Yubu 17 - Acoli Baibul

¹ Cwinya doŋ otum, kwona doŋ mito gik woko, lyel doŋ tye ka kura.

² Adada lunywar guruma dyere, abedo ka neno kit ma gikeco kwede i koma.

³ “In kikomi myero icuŋ pira i nyimi keni, ai Lubaŋa; pien aŋa ma dok twero mine me cuŋ pira?

⁴ Macalo doŋ imiyo gukwero yabo tamgi wo ko wek guniaŋ lok, pienno pe ibiye ni guloya.

⁵ Ŋat ma tero lok roro i kom lawote wek enoŋ dul me limgi, piny biloyo litinone.

⁶ “En omiyo nyiŋa odoko lok aboka pa lwak; adoko ŋat ma jo giŋule ki laa.

⁷ Waŋa doŋ ocido woko pi kumo, dul koma ducu ojony woko likaŋ.

⁸ Pi meno jo ma cwinygi atir giuro ki jwat, ci dano ma pe ki bal cako mwomme i kom ŋat ma pe lworo Lubaŋa.

⁹ Ŋat ma kite atir pud medde ki kite macon, ŋat ma cwinye leŋ tekke medde ameda.

¹⁰ Ento wun dok wubin, wun ducu, ci pe abinoŋo dano mo maryek i kinwu.

¹¹ Karena doŋ okatu, lok ma yam ayubo doŋ otur woko, en aye lok ma yam cwinya tye iye twatwal.

¹² Guloko wor odoko dyeceŋ, kun giwacci, ‘Der ceŋ cok ki piny macol.’

¹³ Akuro doŋ lyel wek obed oda, wek apet kabutona i piny macol.

¹⁴ Bur lyel doŋ alwoŋo ni wora, kwidi ma bicamo koma alwoŋo ni maa, nyo lamera.

¹⁵ Gen mera kono dok tye kwene kaa? Aŋa ma dok neno gin maber ma myero akur?

¹⁶ En bicito kweda wa i lyel? Wan wabilor kwede kacel i apwa ?”