Yubu 23 - Acoli Baibul

Yubu mito pido lokke i nyim Lubaŋa

¹ Yubu ogamo kun waco ni meno

² “Tin bene aloko ma iya kec; kadi bed atye ka cur, ciŋe pud nura.

³ Kono ceŋ aŋeyo ka ma atwero noŋe iye, wek ao wa i kabedone!

⁴ Kono ayeko lokka i nyime wek oŋol, anyuto kore kikore ki lok mapol mada,

⁵ miyo aŋeyo gin ma en bigamma, kono aniaŋ gin ma en owaco bota.

⁶ En kono opyem kweda ki twerone madit? Pe kumeno; en kono oketo cwinye ka winya.

⁷ Dano ma kite atir twero pyem kwede ki kunnu, ci laŋolkoppa kono miyo aloyo kop naka.

⁸ “Nen mono, acito anyim, ento pe tye kunnu; adok cen, ento pe anoŋe.

⁹ Ayenye tuŋ acam, ento pe amedo ki nene, alokke tuŋ acuc, pe anene bene.

¹⁰ Ento en noŋo ŋeyo yo ma acito iye; ka en otema, abikatti macalo jabu maleŋ.

¹¹ Abedo ka lubo kore kikome, pe aŋak ka mukene.

¹² Pe adok cen aweko cik ma en ociko; lok ma en owaco akano i cwinya macalo lonyona.

¹³ Ento en pe lokke, aŋa ma twero wiro en? En t iyo gire gin ma iye mito.

¹⁴ Pien en bicobo gin ma en oyubo pira, ki lwak lok macalo meno ma en tye kwede i cwinye.

¹⁵ Pienno koma onyo koyo i nyime, ka atamo, atye ka lworo eno

¹⁶ Lubaŋa omiyo koma obaŋŋe woko, Won Twer Ducu otyeko miyo koma onyo koyo.

¹⁷ Pe colpiny aye orida woko, kadi piny macol licuc ma oumo waŋa.