Yona 3 - Acoli Baibul

Ŋut pa jo Nineve

¹ Lacen lok pa Rwot dok obino bot Yona pi tyen me aryone, ma wacci,

² “A icit Nineve ma en gaŋ madit, itit iye lok ma aciki pire.”

³ Yona oa ocito Nineve, kit macalo Rwot owacce. Nineve onoŋo gaŋ madit twatwal, ma ŋolo dyere ari keken teri wot me nino adek.

⁴ Yona ocako donyo i gaŋ, oterre wot me nino acel. Ka odaŋ;mŋe ni, “Odoŋ nino pyeraŋwen, Nineve gibiketo woko.”

⁵ Ci jo me Nineve guye Lubaŋa; guciko bene pi kare me ri kec, kun giruko boŋo cola, cakke ki i kom jo madoŋo, o kwede wa i kom jo matino.

⁶ Ka lok oo bot kabaka me Nineve, ci en oa malo ki i wi komkerre, ogonyo jorre ki i kome, oruko boŋo cola ka obedo kwede i buru.

⁷ Dok omiyo lok oket i dye Nineve ducu ni, “Pi cik pa kabaka ki luditone: Pe dano mo, kadi lee, kadi dyaŋ, kadi romo, obil gin mo; pe gucam, dok pe gumat pii.

⁸ Ento wek dano ki lee giumgi ki boŋo cola, wek gukok matek bot Lubaŋa; iyo, wek ŋat acel acel olokke owek kit marac-ci, ki bene tim me yak ma en bedo ka timone.

⁹ Aŋa ma ŋeyo ka Lubaŋa bijuko cwinye, bilokke weko kinigane mager-ri, wek pe wato?”

¹⁰ Ka Lubaŋa oneno gin ma gutiyo, kit ma gulokke kwede, guweko tim megi marac, Lubaŋa ojuko cwinye i kom gin marac ma onoŋo nene en owaco ni ebitimo i komgi, ci pe doŋ otiyo.