Yocwa 5 - Acoli Baibul

Liro dano i Gilgal

¹ Ka luker pa jo Amor ducu ma gibedo loka Jordan ma tuŋ potoceŋ, ki luker pa jo Kanaan ducu ma gitye i dog nam, guwinyo ni Rwot otyeko dwono pii me Jordan otwo woko pi jo Icrael nio ka gumol gukato loka tuŋcel, ci cwinygi ocako ŋabbe aŋaba, ki tipo komgi oto woko, pi lworo jo Icrael.

² I kare meno Rwot owaco bot Yocwa ni, “Tim pala kidi lela mabitte ci ilir ki jo Icrael tyen me aryone.”

³ Ci Yocwa otimo pala kidi lela mabitte, oliro ki jo Icrael i Gibea-aralot,

⁴ Man aye tyen lok mumiyo Yocwa olirogi: lwak co ducu ma gua ki i Ejipt, lulwenygi ducu, onoŋo gutyeko to woko ki i tim i kare ma doŋ gutyeko a woko ki i Ejipt.

⁵ Jo ma gua ki kunnu onoŋo yam gilirogi, ento jo ducu ma ginywalogi ki i wanayo ma onoŋo doŋ gua woko ki i Ejipt, gubedo ma pe gilirogi,

⁶ Pien JO Icrael gubedo ka wot i tim mwaka pyeraŋwen, nio ka jo me rokgi ducu, co ducu ma lumony ma yam gua ki i Ejipt, guto gutum woko, pien onoŋo pe gubedo ka woro dog Rwot. Rwot yam okwoŋo ni pe ebiye ni gin gunen lobo ma yam okwono bot kwarogi ni ebimiyo botgi, en aye lobo ma mol cak ki moo kic.

⁷ Kit meno jo ma Yocwa oliro gubedo litinogi ma Rwot omiyo gudoŋo guleyo ka tyengi; pien onoŋo gubedo ma pe gilirogi, pe gilirogi ki i waŋayo.

⁸ Ka liro jo Icrael doŋ otum, ci gubedo i gony nio ka gucan.

⁹ Rwot owaco bot Yocwa ni, “Tin doŋ akwanyo lewic me lobo Ejipt woko ki i komwu,” mumi yo nyiŋ kabedo-nu pud gilwoŋo ni Gilgal wa onyoo.

Kwero nino madit me Kato (Paska)

¹⁰ I kare ma jo Icrael gitye i gony me Gilgal gukwero nino madit me Kato i nino dwe apar wiye aŋwen otyeno i bar me Jeriko.

¹¹ Orwone ki i ŋe kwero Kato, i nino meno kikome, gucako camo cam ma ocek i lobo-nu, capat ma tobi pe iye ki bel ma gicelo,

¹² I nino meno ma gucamo iye cam ma ocek ki i lobo-nu en aye nino ma manna bene, ogik iye; jo Icrael pe dok gumedde ki camo manna matwal, ento doŋ gubedo ka camo cam ma ocek i lobo Kanaan i mwaka meno.

Dano ma owoto pala lucwan

¹³ Ka Yocwa onyiko cok ki Jeriko, otiŋo wane malo oneno piny, ci oneno dano mo ocuŋ i nyime ma onoŋo owoto pala lucwan omako i ciŋe. Yocwa ocito bote, openye ni, “In itye tuŋ botwa nyo tuŋ bot lumerokwa?”

¹⁴ En ogamo ni, “Pe; ento an aye lawimony pa Rwot ma tin doŋ abino.” Yocwa oryebbe piny i ŋom, owore, ci owaco bote ni, “Ladit, an laticci, icika ki lok aŋo?”

¹⁵ Lawimony pa Rwot owaco bot Yocwa ni, “Luny war woko ki i tyeni, pien kabedo ma icuŋ iye-ni kabedo maleŋ.” Ci Yocwa otimo kit meno.