Yubu 40 - Acoli Baibul

¹ Rwot openyo Yubu ni meno,

² “Lajuk bal bipido lok ki Won Twer Ducu? In ma ipyem ki Lubaŋa-ni, gam lok-ki.”

³ Ci Yubu ogamo dog Lubaŋa kun wacci,

⁴ “Nen ba, an pe a gin mo ada, ci abigamo lokki niŋniŋ? Pe doŋ abiŋamo doga ka lok.

⁵ Doŋ aloko tyen acel keken, pe doŋ abidok iye; iyo, aloko doŋ tyen aryo, ci pe dok abimedde.”

Lee aryo madoŋo ma ginyuto teko pa Lubaŋa

⁶ Rwot dok ogamo dog Yubu kun loko ki i yamo lapiru ni,

⁷ “Koŋ iyubbe, icuŋ matek calo laco; abipenyi ki lok, ci in ititta.

⁸ Itamo ni ibinyuto ni bal tye koma ce? Ibimiyo kop loya pi nyuto ni lokki tye atir?

⁹ Badi tek rom ki pa Lubaŋa? Dwani mor winnye maloŋo calo mere?

¹⁰ “Ber doŋ irukke ki ditti ki deyone, wek tweroni ki woro ma gimiyi onen.

¹¹ Wek kinigani madwoŋ-ŋi okatti woko; nen jo ducu ma wakke, ci imi wakkegi okwe woko.

¹² Nen lyerregi ci idwokgi woko piny, dok inyon jo maraco woko piny ka ma gucuŋo iye.

¹³ Yikgi woko ducu piny i ŋom, twe waŋgi woko i lyel.

¹⁴ Ka itimo kumeno an bene abiye ni iromo cobo pekoni ducu ki tekki.

¹⁵ “Nen Raa mono, lee madit ca, ma an aye akete macalo aketo in; en camo lum twon.

¹⁶ Nen kit ma pyere tek kwede. Nen kit ma ler iye nwaŋ kwede.

¹⁷ Yobe cuŋ matek likiŋ macalo yat kijiŋ, ler eme okubbe kacel.

¹⁸ Cogone tek rom ki oceke mola kulu, tyene rom ki rii nyonyo.

¹⁹ “En tye ginaura madit i kin jami ma Lubaŋa oketo; ŋat mucweye-ni keken aye romo tiŋo pala lucwan i kome.

²⁰ Gikelo cam bote wa ki i wi godi ka ma lee tim ducu gituko iye.

²¹ En buto i te okuto ma i dog kulu, ci kanne i lagada ki i daba.

²² Okuto ma i dog kulu giume ki tipogi, yat oget ma i ŋet kulu gurume woko dyere.

²³ Nen, kadi bed kulu mol matek ki biamwonyi, en pe lworo; kadi bed pii ma i kulu Jordan corre i doge, en pud bedo ma cwinye opye.

²⁴ Ŋatti mo twero golo waŋe ki goli wek omake? Gitwero tuco ume ki toŋ twok?