Yubu 20 - Acoli Baibul

Jopar otito pi gin ma timme i kom jo maraco

¹ Jopar Lanaamat ogamo kit man ni,

² “Pi lok meno tamma odiya, omiya adok iye, pi rucurucu ma atye kwede i cwinya.

³ Awinyo juk ma miya lewic, ento cwiny ma omiya abedo ki niaŋ matut miyo agamo.

⁴ “In pe iŋeyo lok man nia wa con, i kare ma giketo dano i wi lobo,

⁵ ni, kijira pa dano marac winnye pi kare manok, yomcwiny pa dano ma pe lworo Lubaŋa ri pi dakika acel keken?

⁶ Kadi en bor, o wa i polo, kadi wiye gudo pol,

⁷ birwenyo woko matwal macalo cette; jo ma yam gunene gibiwaco ni, ‘En tye kwene?’

⁸ En bilal wo ko macalo lek; gibiryeme woko macalo ginanyuta me dyewor.

⁹ Jo ma yam ginene pe dok gibinene aye, kadi kabedone pe dok binen matwal.

¹⁰ Litinone gibiyenyo kony ki bot lucan, en bidwoko lonyone cen ki ciŋe.

¹¹ Cogo kome tye mupoŋ ki teko me awobine, ento gibiyike kwede i apwa.

¹² “Kadi doge lim pi tim marac, kadi bed en kano i te lebe,

¹³ kadi pe ye ŋulone, kun kano pud bedo kwede i doge,

¹⁴ ento lokke ki i cin iye, doko kec macalo kwir twol.

¹⁵ En mwonyo lim ci noko woko odoco; Lubaŋa cwalo woko ki i iye,

¹⁶ En bidoto kwir twol gola, leb ororo bineke.

¹⁷ En pe bineno kulu mo, laora ma mol kic ki cak lukulu.

¹⁸ En bidwoko gin ma en onoŋo pi ticce matek, pe bimwonyo; magoba ma en olimo pi cato wille, pe bilimo iye yomcwiny mo.

¹⁹ Pien odiyo lucan ci otenyogi woko ata omayo odi ma ceŋ en pe ogerogi.

²⁰ “Pe bigwoko gin mo wacel ma pire mitte, pien iye pe okwe.

²¹ Berbedo pe biri, pien ceŋ pe weko gin mo doŋ ka en camo.

²² I kare ma jamine doŋ nya mapol, piny biloye woko, ciŋ jo ducu ma tye ki can bikemo en,

²³ Lubaŋa bicwalo kinigane malyet i kome, miyo cwer i kome macalo kot ma ka camme, wek oyen kwede likiŋ.

²⁴ En biriŋo gi-lweny me nyonyo, ento atero mola bicele woko pil.

²⁵ Giputo ki tuŋ ŋeye, lebe ma ryeny kato woko ki pig kedane; kome nyonne ki lworo.

²⁶ Lim ma en okano, colpiny malik bibalo woko; mac ma pe dano okuto bityeke woko; biwaŋo wa jami ducu mudoŋ i ode,

²⁷ Polo binyuto balle, lobo bikelo lok me caden i kome.

²⁸ Pii lalele bitero ode woko, bimolo woko i nino me kiniga pa Lubaŋa,

²⁹ Man en aye pok pa dano marac ma a ki bot Lubaŋa, man ginaleya ma Lubaŋa ociko pire.”