Yubu 22 - Acoli Baibul

Erifaji owaco ni Yubu obalo bal mapol

¹ Erifaji Lateman dok ogamo ni,

² “Dano twero bedo ki kony bot Lubaŋa? Atikane ŋat ma tye ki ryeko konnye pire kene.

³ Won Twer Ducu cwinye bedo yon ka kiti atir? En noŋo kony mo ka bal mo pe i komi?

⁴ Nyo itamo ni pien ilwore ma miyo en juki, ci donyo kwedi i ŋolo kop?

⁵ Pe tim marac ma itimo aye pol? Balli ka gikke pe.

⁶ Pien imiyo omegeni gijeŋo jamigi nononono, ci ilunyo boŋo woko ki i kom dano iweko gudoŋ munero.

⁷ In ceŋ pe imiyo pii amata bot ŋat mo muol, itwono ŋat ma kec neko woko ki kwon.

⁸ Oteka aye ceŋ obedo won lobo, dano ma gipwoyo aye bedo iye.

⁹ In ceŋ iryemo mon to woko ke ciŋgi noŋo, ceŋ ituro bad litino kic.

¹⁰ Pienne girumi ki owic, lworo onyoŋo komi woko oyotoyot.

¹¹ Dero ceŋ odoko col, pe itwero neno piny, lalele pii omwonyi woko.

¹² “Lubaŋa pe tye wa malo i polo? Nen lakalatwe ma gitye malo kit ma gibor kwede!

¹³ Pi meno iwaco ni, ‘Lubaŋa ŋeyo gin aŋo? Waŋe romo tuco pol mapek pi ŋolo kop?

¹⁴ Pol mucido oboyo kome woko, pi meno en pe twero neno bal. En woto mere wa i dan polo.’

¹⁵ Pud imoko i yo macon ma jo maraco yam gubedo ka lubone-ni?

¹⁶ Ceŋ giceyogi woko ma peya karegi oromo, gutigi pii omolo woko.

¹⁷ Ceŋ guwaco bot Lubaŋa ni, ‘A woko ki botwa,’ doki ni, ‘Gin aŋo ma Won Twer Ducu twero timo i komwa?

¹⁸ Kun en aye ma yam opoŋo odigi ki jami mabeco. Pe atwero ye tam pa jo maraco!

¹⁹ Jo ma kitgi atir gineno ki yomcwiny, jo ma pe ki bal nyero anyera,

²⁰ kun giwaco ni, ‘Lukworwa doŋ gityekogi, jamgi mudoŋ mac owaŋo woko.’

²¹ “Ribbe ki Lubaŋa, ci ibibedo ki kuc; en aye bimiyo gin maber bino boti.

²² Gam pwony ma a i doge, ci iket lokke i cwinyi.

²³ Dwog bot Won Twer Ducu, ci ibed mwol, bol tim ma pe atir woko ka mabor ki i paconi.

²⁴ Bol jabu apwa, Ki jabu me Opir i kin gweŋ laora kulu,

²⁵ wek Won Twer Ducu aye obed jabuni, ki ryal ma pire tek boti.

²⁶ Kumeno cwinyi bibedo yom pi Won Twer Ducu, ibitiŋo waŋi malo bot Lubaŋa.

²⁷ Ibilego en, ci biwinyo legani, ci ibicobo kwoŋŋi bote.

²⁸ Gin ducu ma itamo bicobbe maber, nyimi bibedo leŋ.

²⁹ Pien Lubaŋa dwoko lukwakke piny, ento en laro jo mamwol.

³⁰ En laro dano ma pe tiyo gin marac, ci bilare pi leŋ ciŋi.”