Yubu 34 - Acoli Baibul

Eliu owaco ni gin ducu ma Lubaŋa timo tye atir

¹ Eliu dok oloko ni meno,

² “Wuwiny lokka, wun luryeko, wucik itwu ka aloko, wun jo ma wuŋeyo lok;

³ pien dano temo lok ki ite macalo en bilo cam ki doge,

⁴ Wek wayer gin ma tye atir, waniaŋ waŋ kwedwu lok mene ma tye kakare.

⁵ Pien Yubu owaco ni iye leŋ, dok ni Lubaŋa okwero ŋolo koppe atir.

⁶ Owacci, ‘Kadi bed lokka tye atir, pud giwaco ni an lagoba; ret ma giketo i koma pe twero caŋ, kadi bed pe abalo bal mo.’

⁷ Dano mukene twero nen ma cal ki laco man Yubu? En ŋalo Lubaŋa macalo emato pii-gu,

⁸ Omako lurem ki lutim aranyi, dok woto kacel ki jo maraco.

⁹ Pien en owacci, ‘Kony mo pe bot dano me tiyo gin ma yomo cwiny Lubaŋa.’

¹⁰ “Pi meno wuwiny lokka, wun jo ma tye ki niaŋ matut, Lubaŋa pe twero timo gin marac kadi ki acel. Won Twer Ducu pe timo gin mo ma pe tye atir.

¹¹ En culo ki dano ma rom ki kit gin ma en otimo, en timo dano acel acel muporo kit kwone,

¹² Ada, Lubaŋa pe timo gin mo marac, Won Twer Ducu pe ŋolo kop ma pe atir.

¹³ Aŋa ma yam oketo lobo i te locce? Aŋa ma ceŋ oketo lobo ducu i ciŋe?

¹⁴ Kono ceŋ mo en dwoko cwinye cen, kun guro yweyone ducu bote kene,

¹⁵ ci miyo gin makwo ducu to woko lawaŋacel, ci dano dok gire i apwa.

¹⁶ “Ka it ye ki niaŋ matut, ci winy lok-ki mono, cik iti i lok ma awaco-ni,

¹⁷ Ŋat ma dag ŋolo kop atir dok bedo laloc ce? Ŋat ma kite atir, ma won twero bene, dok iwaco ni kite rac?

¹⁸ En mere waco bot kabaka kulu ni, ‘In konnyi pe,’ dok waco bot ladit ni, ‘In i dano marac.’

¹⁹ En pe dworo kor luker, pe paro pi lulonyo maka to pi lucan, pien gin ducu en mucweyogi ki ciŋe.

²⁰ I dakika acel keken gin gito woko cwiny dyewor, en goyo rok mo-ni ci rwenyo woko, dok kobo wa dano matek twatwal woko i kabedone kun ciŋ dano mo pe ogudo.

²¹ “En ciko waŋe pi neno gin ma dano tiyo, ci neno ka ma en cito iye ducu,

²² Pe tye mutu mo nyo piny ma ocido Licuc ka ma Lutim maraco gitwero kanne iye.

²³ Lubaŋa pe ociko kare ki dano mo me cito i nyime wek enol kop i kome,

²⁴ En turo dit pa wegi twer laboŋo niyo lokgi, ci keto jo mukene i wi komgi.

²⁵ Kit meno, macalo en ŋeyo ticgi con, en retogi piny dyewor ci twerogi kec woko,

²⁶ En pwodogi i nyim lwak pi timgi maraco,

²⁷ pien onoŋo gubarre woko ki ka lubo kore, pe doŋ guketo cwinygi ka timo kit ma en mito,

²⁸ Kit meno gumiyo koko pa lucan oo wa bot Lubaŋa, en owinyo koko pa jo ma giunogi,

²⁹ “Ka Lubaŋa obedo mot, aŋa ma waco ni en otimo bal? Ka okano waŋe woko, aŋa ma twero nene, kadi rok mo kadi dano mo?

³⁰ Pe gitwero geŋo dano ma pe lworo Lubaŋa ki i loc, nyo me bedo macalo owic ki bot lwak,

³¹ “Tye dano mo ma owaco bot Lubaŋa ni, ‘Apoto i bal, ento pe dok abitimo gin marac.

³² Gin ma pe aneno, in giri ipwonya; ka yam abalo, pe dok abitimo aye’?

³³ Ki tuŋ boti myero Lubaŋa ocul lakit dano-nu pi balle, in ma idag gin ma Lubaŋa otimo? In myero iyer, ma pe an, Pi meno tit gin ma iŋeyo,

³⁴ Jo maryek ma giniaŋ lok ka guwinyo lokka gibiwaco bota ni,

³⁵ ‘Yubu tye ka lok laboŋo ŋec mo, lokke pe oa ki i ryeko ma odonyo matut.’

³⁶ Kono gibedo ka temo Yubu nakanaka, kono ber, pien en gamo lok macalo jo maraco.

³⁷ En lacerre, pud medde ameda i bal, doŋo ciŋe i kinwu pi nywaro Lubaŋa, dok nyayo lokke me yete.”