Yocwa 8 - Acoli Baibul

Jo Icrael gumako Ai

¹ Rwot owaco bot Yocwa ni, “Pe ilwor, cwinyi pe opoti. Ter jo ma lulweny ducu kacel kwedi, doŋ wutugi a, wucit wa i Ai. Nen, doŋ atyeko miyo kabaka me Ai i ciŋi, ki lwakke ducu ki gaŋŋe ki lobone.

² Ibitimo Ai ki kabakane kit macalo itimo i kom Jeriko ki kabakane-ni; ento jamine ma giyako, ki limme makwo, wubitero bedo mewu, Mi dano gubut gukanne i ŋet gaŋ yo tuŋ ŋeye.”

³ Yocwa oa malo ki jo ma lulweny ducu pi cito ka lweny i kom Ai. Oyero twoni matego ma oteka lweny alip pyeradek ci ocwalogi ki i dyewor.

⁴ Ocikogi ni, “Wubibuto wukanne i ŋet gaŋ yo tuŋ ŋeye, Pe wucit ka mabor ki gaŋ, ento wun ducu wubed ma wuterre,

⁵ ci an ki jo ducu ma gitye kweda wabinyiko cok ki gaŋ, Ka ce jo kunnu gubino woko ka lweny i komwa, ci wan wabiriŋo woko ki i nyimgi,

⁶ miyo gin gibibino woko ka ryemo korwa nio ka gin ducu gukato woko ki i gaŋ, pien gibitamo ni wariŋo woko ki i nyimgi kit ma yam watimo-ni, Ka wan watye ka riŋo woko ki i nyimgi,

⁷ wun doŋ wubia malo ki ka ma wubuto wukanne iye-ni, ci wutugi mako gaŋ woko cut, pien Rwot Lubaŋawu bimiyo i ciŋwu,

⁸ Ka doŋ wutyeko mako, wubiwaŋo woko ki mac; kit meno wubicobo gin ma Rwot ociko. Nen, doŋ acikowu en.”

⁹ Yocwa ocwalogi woko kit meno, ci guwoto ka ma gicikanne iye-ni, Gubuto i kin Betel ki Ai, i ŋet Ai yo tuŋ potoceŋ; ento Yocwa obuto kacel ki lwak i dyewor meno.

¹⁰ Odiko con Yocwa oa malo ocoko mony, ocako cito i nyim jo Ai kacel ki ludoŋo pa Icrael.

¹¹ Jo ma lulweny ducu ma gitye kwede gucito gunyiko cok ki gaŋ, gutoŋo gony i ŋet Ai yo tuŋ acam, kun nota tye i kingi ki Ai.

¹² Yocwa otero dano ma romo alip abic oketogi gubuto gukanne i kin Betel ki Ai i ŋet Ai yo tuŋ potoceŋ.

¹³ Guketo mony i kabedogi kit meno kun gony madit tye i nyim gaŋ yo tuŋ acam ki dul mukanne tye i ŋe gaŋ yo tun potoceŋ. Yocwa obuto i nota i dyewor meno.

¹⁴ Ka kabaka me Ai oneno man, ci en ki lwakke ducu, dano me gaŋ meno, gurune gucito gulor piny odiko con i luŋ mukemo Araba ka lweny i kom jo Icrael; ento kabaka pe ŋeyo ni jo mogo gubuto gukanne woko i ŋe gaŋ,

¹⁵ Yocwa ki jo Icrael guporo ŋwec ki i nyimgi ni doŋ giryemogi woko, kun giriŋo gidok yo tuŋ tim,

¹⁶ Gilwoŋo dano ducu ma i gaŋ gucokke kacel ka lubo korgi, ka guryemo kor Yocwa gucito ka mabor ki gaŋ.

¹⁷ Dano acel mo pe odoŋ i Ai nyo i Betel ma pe okato woko i kor jo Icrael. Gubwoto dog gaŋ odoŋ ma twolo pi ryemo kor jo Icrael.

¹⁸ Ka doŋ Rwot ociko Yocwa ni, “Tir toŋ alwiro ma tye i ciŋi-ni malo, ikem ki Ai, pien abimiyo woko i ciŋi.” Yocwa otiro toŋ alwiro ma tye i ciŋe-ni malo, okemo ki gaŋ.

¹⁹ Oyotoyot jo ma gukanne-ni gua malo ki i kabedogi tekke Yocwa oryeyo cine malo, ci gutwarre guriŋo gudonyo i gaŋ, gumako woko, ka gurune gucwinyo mac me wano gaŋ woko.

²⁰ Ka jo Ai guneno yo ŋegi, ci nen, yito mac ma waŋo gaŋ tye ka duny mutiŋŋe wa malo i polo; ci ŋwec me riŋo yo tuŋŋi nyo tuŋŋi oloyogi woko, pien onoŋo jo ma guriŋo gudok yo tuŋ tim-mi gulokke gudwogo cen i kom luryem korgi.

²¹ Ka doŋ Yocwa ki jo Icrael ducu guneno ni jo ma gubuto aŋec-ci doŋ gumako gaŋ woko, ki yito mac ma waŋo gaŋ bene doŋ duny cito malo, ci gudwogo cen ka neko jo Ai.

²² Jo mukene gua ki i gaŋ gulwenyo bene i kom jo Ai; kit meno onoŋo jo Icrael gurumogi dyere, jo mukene ki yo tuŋcel ki jo mukene yo tuŋ mukene. Jo Icrael gunekogi nio ka pe gubwoto dano acel mo mudoŋ makwo nyo muriŋo obwot.

²³ Ento gumako kabaka me Ai makwo, gutero bot Yocwa.

²⁴ Ka jo Icrael doŋ gutyeko neko jo Ai ducu ma ginoŋogi i bar nyo i tim ka ma guryemo iye korgi-ni, nio ka gunekogi ducu ki pala lucwan, mo pe odoŋ, ci jo Icrael ducu gulokke gudok i gaŋ, guneko dano mudoŋ iye ki pala lucwan.

²⁵ Jo ducu ma guto i nino meno, co ki mon, guromo alip apar wiye aryo, jo Ai ducu.

²⁶ Yocwa pe odwoko ciŋe piny ma noŋo oryeyo otiro ki toŋ alwiro-ni, nio waŋ ma gijwero jo ma gibedo i Ai woko Liweŋ.

²⁷ Kono nyo lim makwo ki jami mogo ma giyako ki i gaŋ meno aye jo Icrael gutero obedo megi, macalo lok ma yam Rwot ociko ki Yocwa.

²⁸ Kit meno Yocwa owaoŋ Ai woko, oweko odoŋ odur ma odurre lipim matwal, kit ma tye kwede wa onyoo-ni.

²⁹ Odeyo kabaka me Ai, oŋabo malo i wi yat o wa otyeno. Ka ceŋ doŋ cito ka poto, Yocwa ociko dano ci gukwanyo kome woko ki i kom yat, gubolo piny i dog gaŋ ka ma gidonyo kwede i gaŋ-ŋi, ka gucano got i kome madwoŋ Likun, ma pud tye kenyo o kwede wa i kare man.

Gicoyo cik i kom got Ebal

³⁰ Yocwa ocano keno tyer i wi got Ebal pi Rwot Lubaŋa pa Icrael,

³¹ kit ma yam Moses Latic pa Rwot ociko ki jo Icrael. Olubo lok ma gicoyo i buk me cik pa Moses ni, “Wucan keno tyer ki got ma pe gipayo komgi, ma danomo pe otiŋo nyonyo i kome.” En aye gutyero iye gitum awaŋa bot Rwot, ci gutumo gityer lakwecwiny,

³² Ci Yocwa ocoyo kopi me cik pa Moses i kom godi kunnu ki i nyim jo Icrael kun lubo kit ma yam Moses ocoyo.

³³ Ci jo Icrael ducu, lubedo ki anywalli, kacel ki ludoŋo ki ludito tic ki luŋolkopgi, gin ducu gucuŋ i get canduk pa Rwot tuŋŋi ki tuŋŋi ki i nyim ajwagi ma Lulevi ma gutiŋo canduk me gicikke pa Rwot. Nucu dano gucuŋ i nyim got Gerijim ki nucu dano gucuŋ i nyim got Ebal, kit ma Moses latic pa. Rwot okwono cikogi kwede kit ma myero gilam kwede gum i kom jo Icrael.

³⁴ Ka lacen Yocwa okwano lok ducu ma i cik, wa lok me lamo gum ki lok me ceno dano ducu kikore macalo yam gicoyo ducu i buk me cik,

³⁵ Lok acel mo pe odoŋ i kom lok ducu ma Moses yam ociko ma Yocwa pe okwano i nyim kacokke pa jo Icrael ducu, kacel ki mon ki litino ki lubedo ma gibedo i kingi.