Yocwa 9 - Acoli Baibul

Bwola pa jo Gibeon,

¹ Ka luker ducu ma nene gitye loka Jordan i lobo godi ki i lobo ma i pwor ma orabo ŋet Nam Madit mukemo Lebanon, ki jo Kit, jo Amor, jo Kanaan, jo Periji, jo Kiv ki jo Jebuc guwinyo lok man,

² gucokke kacel pi lweny i kom Yocwa ki jo Icrael.

³ Ento ka jo ma gibedo i Gibeon guwinyo gin ma Yocwa otimo i kom Jeriko ki i kom Ai,

⁴ ci gin ki tuŋ botgi gutiyo ki ryeko mamalo mada. Guyubo peke me wot ki kicaa muti me atweya i wi kanagi, ki opiru kono ma guti woko, ma oyec atata ma gidabogi bene,

⁵ ki war tyengi muti ma gidabogi, ki boŋŋi arukagi muti woko; ki pekegi ducu obedo mutwo woko, opuro woko bene,

⁶ Gucito kwede bot Yocwa i gony ma i Gilgal, ci guwaco bot Yocwa ki bot jo Icrael ni, “Wan wabino ma waa ki i lobo mabor; pienno walegi ni icikke kwedwa kombeddi.”

⁷ Ento jo Icrael guwaco bot jo Kiv ni, “Gwok nyo wubedo i kinwa, ci dok watwero cikke kwedwu niŋniŋ?”

⁸ Guwaco bot Yocwa ni, “Wan doŋ luticci.” Ci Yocwa openyogi ni, “Wun kono wu jo kwene kaa? Dok bene wua ki kwene mono?”

⁹ Gugamo doge ni, “Wan waa ki i lobo mabor mada, ladit, pi nyiŋ Rwot Lubaŋawu ma wawinyo gitito pire, ki pi gin ducu ma yam otimo i lobo Ejipt,

¹⁰ ki pi gin ducu ma en otimo i kom luker aryo pa jo Amor ma yam gitye loka Jordan ca, Cikon kabaka me Kecbon ki Og kabaka me Bacan ma yam bedo i Acitarot.

¹¹ Ci ludoŋowa ki jo ducu ma gibedo i lobowa guwaco botwa ni, ‘Wumak peke me wot i ciŋwu wek wucirwatte kwedgi, ci wuwac botgi ni, Wan luticwu, wek doŋ wacikke kwedwu.’

¹² Kwonwa ene; wakwanyo ma onoŋo pud lyet i kare ma wa-a ki pacowa me acama i yo i nino ma wacako bino botwu-ni, ento kombeddi, nen, tye ma doŋ otwo dok opuro woko bene.

¹³ Wa opiru koŋo vino ducu onoŋo pud ginyen i kare ma wapiko koŋo vino i igi-ni; doŋ wunen ba ka guyec woko. Ki ginarukawa ki war mewa doŋ guti woko pi wot man mabor-ri.’

¹⁴ Ludito gugamo pekegi gucamo, ma pe koŋ gupenyo dog Rwot.

¹⁵ Ci Yocwa oturo ki yubo lok me kuc i kingi, ocikke kwedgi pi wekogi makwo; lutel wi lwak bene gukwoŋo kwoŋ botgi.

¹⁶ Ka nino okato adek nia ki i kom nino ma gucikke kwedgi, lacen guwinyo ni jo-nu gitye kacel kwedgi kun gibedo i dyegi.

¹⁷ Jo Icrael gucako wot ci guo i gaŋgi i nino me adekke. Gunoŋo gaŋ magi, Gibeon, Kepira, Beeroth ki Kiriat-jearim,

¹⁸ Ento jo Icrael pe doŋ gunekogi, pien lutel wi lwak onoŋo doŋ gutyeko kwoŋe botgi i nyiŋ Rwot, Lubaŋa pa Icrael. Ci lwak ducu gucako ŋur i kom lutel wi lwak-ki.

¹⁹ Ento lutel wi lwak ducu guwaco bot lwak ducu ni, “Watyeko doŋ kwoŋo kwoŋ botgi i nyiŋ Rwot, Lubaŋa pa Icrael, pienno kombeddi pe doŋ watwero gudo komgi.

²⁰ Doŋ wabitimogi kit man; wabiwekogi gubed makwo wek pe wakel kiniga pa Lubaŋa i komwa pi kwoŋ ma doŋ wakwoŋo botgi-ni.”

²¹ Ci guwaco bot lwak ni, “Wuwek gubed makwo, ento gibibedo lubar yen ki lutwom pii pi lwak ducu.’

²² Yocwa olwoŋogi ci owaco botgi ni, “Piŋo wubwola kun wuwaco ni, ‘Wan watye ka mabor kwedwu,’ kun kono wutye i dyewa?

²³ Pienno kombeddi doŋ gicenowu woko; pi kare ducu wubibedo opii, lubar yen ki lutwom pii i ot pa Lubaŋana.”

²⁴ Gugamo dog Yocwa ni, “Pien onoŋo doŋ gitito botwa lok me ada, ladit, ni Rwot Lubaŋa yam ociko laticce Moses pi miyowu lobo man ducu, dok ociko ni myero wujwer jo ma gibedo i lobo man woko ki i nyimwu; omiyo walworowu matek twatwal, en aye omiyo watimo man pi laro kwowa.

²⁵ Ci doŋ kombeddi in aye doŋ inen giri. Doŋ watye i ciŋi, in doŋ itim gin ma ineno ni ber dok oporre me atima i komwa.’

²⁶ Otimogi kit man, olarogi ki i ciŋ jo Icrael, pe ginekogi.

²⁷ Ento cakke i nino meno Yocwa oketogi me bedo lubar yen ki lutwom pii pi lwak ki pi keno tyer pa Rwot, medde kwede o wa i kare man, i kabedo ma Rwot biyero.