Yona 4 - Acoli Baibul

Kiniga pa Yona ki kica pa Lubaŋa

¹ Ento man owaŋo i Yona matek, omiyo kiniga omake.

² Ci Yona olego Rwot, kun owacci, “Akwayi, in Rwot, man pe en aye gin ma nene awaco i kare ma onoŋo pud atye i lobona? Meno en aye gin mumiyo alwi woko oyotoyot me cito Tarcic; pien aŋeyo ni in Lubaŋa ma latim kica, ma timo kica bot dano, kiniga pe maki oyot, mar meri dwoŋ ma pe lokke, dok ijuko cwinyi i tim marac.

³ Koni doŋ in Rwot, kwany kwona woko ki i koma, akwayi, pien bedo ber ka ata kato ma abedo kwo.”

⁴ Ci Rwot ogamo ni, “itamo ni ber me bedo ki kiniga?”

⁵ Lacen Yona oa woko ki i Nineve, ci ocito obedo koŋ wokceŋ me gaŋ; kunnu otiyo iye bolo pire kene. En obedo piny i tipo i te bolone, wek koŋ enen gin ma bitimme i kom gaŋ.

⁶ Ka dok Lubaŋa omiyo keno otwi odoŋo olak ka wi Yona, wek tipone ogen ka wiye, pi kweyo cwinye i canne. Kumeno Yona cwinye obedo yom twatwal pi keno-nu.

⁷ Ento ka piny oru nino mukene, Lubaŋa omiyo kwidi ocobo keno-nu, ci oner woko.

⁸ I kare ma cen doŋ otuc, Lubaŋa omiyo yamo malyet okodo twatwal ki koŋ wokceŋ, ci ceŋ owaŋo wi Yona nio ka kome oloc woko; omiyo Yona okwayo ni twora eto, kun wacci, “Bedo ber ka ata kato ma abedo kwo.”

⁹ Ento Lubaŋa odok iye ki Yona ni, “Hamo ni ber me bedo ki kiniga pi keno-nu?” Yona ogamo ni, “Atamo ni ber me bedo ki kiniga, kiniga ma romma to.”

¹⁰ Rwot dok owaco ni, “Kica omaki i kom keno ma in pe itiyo tic mo pire-ni, in ma pe imiyo odoŋo, ma otwi i dyewor acel ka dok oto woko i dyewor acel.

¹¹ An pe myero kica omaka pi Nineve ma en gaŋ madit, ma tye iye jo makato alip miya acel ki pyeraryo ma pe giŋeyo poko kin ciŋgi ma lacuc ki ma lacam, ki dok bene dyaŋi mapolgu?”