Yubu 16 - Acoli Baibul

Yubu okok pi gin ma Lubaŋa otimo i kome

¹ Yubu ogamo ni meno,

² “Atyeko winyo lok mapol ma rom ki meno; wun ducu wun lukwecwiny ma kela ayela keken,

³ Lok ma obedo yamo noŋo ka gikke pe? Aŋo ma oŋeto ii, omiyo igamo doga?

⁴ An bene ceŋ atwero loko macalo wun, kono ceŋ wubedo ki kit ma rom ki mera-ni; an onoŋo ceŋ atwero rwado lok pi jukowu, kun ayeŋo wiya botwu,

⁵ Cen atwero jiŋo cwinywu ki lokka, ki kweyo aremwu ki mit doga,

⁶ “Ka an aloko-ni arem koma pe okwe; ci ka aliŋ woko, pe dok cen.

⁷ Adada, Lubaŋa koni doŋ oolo koma woko, oruto jona woko ducu,

⁸ En doŋ otyeko maka woko, ci odoko caden me nyuto balla; jony me koma odoko macalo lakworra, ma loko lok me caden i nyima.

⁹ Iye okwera, otima malit macalo labwor ma kido kom lee, okayo lake woko i koma ki kiniga, lamonena gaya ki waŋe macalo ŋat ma pako toŋŋe me neko dano,

¹⁰ Jo guŋamo doggi i koma, gudoŋo lema me anywar, gudille i koma likiŋ.

¹¹ Lubaŋa doŋ omiya i ciŋ jo ma kitgi pe atir, obola i ciŋ jo maraco.

¹² Onoŋo abedo mot mupye, ci onyono koma woko, omaka ki ŋuta, oŋinya matitino. Obedo ka baya ki toŋŋe

¹³ wegi atumme guruma dyere. Otuco olaŋa pil, laboŋo kica, ooyo pig kedana i ŋom,

¹⁴ Oketo can i koma teretere macalo lamony ma bedo ka riŋo i kom ot pi mu kone woko.

¹⁵ Akwoyo boŋo gunia me arukana, tekona ducu doŋ obuto i apwa.

¹⁶ Waŋa doŋ obok ki koko, del waŋa ocido macol licuc,

¹⁷ kadi bed pe atimo gin mo me bwami, dok kadi legana bal mo pe iye,

¹⁸ “In lobo, pe ium remona, ci wek kokona pe onoŋ kabedo me yweyo.

¹⁹ Kadi koni, nen, cadenna tye i wi polo, cadenna tye malo.

²⁰ Lurema gicaya, ento pig waŋa cwer kun akok kwede bot Lubaŋa,

²¹ ni kono en olar lok pa dano i nyim Lubaŋa, macalo dano laro lok kun cuŋ pi lawote.

²² Pien ka mwaka man ok doŋ okato, abicito ka ma pe doŋ abidwogo ki iye.