manok, ento i agikki me kwoni ibibedo ki lim mabup.

⁸ “Pienno alegi, peny kwarowa macon, ci it am ni gin aŋo ma yam kwarogi gubedo ka yenyo;

⁹ pien waŋ wabedo jo ma laworo keken, pe waŋeyo gin mo, ninowa me bedo i lobo lokke calo tipo.

¹⁰ Kono iwinyo pwony pa ludoŋo, ki lok ma giwaco pi ŋecgi matut.

¹¹ “Togo twero doŋo ka ma daba pe iye? Lagada doŋo ka ma pii pe iye?

¹² Ka pud gilot alota, ma peya gitoŋogi, giner woko oyot makato ginapita ducu ka pii pe.

¹³ Meno aye yo pa jo ducu ma wigi wil i kom Lubaŋa; gen pa dano ma pe lworo Lubaŋa bitum.

¹⁴ Gin ma en geno rom ki uci ma cot woko oyotoyot, nyo rom ki obwo oboropyen.

¹⁵ En jeŋŋe i kom ode, ento ode pe cuŋ; en keto cine me makone, ento pe cun matek.

¹⁶ Nyo en rom ki doo ma lot matek ka cen oryeny, ma jaŋe lak, rumo po to woko,

¹⁷ Lwite odwalle i kom odur gweŋ, en bedo i kin pata,

¹⁸ Ka gipuro woko ki kakare, kabedone bikwere woko, kun waco ni, ‘An yam peya aneni,’

¹⁹ ci doo mukene twi i ŋom leyo kakare cut. Meno aye yomcwiny pa dano ma pe lworo Lubaŋa,

²⁰ “Nen, Lubaŋa pe kwero dano ma pe ki bal; en pe mako cin jo maraco.

²¹ En pud bimiyo dogi poŋ ki nyero, miyo ibidoŋo oduru me yomcwmy.

²² Lewic bimako jo ma dagi, ki kema pa lutim maraco pe dok binen.”