Yubu 29 - Acoli Baibul

Yubu opo pi yomcwiny ma yam obedo kwede

¹ Yubu dok omedde ki lokke kun waco ni,

² “Ayaa, kono ceŋ atye kit ma abedo kwede i kare macon ca, i kare ma Lubaŋa obedo ka gwoka!

³ I kare meno tarane obedo ka lyel malo ka wiya, ceŋ pa Lubaŋa obedo ka menya ka awoto i piny macol.

⁴ I kare meno onoŋo atye maber ki lim mabup, mar pa Lubaŋa gwoko kemana;

⁵ Won Twer Ducu onoŋo tye kweda, onoŋo litinona bene gurumo ka ŋeta woko,

⁶ Ka ma acito iye ducu anoŋo cak mabup, anoŋo moo madwoŋ wa i kom yadi ma apito i kin gweŋ,

⁷ I kare ma acito i dog gaŋ ka ma ludoŋo gicokke iye, ka ayubo kabedona i dye gaŋ ka ma giporo iye lok,

⁸ ka awobe gunena ci gudirre woko cen, ludoŋo gua gucuŋ;

⁹ rwodi bene gujuko lokgi woko, guketo ciŋgi i doggi;

¹⁰ dwan ludito olin, lebgi bene omoko woko i dangi.

¹¹ Dano ma winyo lok i koma yam lwona ni lagumkom, ŋat ma onena ki waŋe obedo caden me pwoya:

¹² pien onoŋo yam alaro lucan ka gukok, dok akonyo litino kic ma lukonygi pe.

¹³ Jo ma onoŋo doŋ gicok to giiegga gum, dok amiyo mon ma coggi oto giwero wer pi yomcwiny.

¹⁴ Onoŋo arukke woko ki kit ma atir macalo rukka me kare ducu, anyebbe ki ŋolo kop kakare macalo jor ki tok ma pe rwenyo ki bota.

¹⁵ Yam abedo ma ka waŋ jo ma waŋgi oto, akonyo luŋolo amiyo guwoto ki tyengi.

¹⁶ Yam akonyo lucan macalo gin litinona kikome; kadi dano ma onoŋo pe aŋeyo, ayelle pi cwako pidone.

¹⁷ Alwenyo matek ki lubwami macalo alwenyo ki ŋuu, alaro dano ki botgi macalo alaro ki i dog labwor.

¹⁸ Yam onoŋo atamo ni abito mot i pacona, ma nino me kwona pol ma rom ki kweyo,

¹⁹ ma noŋo arom ki yat ma oyaro Lwite i ŋet pii, ma toyo luk i jaŋe dyewor,

²⁰ kun deyo pe rweny ki bota, dok tekona obedo ka roc odoko nyen.

²¹ “Dano yam winyo lokka, ci gilir; mot, kun gikuro tam ma an aye amiyo botgi.

²² Ka doŋ aloko, pe giloko lok mo, lokka obedo macalo kot ma cwer,

²³ Gibedo ka kuro lokka macalo gikuro poto kot, gigamo tamma macalo gimato kot me cwir.

²⁴ Ka yam abwonyo, pe gitwero ye; ento pe gitwero balo yomcwinya.

²⁵ Yam anyuttigi gin ma myero gutim, kun abedo macalo rwotgi, nyo macalo kabaka ma bedo i dye monnye, dok macalo ŋat ma kweyo cwiny jo ma koko lyel.