Yubu 19 - Acoli Baibul

Yubu pud geno ni Lubaŋa bi miye eloyo kop

¹ Yubu ogamo ni,

² “Wubiyela nio wa awene, kun wukeko ita ki lok?

³ Man doŋ tyen me aparre ma wunala; lewic pe makowu me tima marac kuman?

⁴ Kadi bed doŋ aŋak woko ada, balla pe gik doŋ i koma kena?

⁵ Ka ada wun wunyatte i koma, kun wuwaco ni lewic ma giketo i koma onyuto ni an labal,

⁶ doŋ myero wune ni Lubaŋa aye omiyo lok oloya, ci otweya woko ki obwone,

⁷ Nen, akok ni, ‘Gineka woko do!’ ento pe gigamo doga; adaŋŋe matek, ento ŋat mo pe ma ŋolo koppa atir.

⁸ En ocego yo woko bota, pe atwero kato, oketo colpiny woko i nyima ka ma acito iye ducu.

⁹ Otyeko kwanyo deyo woko ki ikoma, oweka adoŋ noŋo laboŋo dit mo.

¹⁰ Adoko macalo ot ma en omuko woko ma otwomo tunŋi ki tuŋŋi ci arwenyo woko; genna bene en oputo woko macalo oputo yar.

¹¹ Kiniga omake i koma, en tera macalo lakworre.

¹² Monnye gubino i koma kacel, gutoro cel lobo guruma wo ko dyere, gugony gurumo kemana.

¹³ “Opoko omegina woko ka mabor kweda, jo ma cen giŋeya ducu adoko welo ki botgi.

¹⁴ Wadina ki lurema gurwenyo woko;

¹⁵ welo ma i oda doŋ wigi owil woko i koma; aŋecana gibedo kweda calo an a welo ki tun botgi, adoko larok ki i waŋgi.

¹⁶ Ka alwoŋo laticca, en pe gamo doga, an myero abak doga bote.

¹⁷ Yweyo doga odoko rac wa bot dakona, omegina ma litino pa maa gidag ŋwec koma,

¹⁸ Kadi wa litino matino gicaya; ka aa, gin loko lok marac i koma,

¹⁹ Lurema ma giŋeya ducu igi doŋ okwera woko, jo ma yam amarogi doŋ gulokke i koma.

²⁰ Cogona doŋ omakke woko ki del koma ki riŋo koma, anen ki laka keken.

²¹ Kica omakwu i koma ba, wun lurema, pien ciŋ Lubaŋa doŋ otyeko gudo koma,

²² Piŋo wubedo ka una macalo Lubaŋa? Can ma aneno, ki arem koma peya oromowu?

²³ “Lokka ducu kono gicoyo woko cut! Kono cen gicoyo i buk!

²⁴ Kono cen gigoro lokka ki kalam nyonyo i kom pata, gimwono ki nyonyo macol, wek ori matwal.

²⁵ Pien aŋeyo ni Lacunudwarra tye, ci lacen en bicuŋ pira i wi lobo;

²⁶ lacen ka doŋ del koma oballe woko kuman, abineno Lubaŋa laboŋo koma-ni,

²⁷ Abinene kun ocuŋ pira, abinene ki waŋa, pe bibedo welo ki tuŋ bota, Cwinya opoto ni liŋ!

²⁸ Ka wuwaco ni, ‘Wabiryemo kore niŋniŋ?’ dok ni, ‘Te lok kikome onen ki bote”

²⁹ myero wulwor pala lucwan, pien kiniga aye kelo can me to, wek wuŋe ni ŋolo kop tye.”