Yubu 11 - Acoli Baibul

Jopar odoto Yubu pi bal

¹ Jopar ma Lanaamat ogamo ni meno,

² “Lwak lok mapol ma rom meno pe gigamo ce? Lalok mada aye ma lokke tye atir?

³ Dog dano myero otwo woko pi lokki ma tere pe-ni? Iloko lok me ŋala, ci dano mo pe bimaki ki lewic?

⁴ Pien iwaco ni, ‘Pwonnya tye maleŋ, i waŋ Lubaŋa balla pe.’

⁵ Ento kono Lubaŋa oloko lok mo, kono oŋamo doge boti!

⁶ En kono oyabo boti muŋ mapol me ryekone, pien tim mua ki i ryekone bedo me aura, Koŋ iŋe ni can ma Lubaŋa oketo i komi pe oporo balli ducu.

⁷ “In itwero niaŋ ryeko ki dit pa Lubaŋa? Itwero noŋo ka ma twer pa Won Twer Ducu gik iye?

⁸ Tye malo kato polo, in itwero timo gin aŋo? Tut makato lyel, in iŋeyo iye gin aŋo?

⁹ Bor makato lobo ducu, lac makato nam.

¹⁰ Ka en obino ci omako dano, ce olwoŋe i nyim kop, aŋa ma twero juke?

¹¹ En ŋeyo jo ma pe gigenne; ka oneno bal, pe keto iye cwinye?

¹² Ento dano ma lamiŋ binono ryeko, ka kana me tim onywalo dano,

¹³ “Kono ibedo ki cwiny maber, kono itaŋo ciŋi bote!

¹⁴ Ka yam itimo tim marac, pe doŋ igudi; pe iwek jo ma i odi gutim gin mo marac.

¹⁵ Atika doŋ ibitiŋo waŋi malo kun bal mo pe i komi; ibicuŋ matek, pe ibilworo.

¹⁶ Wii biwil i kom canni; bibedo boti mucalo pii ma doŋ omol orwenyo woko.

¹⁷ Kwoni bibedo ka maleŋ makato cwiny dyeceŋ; kadi bed itye i piny macol bibedo macalo rupiny,

¹⁸ In doŋ ibibedo ma cwinyi opye, kun iŋeyo ni nyimi leŋ; ibiywe mot ki kuc kun Lubaŋa tye ka gwoki,

¹⁹ Ibibuto piny, ci ŋat mo pe bimiyi lworo; jo mapol gibibino boti wek ginoŋ gum ki boti.

²⁰ Ento piny biloyo jo maraco matwal; pe gibinoŋo ka kanne, gibiparo pi to keken.”