Yubu 14 - Acoli Baibul

Lok pa Yubu i kom kwo me lobo man ma bitum woko oyot

¹ “Dano ma dako onywalo nino me kwone nok, opoŋ ki ayelayela.

² En bi no calo ature ci ner woko oyot; en rwenyo calo tipo, pe ri nakanaka,

³ Ci in dok iciko waŋi i kom ŋat macalo meno, ikela i nyimi wek inolla kop?

⁴ Aŋa ma twero kelo gin maleŋ ki kom gin ma pe leŋ? Pe tye ŋat mo wacel.

⁵ Gityeko ŋolo wei nino me kwone, in iŋeyo wel dwe ma imiye; ityeko nyuto ka ma kwone bigik iye pe dok kato,

⁶ Lok waŋi inen ceŋ, wek en obedi, wek otyek ninone ki kuc macalo latic pi mucara.

⁷ “Dano twero bedo ki gen pi yat, ni meno ka gireto piny ci dok binyuro, pud dok bilot aye.

⁸ Kadi Lwite ori oteggi i lobo, kadi ajutte yam oto la i nom,

⁹ ento tekke pii tye bicwico woko, bolo jaŋe calo yat ma pud gipito apita.

¹⁰ Ento dano to mere ci pe doŋ a malo; kwone gik woko, ci en doŋ tye kwene?

¹¹ Macalo pii tum wo ko ki i nam, ki kulu dwoŋ two woko,

¹² kumeno dano bene buto piny ci pe dok a; en pe dok bico nio waŋ ma polo doŋ pe, pe bico ki i waŋ ninone.

¹³ Kono do ikana i lyel, kono ikana waŋ ma kinigani doŋ okato! Kono icikka kare wek ipo pira doki!

¹⁴ Ka dano doŋ oto, pud dok bibedo kwo? Kono icikka kare, kono atyeko kare me waŋ ticca ducu, kun akuro nino ma myero gigonya iye.

¹⁵ Ka lacen ibilwona, ci abigamo dogi; pira bibedo mitti mada, pien in aye iketo an,

¹⁶ Lacen ibineno ka ma acito iye ducu, ento pe ibikiya pi neno balla;

¹⁷ ibitweyo balla woko i kicaa, ibiumo wi rocca ducu.

¹⁸ “Ento got madit poto ci nidde woko, pata gikobo woko ki i kakare.

¹⁹ Pii mudo gweŋ woko, kot ma cwer matek molo lobo woko; in bene ityeko gen pa dano woko kit meno.

²⁰ In ibwoye woko matwal, ci en cito gire; imiyo waŋe lokke, ci iryeme woko.

²¹ Litinone ginoŋo deyo, ci en pe ŋeyo; gidwokogi piny, ci en pe niaŋ gin mo iye.

²² En bedo ka winyo mere arem me kome keken, en koko cwercwiny ma mere kene,” ne,”