Yona 1 - Acoli Baibul

Yona oriŋo wako ki bot Rwot

¹ Lok pa Rwot cen obino bot Yona wod pa Amittai, kun wacci,

² “A, icit Nineve, ma en gaŋ madit, itit lok i kom jone, pi tim megi marac ma doŋ otyeko ŋene wa bota.”

³ Ento Yona oa me lwi woko ki i nyim Rwot pi wot Tarcic. En ocito i Jopa ka onoŋo mel ma cito Tarcic; ci oculo lim ma mitte pi wot, odonyo i mel, me cito kwedgi Tarcic, wek ca woko ki i nyim Rwot.

⁴ Ento Rwot ocwalo yamo madwoŋ twatwal i nam, omiyo pii me nam otagge matek twatwal, ma mel onoŋo doŋ cok tur woko.

⁵ Cutcut lukwaŋ mel gudoko lwor, omiyo dano acel acel ocako kok bot lubaŋane, kun gibolo jami ma onoŋo tye i mel woko i nam, wek mel odon mayot. Ento Yona ocito mere wa i gul mel, obuto piny kunnu, ci onino matek.

⁶ Ladit me mel obino bote ocako penye ni, “itamo gin aŋo, in lanino-ni? A malo, ileg lubaŋani! Gwok nyo lubaŋani bitamo piwa miyo pe wato.”

⁷ Ci guloko kekengi kun giwacci, “Koŋ wabolu kwir, wek waŋe aŋa ma oweko gin marac man opoto i komwa.” Gubolo kwir, ci kwir opoto i kom Yona.

⁸ Guwacce ni, “Tittiwa, aŋa ma oweko gin marac man opoto i komwa? Ticci tic aŋo? la ki kwene? Loboni gilwoŋo nino? In dano me rok mene?”

⁹ En ogamo doggi ni, “An Laibru; alworo Rwot Lubaŋa me polo, ma oketo nam ki lobo.”

¹⁰ Ci lworo omako jo-nu matek, omiyo gupenye ni, “Man gin aŋo ma itimoni?” Pien jo-nu onoŋo guŋeyo ni en tye ka lwi woko ki i nyim Rwot, pien onoŋo koŋ otittigi.

¹¹ Dok guwacce ni, “Watim gin aŋo i komi, wek nam ojukke okwe mot piwa ?” Pien nam onoŋo tiŋŋe medde ameda.

¹² En ogamo doggi ni, “Wutiŋja, wubola woko i nam, ka wek nam okwepiwu; pien aŋeyo ni tagge me nam man matek twatwal-li obino i komwu pi an,”

¹³ Kadi bed kumeno jo-nu gukwaŋo mel matek me dok cen i wi tera, ento pe gutwero, pien tagge me nam obedo ka medde ameda i komgi.

¹⁴ Pi meno omiyo gukok bot Rwot kun giwaco ni, “Wabako dogwa boti, in Rwot, pe iwek wato ka waneko laco man, pe imi temo pa ŋat ma pe ki bal odok i wiwa; pien in Rwot doŋ ityeko timo kit macalo imito.”

¹⁵ Kumeno gutiŋo Yona, ci gubole woko i nam, omiyo tagge me nam otuggi kwe woko.

¹⁶ Omiyo jo-nu gulworo Rwot twatwal; dok gumiyo gitum bot Rwot kun gikwoŋo kwoŋ.

¹⁷ Rwot omiyo rec madit omwonyo Yona woko i iye; ci Yona ori i i rec meno pi nino adek dyeceŋ ki dyewor.