Yubu 2 - Acoli Baibul

¹ I nino mo mukene awobe pa Lubaŋa dok gubino gucuŋ i nyim Rwot, ci Catan bene obino i kingi ka cuŋ i nyim Rwot.

² Rwot owaco bot Catan ni, “In ia ki kwene?” Catan ogamo dog Rwot kun wacci, “Aa ka wirre wi lobo, ki ka wot i kin piny i lobo.”

³ Ci Rwot dok owaco bot Catan ni, “Itye ka tamo pi laticca Yubu, ni meno, pe tye ŋat mo macalo en i wi lobo, dano ma pe ki bal mo, dano ma cwinye leŋ, ma lworo Lubaŋa, dok dag tim marac? En pud ocuŋ matek laboŋo bal mo, kadi bed ipiya i kome wek it yeke woko laboŋo tyen lok mo.”

⁴ Catan ogamo dog Rwot kun wacci, “Del pi del! Gin ducu ma dano tye kwede en bimiyo pi kwone.

⁵ Ento tugi keto ciŋi koni, igud cogone ki riŋo kome, ci en yeti ki i nyimi.”

⁶ Ci Rwot owaco bot Catan ni, “Nen, en doŋ tye i tweroni; ento myero igwok kwone keken.”

⁷ Kumeno Catan oa ocito woko ki i nyim Rwot, ocako yelo Yubu ki bur maraco muonyo cakke ki i dye tyene nio kwede wa i cwiny wiye.

⁸ Ci en okwanyo labaltak me cwero kome, ocito obedo i buru.

⁹ Mumiyo dakone owacce ni, “Pud ibicuŋ matek ma pe ibalo bal mo? Yet Lubaŋa, ci ito.”

¹⁰ Ento Yubu ogamo dog dakone ni, “In aye iloko lok macalo mon mamiŋ ma pe giŋeyo Lubaŋa. Wabigamo gin maber ki i cin Lubaŋa, ci pe wagamo gin marac?” I can man ducu Yubu pe obalo ki doge.

¹¹ Ka lurem Yubu adek guwinyo pi gin marac man ducu mubino i kome gubino kun ŋat man a ki i kabedone, Erifaji Lateman, Bildad Lacua ki Jopar Lanaamat. Kumeno gurwatte kacel wek gucinyut cwercwinygi bot Yubu ki kweyo cwinye.

¹² Ci guilo waŋgi ka pud gitye ka mabor, pe guniaŋ maber ka dano ma gineno-nu aye Yubu; ci gucako koko ki dwan maloŋo, guyeco jorgi, gujuko wigi ki ŋom.

¹³ Ci gubedo piny i ŋom guri bote nino abiro dyeceŋ ki dyewor, ŋat mo ma loko kwede pe, pien guneno ni aremme onoŋo dit mada.