Yubu 21 - Acoli Baibul

Yubu opyem ni jo maraco gibedo maber

¹ Yubu dok ogamo ni meno,

² “Wuwiny lokka maber, meno aye kit ma wubikweyo ki cwinya.

³ Wudi cwinywu, ci abilok, lacen ma doŋ aloko otum, ci wumedde giwu ki nyara.

⁴ Atye ka koko i kom dano bo? Myero adi cwinya piŋo?

⁵ Wunena ci dogwu bitwo woko, wuket ciŋwu i dogwu.

⁶ Ka atamo pire cwinya poto, ci koma onyo koyo woko.

⁷ Piŋo jo maraco gibedo kwo, giri dok tekogi woto ki medde?

⁸ Litinogi doko dito ma lunyodogi pud kwo, likwayogi doŋo kun gineno ki waŋgi.

⁹ Odigi tye ki kuc laboŋo lworo, odoo pa Lubaŋa pe o i komgi.

¹⁰ Twonigi nywal ma pa gikeŋ, dyaŋigi bene pe gibwogo litino abwoga.

¹¹ Litinogi mol calo lwak romi, ka gicito ka tuko.

¹² Giwero ki ajaa ki opuk, ginyuto yomcwinygi ki dwan nyamulere.

¹³ Gityeko kare ki berbedo keken, gimedo ki to ki kuc.

¹⁴ Giwaco ki Lubaŋa ni, A woko ki botwa! Pe wamito ŋeyo yoni.

¹⁵ Won Twer Ducu en aŋa ma myero wati bote? Ka walego en wabinoŋo koni aŋo?’

¹⁶ Nen ya, berbedogi gigi ginoŋo ki ciŋgi kengi. Ento pe atwero ye tam pa jo maraco.

¹⁷ “Tara pa jo maraco gineko woko tyen adi? Can poto i komgi tyen adi? Lubaŋa poko arem botgi pi kini gane tyen adi?

¹⁸ Gibedo macalo reŋ ka ma yamo tero ada? Nyo macalo cuŋ kal ma yamo kot kuto?

¹⁹ Wuwaco ni, ‘Lubaŋa kano can me balgi pi litinogi? Wek ocul botgi gin kikomgi guniaŋ.

²⁰ Wek gunen ki waŋgi ka can poto i komgi, gubil kiniga pa Won Twer Ducu.

²¹ Gin kono giparo aŋo pi likwayogi, ka doŋ gityeko ŋolo wel dwegi woko?

²² Ŋat mo bipwonyo Lubaŋa ki ryeko, kun kono en ŋolo kop pa jo ma gitye malo?

²³ Ŋat man to ma pud kome tek, ma tye maber ki kuc madwoŋ;

²⁴ agulune opoŋ ki cak, i cogone opoŋ ki moo mapwot.

²⁵ Ŋat mukene to ki cwercwiny madwoŋ, ma naka yam pe obilo gin maber.

²⁶ Gibuto kacel i apwa, kwidi poŋ i komgi woko.

²⁷ “Nen, aŋeyo tamwa, ki yubwu me timo gin marac i koma.

²⁸ Pien wuwacci, ‘Ot pa kadit tye kwene? Kema ma yam jo maraco bedo iye tye kwene?

²⁹ Wun pe wubedo ka penyo jo ma giwoto i yo? Pe wuye oŋon ma gobolo botwu,

³⁰ ma nyuto ni dano marac giweke i nino me can, gilare woko i kare me kiniga?

³¹ Aŋa ma twero nyutte kite ka maleŋ? Doki aŋa ma twero cule pi timme marac?

³² Ka gitero kome i bur, dano gikuro lyelle.

³³ Ŋom ma i nota obedo mit bote; jo ducu gilubo kore, lwak jo ma gitelo nyime pa kwanne.

³⁴ Wun dok wubikweyo cwinya niŋniŋ ki lok ma tere pe? Gin mo pe odoŋ i kom lagamwu kono goba keken.”