Yubu 6 - Acoli Baibul

Yubu ojuko luwote

¹ Yubu odok iye kun wacci,

² “Kono ceŋ gipimo cwercwinya, kono giporo i mijan ki can ma opoto i koma!

³ Pien kono obedo pek ma kato kweyo dog nam; en gin mumiyo cen aloko lok ata ta.

⁴ Atero pa Won-Twer Ducu doŋ otuco koma, cwinya tye ka mato kwirgi; Lubaŋa doŋ o kelo i koma kit ticce ducu ma kelo lworo.

⁵ Kana me tim kok ka en tye ki lum i doge? Twon dok kok ka doŋ giketo camme i nyime?

⁶ Gin mabot twero camme laboŋo kado? Pig otigo lweka bille mamit?

⁷ Iya pe mito wa bilone; gin calo cam ma lemo cwinya.

⁸ “Ka nene Lubaŋa omiya gin ma alego bote! Kono omiya gin ma cwinya mito!

⁹ Do kono Lubaŋa oye nyota woko matwal; kono oweko ciŋe otiyo ticce otyeka woko.

¹⁰ Kono otimo kumeno, kono cwinya okwe; kono apye ki yomcwiny, kadi bed remkoma pe tima kica; pien onoŋo yam pe akwero lok ma ŋat Maleŋ owaco.

¹¹ Atye ki teko aŋo ma miya pud akuro? Agikki me kwona bibedo niŋniŋ, ni kono abedo ka ciro?

¹² Tekona rom ki teko me got mono? Riŋo koma rom ki mola ce?

¹³ I ada pe atye ki kony mo iiya, kit gin me konya doŋ oa woko ki bota.

¹⁴ “Ŋat ma kwero timo lawote kica noŋo oweko doŋ lworo Won Twer Ducu,

¹⁵ Omega gubwola macalo laora kulu ma ka opoŋ, piine mol woko, two oyot;

¹⁶ piine col pien orubbe ki pee, pee mua ki i wi got okanne iye.

¹⁷ I kare me oro piine rwenyo woko, ka piny doko lyet pe doŋ nen.

¹⁸ Luwot giweko yogi, giwirre ata pi yenyo pii, gicoro dye tim, girwenyo wo ko matwal.

¹⁹ Luwot mua ki i Tema guciko waŋgi me neno lakit kulu-nu, jo mua ki i Ceba gumoko gengi i kome,

²⁰ Gubedo ki gen madwoŋ ento gengi oballe noŋo, ka guo kunnu, ci lewic omakogi.

²¹ Wun ki tuŋ bota wurom ki laora kulu meno; wuneno can mupoto i koma, ci lworo omakowu cut.

²² Onoŋo yam alego gin mo ki tuŋ botwu? Yam awacci wumi limwu pira me lawil loyo kop?

²³ Nyo awaco ni wulara ki i ceŋ lakworra? Nyo ni wukoka ki i ciŋ jo ma gitye ka una?

²⁴ “Ber wupwonya, ci abiliŋ woko litik; wunyuta bal ma apoto iye.

²⁵ Lok ma tye atir mit twatwal! Ento wun ka wujuka nyuto aŋo?

²⁶ Wumito juko lok ma giwaco awaca, kun lokka calo yamo noŋo pien piny doŋ oloya.

²⁷ Kono do wubol kwir i kom litino kic, nyo wulok luremwu gudok gin me acata pi lim.

²⁸ “Ento koni wutim ber, wunen waŋa, pien pe abiloko lok goba ki i nyimwu.

²⁹ Wuwek doŋ meno obedi ba, wuwek ŋolo kop i koma ma pe atir. Wulok tamwu, pien kop pe twero loya.

³⁰ Pud wutamo ni aloko lok goba? Can mapek poto i koma ci pe aromo poko kine?