Yubu 12 - Acoli Baibul

Yubu oloko i kom twero ki ryeko pa Lubaŋa

¹ Yubu ogamo ni meno,

² “Adada wun jo ma tye ki ŋec, ka wuto, ryeko bene birwenyo woko,

³ Ento an aniaŋ lok bene macalo wun, wun pe wuloya wacel. Aŋa ma pe ŋeyo lok macalo magi?

⁴ Adoko gin anyera bot lurema; an ma ceŋ alwoŋo Lubaŋa ci en gamo doga, an ma kita atir, ma bal mo pe i koma, adoko gin anyera.

⁵ Lagumkom cayo ŋat ma kome kec, en mito goyo jo ma tyengi ocer,

⁶ Kema pa luyak tye ki kuc; jo ma miyo kiniga mako Lubaŋa gibedo mot mupye, gin jo ma guloko tekgi odoko lubaŋagi.

⁷ “Peny wa bot lee, ci gibipwonyi; peny winyo me polo, ci gibitittr,

⁸ Gin ma lak alaka i nom gibipwonyi; rec me nam bene gibitucone boti.

⁹ Aŋa i kin magi ducu ma kwiya ni ciŋ Rwot aye otiyo man?

¹⁰ Tipo pa gin makwo ducu tye i ciŋe, dano acel acel mato yamo pi twerone,

¹¹ It dano pe ye lok ducu, ento bilo abila, macalo dano bilo cam ki lebe.

¹² Ryeko bedo bot jo muti, ri i wi lobo miyo dano niaŋ i te lok mapol.

¹³ Lubaŋa tye ki ryeko dok ki twer; en tye ki tam matut ki twer me cobone.

¹⁴ Ka en omuko ot, ŋat mo pe dok gero odoco; ka en oloro wi dano, ŋat mo pe dok yabo,

¹⁵ Ka en ojuko kot pe cwer, ci lobo two woko; ka en cwalo pii, ci corre i wi lobo.

¹⁶ En tye ki teko ki ryeko me cobo ticce; laŋak dano ki ŋat ma giŋako gin ducu mere,

¹⁷ En tero lumi-tam woko munero, en loko luŋolkop doko lumino,

¹⁸ En gonyo jo ma luker gutweyo ki i buc, ci tweyo dura i pyer luker macalo opii.

¹⁹ En tero ajwagine woko munero, ci miyo wegi twer poto.

²⁰ En twoyo dog jo ma yam gigenogi, ci miyo gikwiya poko gin maber ki gin marac,

²¹ En miyodano gicayo rwodi, dok geŋo wegi twer i tiyo ticgi,

²² En yabo muŋ ma gikanne i piny macol, ci kela piny macol licuc i der ceŋ.

²³ En miyo rok mo-ni doko madit, ka dok tyeko woko; miyo rok mukene nyayo locce, ka dok tenyo woko ata.

²⁴ En kwanyo ryeko woko ki bot lutel wi lwak, miyo gimal ata i tim ka ma yo pe iye.

²⁵ Gin leyo piny i colpiny laboŋo der ceŋ; miyo gicatte macalo lamero.