Yubu 37 - Acoli Baibul

¹ “Meno aye gin ma miyo cwinya poto, ma adunona mito tiŋŋe woko ki i kabedone.

² Wuwiny mor me dwane ki lok ŋuruŋuru ma katti ki i doge.

³ En cwalo mor kot i te polo ducu, lut-kotte wil wa i twok lobo ducu.

⁴ Lacen dwane cako mor; mor winnye maloŋo macalo dwan laker; pe juko wil kot i kare ma dwane pud winnye.

⁵ Lubaŋa miyo dwane mor i kit me aura; en tiyo jami madoŋo ma waŋ pe waromo niaŋ iye.

⁶ En ciko pee ni opot i ŋom, dok ciko kot wek ocorre madwoŋ twatwal’

⁷ En tweyo ciŋ dano acel acel gene tic, wek jo ducu guŋe ticce,

⁸ Lee-gu ducu gudok i ka-kannegi, gibedo mot i borogi.

⁹ Lapiru a ki i ode, yamo ma kodo ki tuŋ malo kelo koyo manic.

¹⁰ Yweyo pa Lubaŋa miyo pii makke, doko pee; pii malac makke ci doko tek calo nyonyo.

¹¹ En poŋo pol mapek ki pii; ci lutkot wil meny ki i pol,

¹² Gibedo ka wirre tuŋŋi ki tuŋŋi kun Lubaŋa aye telogi, pi cobo gin ducu ma en ocikogi kwede, i wi lobo ducu ka ma dano twero bedo iye.

¹³ En aye ma miyo timme, kadi pi pwodo dano, nyo pi konyo lobone, nyo pi nyuto mar mere ma pe lokke,

¹⁴ “Winy lok man, Yubu, cuŋ mot, itam pi tic me aura ma Lubaŋa timo,

¹⁵ Iŋeyo kit ma Lubaŋa miyogi kwede cik, ci mi yo lutkot meny ki i pol?

¹⁶ Iŋeyo kit ma pol lyerre kwede? Meno aye tic me aura mada, pa ŋat ma dirone dwoŋ mukato kare.

¹⁷ In meri iwinyo lyeto me boŋŋini keken, ka yamo a ki tuŋ piny ci miyo kom dano ducu bedo wac,

¹⁸ In iromo yaro polo kit ma en otimo-ni, ma omiyo obedo matek macalo mola?

¹⁹ Pwonywa ki lok ma myero wawac bote; pe waromo ca no timwa maber pi kwiya piny ma watye kwede,

²⁰ Myero gitit bote ni amito lok? Dano yam owaco pire kene’, ni gineke woko?

²¹ “Kombeddi doŋ cen caro waŋwa, tye ka ryeny maleŋ twatwal i polo; yamo doŋ okodo, pol doŋ owarre woko.

²² Der ceŋ tuc woko ki tuŋ malo ma ryeny calo jabu; Lubaŋa doŋ orukke ki deyone ma kelo lworo.

²³ En Won Twer Ducu, pe watwero roto tamme; tekone dwoŋ, ŋolo kop atir, timme ducu tye atir mada, pe uno dano mo,

²⁴ Pi meno dano gilwore; en pe paro pi jo ma gin luryeko i tamgi kengi.”