Yubu 39 - Acoli Baibul

¹ “Iŋeyo kare me nywal pa dyegi ma gibedo i wi got? Yam ineno ka til nywalo litinogi?

² Iŋeyo kwano wel dwe me durugi, wek iŋe kare ma gibinywal iye,

³ kare ma giturre piny pi nywal kun gicolle, ci ginywalo litinogi?

⁴ Litinogi doŋo i bar ma komgi yot, ci gicito gigi matwal ma pe dok gidwogo cen botgi,

⁵ “Aŋa ma oweko kana me tim olone kene? Aŋa ma omiyo twero bot lagwar me cito ka ma iye mito?

⁶ Atyeko miyogi bar mutwo wek obed pacogi, ki lobo ma obedo punu wek gubed iye.

⁷ Gin cayo woo me gaŋ madito, pe tye ŋat mo ma burogi nyo ma miyogi gitiyo tic mo.

⁸ Wi godi odoko oletgi ma gin wirre iye ata, kun giyenyo gin mutwi ducu me acama.

⁹ “Jobi biye tic mo piri? Nyo bibuto i dwolli dyewor?

¹⁰ Itwero tweyo jobi i kom kweri dyaŋ wek opur potoni? En bilubi kun loko potoni ma i luŋ?

¹¹ Ibigene ni pien tye ki teko madwoŋ? Ibiweko en tiyo ticci ducu?

¹² Igeno ni en bidwogo paco, ci kela belli i laro me adina?

¹³ “Udu goyo bwome ki yomcwiny: ento kono lacarre rom ki pa winyo acebe ma lakica-ni?

¹⁴ Pien en weko toŋe i ŋom, wek lyeto me kweyo omur komgi.

¹⁵ Wiye wil woko, pe niaŋ ni lee tim mo twero nyonogi.

¹⁶ En tiyo ki litinone ki gero, calo pe gubedo mere kikome, kadi bed ticce balle noŋo, en pe lworo;

¹⁷ pien Lubaŋa otwonne ryeko, pe omiye ryeko mo me niaŋ i lok.

¹⁸ Ka inen ocako ŋwec, ci en nyero aguragura ki rwode ma obedo i wiye-ni anyera.

¹⁹ “In aye ma imiyo tekkom ki aguragura? In aye ce ma iruko ŋute ki yer maboco?

²⁰ In aye ma imiyo calo bonyo? Daŋŋe mere macalo won twer ci gilworo.

²¹ En nyono piny i luŋ ma wakke awaka pi tekkome, ci riŋo anyim pi rwatte ki toŋi pa lulweny.

²² En cayo lworo acaya, cwinye pe poto; pala lucwan bene pe miyo en lokke dok cen.

²³ Juru atero pa rwode yeŋŋe kok ni tak tak tak, toŋine wil calo mac.

²⁴ En riŋo anyim oyot mada ki gero ki kiniga; pe twero cuŋ mot ka buriji okok.

²⁵ Tekke buriji kok, en bene kok ki yomcwiny; Ŋweyo ŋwec lweny ki ka mabor, winyo daŋŋe pa lutel ki lulweny ma gimwoc.

²⁶ “Pi ryekoni aye omiyo olwilwit tuk malo, ka yaro bwone kemo piny i ŋom?

²⁷ In aye ma iciko ocur ni otuk malo wek oger ode lamal i wi got?

²⁸ En bedo i pata got, buto kunnu bene, i kakannene matye i kor got ma oculle.

²⁹ En yenyo camme ki kunnu, waŋe neno piny ki ka mabor,

³⁰ wek litinone gunoŋ remo me amata; ka ma kom dano muto noŋŋe iye, en pe rwenyo ki kunnu.”