Yubu 36 - Acoli Baibul

Eliu opako dit pa Lubaŋa

¹ Eliu omedde ki lokke kun waco ni,

² “Kura koŋ manok, wek anyutti, pien pud atye ki lok me aloka pi Lubaŋa,

³ At ye ki ŋec malac mada, ci abitiyo kwede, pi nyuto ni tim pa Dat ma ocweyowa tye atir.

⁴ Pien adada lokka goba pe iye; ŋat ma tye ka lok kwedi tye ki ŋec ma oromo maber.

⁵ “Nen, Lubaŋa tye ki twero, ci pe cayo ŋat mo; tekone ocuŋ i kom ryekone matut.

⁶ En pe weko jo maraco bedo kwo nakanaka, ento ŋolo kop kakare pi jo ma giunogi.

⁷ En pe kwanyo waŋe woko ki i kom jo ma kitgi atir, ento ketogi ka loc macalo luker, ci gibedo ki dit nakanaka.

⁸ Ento ka gitweyogi ki pinno, ma ayela otweyogi macalo ogwil,

⁹ ci en nyuto botgi gin ma gutimo, tim aranyigi ki kit ma guwakke kwede.

¹⁰ En miyo gituco itgi me winyo pwony, en cikogi wek gulokke, guwek timo gin marac.

¹¹ Ka giwinyo doge ci gicako tiyo gin ma en mito, gityeko kare me kwogi ducu ki yomcwiny kun gitye maber.

¹² Ento ka gikwero winyo, ginekogi woko, gito ma peya giŋeyo gin mo,

¹³ “Jo ma pe gilworo Lubaŋa ki i cwinygi gibedo ki kiniga, pe gikok bote pi kony ka en otweyogi.

¹⁴ Gito ma pud gitiŋo, kwogi tum woko i tim me lewic.

¹⁵ En laro jo ma giunogi kun tiyo ki aromagi, pwonyo dano ki can ma poto i komgi.

¹⁶ “In Yubu bene obiti, omiyo la woko ki i atwom, oteri i kabedo malac ka ma gin mo pe odiyi, cam ma icamo jwijwi obedo ma mi yu twa twal,

¹⁷ En can ma giketo i kom jo maraco opoŋ boti, can ma giketo pi ŋolo kop i komi doŋ omaki matek.

¹⁸ Gwokke wek kiniga pe oteri i anywar; pe iwek gi-kok mapek ma giŋolo i komi omiyi iŋak woko,

¹⁹ Kokoni pe twero geŋo aroma ma bi no i komgi, kadi bed iyelle ki tekoni ducu,

²⁰ Pe imit ni dyewor obin; meno aye kare ma rok mapol gibirwenyo wo ko ki i kabedogi.

²¹ Gwokke, pe ilokke ka timo bal, pien meno aye gin ma okelo ayela i komi.

²² “Nen, twer pa Lubaŋa dit twatwal; aŋa ma obedo lapwony ma rom kwede?

²³ Aŋa ma ocimme yo ma myero olubi? Aŋa ma twero waco bot Lubaŋa ni, ‘In itimo rac’ ’!

²⁴ Po pi pako ticce ma dano cen gikoro ki wer.

²⁵ Jo ducu guneno gin ma en otimo, ento dano neno ki ka mabor,

²⁶ Lubaŋa dit, waŋ pe waŋeye; wel mwaka ma en ori kwede pe rotte,

²⁷ “Pien en miyo pii duny dok malo, ci tono lupune calo kot;

²⁸ kot corre piny ki i pol, ci cwer i kom dano madwoŋ atika.

²⁹ Ŋat mo twero niaŋ kit ma pol giyarre kwede, nyo kit ma kot mor kwede i kema pa Lubaŋa?

³⁰ En miyo lutkot wil tuŋŋi ki tuŋŋi, ci umo wi godi woko.

³¹ Kit meno en pito jo me rok ducu, kun miyogi cam madwoŋ twatwal.

³² En wiro cine ki mac me lutkot, ci ciko ni myero ocel ka ma gibayo iye,

³³ Mor me kot tito pi Lubaŋa ma nyeko omake ki kiniga pi bal.