Yubu 1 - Acoli Baibul

Omo cwiny Yubu

¹ Yam tye dano mo ma i lobo Uj ma nyiŋe Yubu. Dano man onoŋo pe ki bal mo, dok dano ma cwinye leŋ; en lalwor Lubaŋa, ma dag tim marac.

² En onywalo awobe abiro ki anyira adek.

³ Lim ma yam tye bote obedo romi ki dyegi alip abiro, kinaga alip adek, twoni pur alip acel, megi kana miya abic, kacel ki lwak luticce mapol mada; en obedo dano madit makato jo ducu ma yo tuŋ wokceŋ.

⁴ A wobene yam gimaro cito ka camo karama i ot pa ŋat acel acel i ninone; ci gicwalo kwena gilwoŋo nyimegigi adek-ki ka cam ki ka mat kwedgi,

⁵ Ka kare me karamagi otum, ci Yubu yam cwalo kwena, Iwoŋogi ci lonyogi. En a malo odiko con, tyero gitum awaŋa muporo welgi ducu, pien Yubu noŋo tamo ni, gwok nyo awobene gubalo, pi yeto Lubaŋa la i cwinygi. Yubu yam timo kit meno jwijwi.

⁶ I nino mo acel awobe pa Lubaŋa gubino gucuŋ i nyim Rwot, ci Catan bene obino i kingi.

⁷ Rwot owaco bot Catan ni, “In ia ki kwene?” Catan ogamo dog Rwot kun wacci, “An aa ka wirre wi lobo, ki ka wot i kin piny i lobo.”

⁸ Ci Rwot dok owaco bot Catan ni. “Itamo pi maticca Yubu ni meno pe tye ŋat mo macalo en i wi lobo, dano ma pe ki bal mo, dano ma cwinye atir, ma lworo Lubaŋa, dok dag tim marac?”

⁹ Catan ogamo dog Rwot kun wacci, “tamo ni Yubu lworo Lubaŋa noŋo?

¹⁰ Pe in aye irumo kome ki cel, ki ode, ki gin ducu ma en tye kwede, tuŋŋi ki tuŋŋi? In imiyo gum i kom tic me ciŋe, limme bene omedde i lobo.

¹¹ Ento tugi keto ciŋi cut koni, igud gin ducu ma en tye kwede, ci en yeti ki i nyimi,”

¹² Ci Rwot owaco bot Catan ni, “Nen, gin ducu ma en tye kwede tye i tweroni; kono nyo i kom en keken aye pe iket ciŋi.” Kumeno Catan oa ocito woko ki i nyim Rwot.

¹³ Onoŋo tye nino mo ma awobe ki anyira pa Yubu gubedo ka cam ki ka mato koŋo vino i ot pa omingi maditte;

¹⁴ ci fakwena mo obino bot Yubu ma wacci, “I kare ma twoni gitye ka pur, ki kana bene gicamo ka ŋetgi,

¹⁵ ci jo Ceba gupoto i komgi, guyakogi, guneko lukwat woko ki pala lucwan: ci an kena aye abwot me bino ka titti.”

¹⁶ Ka onoŋo pud tye ka lok, ŋat mukene dok obino ma wacci, “Mac pa Lubaŋa oa ki i polo, ci owaŋo romi ki lukwat, otyekogi woko ducu; ci an kena aye abwot me bino ka titti.”

¹⁷ Ka onoŋo en pud tye ka lok, ŋat mukene dok obino ma wacci, “Jo Kaldaya gupokke i buca adek, ci guturre i kom kinaga, guyakogi, ci guneko lukwat ki pala lucwan; ci an kena aye abwot me bino ka titti.”

¹⁸ Ka en pud tye ka lok, ŋat mukene dok obino ma wacci, “Awobeni ki anyirani onoŋo gitye ka cam ki ka mato koŋo yino i ot pa omingi maditte,

¹⁹ ci nen, yamo madit obino, oŋolle ki tuŋ tim, oyoko twok ot aŋwen, ot opoto i kom litino omiyo guto; ci an kena aye abwot me bino ka titti.”

²⁰ Yubu oa malo, oyeco jorre, olyelo wiye, opoto piny i ŋom, oworo Lubaua.

²¹ Ci owaco ni, “Yam abino noŋo nia ki i i maa, dok abidok bene noŋo. Rwot ceŋ omiyo, ci Rwot otyeko kwanyo gire; gipwo nyiŋ Rwot.”

²² I kom lok man ducu, Yubu pe obalo, pe owaco ni Lubaŋa otimo rac.