Yubu 5 - Acoli Baibul

¹ “Lwoŋ ba; tye ŋat mo ma bidokki iye? Ibilokke bot aŋa ki i kin jo maleŋ?

² Atika cwercwiny miyo lamiŋ to, nyeko neko dano ma tamme nok.

³ Atyeko neno lamiŋ ma ocuŋ matek, ento oyotoyot aceno kabedone.

⁴ Kuc doŋ bor ki litinone; ginyotogi woko i dog gaŋ, kun ŋat ma larogi pe.

⁵ Cam ma en okayo, dano ma kec nekogi gicamo, kun gikwanyo wa i kin okuto; pi mitgi madwoŋ gilaro lonyone alara.

⁶ Pien can pe a i apwa, ayelayela pe twi ki i ŋom;

⁷ dano ginywalo kun kemo can macalo mac kir malo,

⁸ “Ki tuŋ bota kono do ayenyo kony ki bot Lubaŋa, kono aketo lokka i ciŋe.

⁹ En tiyo tic madito ma tere pe tatte, ticce me aura ma welgi pe kwanne.

¹⁰ En miyo kot i wi lobo, cwalo pii i bar kwat.

¹¹ En keto jo ma tye piny i kabedo ma malo, tiŋo jo ma kumo, cibogi malo ka maber.

¹² En balo tam pa luryeko me goba, kumeno pe gicobo ticgi kakare.

¹³ En mako luryeko i ryekogi kengi, macalo i owic, yub pa jo ma tamgi ogom balle woko oyot.

¹⁴ Gin donyo i colpiny dyeceŋ, gipaŋŋe apaŋa i cwiny dyeceŋ macalo dyewor.

¹⁵ Ento en laro litino kic ki i twergi, mayo jo ma piny obwoyo ki i cin jo magwa.

¹⁶ Kumeno lucan gibedo ki gen, jo maraco gimiyo doggi woko.

¹⁷ “Tye ki yomcwiny, dano ma Lubaŋajuko; pi meno pe ikwer pwony pa Won Twer Ducu.

¹⁸ Pien en miyo ret, dok tweyo; goyo dano, ci caŋo,

¹⁹ En bilari i kom ayela abicel, wa i me abirone bene gin marac mo pe bigudi.

²⁰ I kare me kec en bikoki i kom to, ki i mony en bilari ki i lak pala lucwan.

²¹ En bikani ki bot anino leb, pe ibilworo layak ka obino.

²² Kec cam ki yako jamini bimiyo inyero anyera, dok pe ibilworo lee tim.

²³ Pien in ibicikke ki gweŋ ma i poto, lee tim bibedo kwedi ki kuc.

²⁴ Ibiŋeyo ni kemani tye maber, ibiŋiyo dwolli ci gin mo pe ma orem.

²⁵ Ibiŋeyo bene ni likwayu gibibedo mapol, litino anywallini bibedo calo lum ma i tim.

²⁶ Ibito ma doŋ iti maber, ma komi pud tek, macalo bel ma gitero i laro ka dinone ka karene oromo,

²⁷ Nen, watyeko yenyo te lok man, tye ada. Winy, wek in bene iŋe piri keni.”