Yocwa 3 - Acoli Baibul

Jo Icrael gukato loka Jordan

¹ Yocwa oa malo odiko con ci otiŋo wot kun a ki i Citim, kacel ki jo Icrael ducu, guo kwede wa i dog kulu Jordan, gubuto kenyo ma peya gukato loka tuŋ ca.

² Ka gutyeko kunnu nino adek, ci ludito guwoto i dye gaŋ

³ kun giciko lwak ni, “Ka doŋ wuneno ajwagi ma Lulevi doŋ gutiŋo canduk me gicikke pa Rwot Lubaŋawu, ci wun bene doŋ wubicako wot, wua ki i kabedowu wulubo kore,

⁴ wek wuŋe yo ma wubilubo-ni, pien yam peya wulubo yo meno. Ento kinwu ki canduk pa Rwot aye obed ma oŋadde; ber kinwu opokke ma romo yadi alip acel kulu, pe wunyik cok bote.”

⁵ Ci Yocwa ociko lwak ni, “Wulonnye kekenwu wek wubed maleŋ, pien diki Rwot bitiyo jami taŋo i kinwu.”

⁶ Yocwa owaco bot ajwagi ni, “Doŋ wutiŋ canduk me gicikke, wukat kwede i nyim lwak.” Gutiŋo canduk me gicikke, gucito kwede wa i nyim lwak.

⁷ Rwot owaco bot Yocwa ni, “Tin doŋ acako miyo ibedo dano madit ki i nyim ‘jo Icrael ducu, wek guŋe ni, kit ma yam abedo ki Moses, abibedo kwedi bene kit meno,

⁸ Ibiciko ajwagi ma gitiŋo canduk me gicikke ni, ‘Ka doŋ wuo i dog pii me Jordan, ci wubicuŋ mot i kulu Jordan.’”

⁹ Ci Yocwa owaco bot lwak ni, “Wubin kany ka winyo lok pa Rwot Lubaŋawu.”

¹⁰ Ka dok owaco ni, “Kombeddi doŋ wubiŋeyo ni Lubaŋa makwo tye i kinwu, dok ni en biryemo jo magi woko ki i nyimwu ada, jo Kanaan, jo Kit, jo Kiv, jo Periji, jo Girgac, jo Amor ki jo Jebuc.

¹¹ Canduk me gicikke pa Rwot me lobo ducu doŋ biŋolo kulu Jordan ki i nyimwu.

¹² Koni doŋ wukwany dano apar wiye aryo ki i kin kaka pa jo Icrael, dano acel pi kaka acel acel.

¹³ I kare ma tyen ajwagi ma gutiŋo canduk me gicikke pa Rwot, ma Rwot me lobo ducu-ni, bicuŋ i pii me Jordan, ci pii me Jordan biŋol woko ma pe doŋ mol; pii ma mol a ki malo yo tuŋ cel-li bigut gurre kacel.”

¹⁴ Kit meno lwak gua ki i kemagi gucako wot pi ŋolo loka Jordan kacel ki ajwagi ma gutiŋo canduk me gicikke ma gutelo kwede nyim lwak.

¹⁵ Noŋo pii me kulu Jordan poŋ woko libyeny o wa i wi tura mwaka ki mwaka pi kare malac i kare me kac. Ka doŋ ajwagi ma gutiŋo canduk me gicikke-ni guo i Jordan, guluto tyengi i pii ma i doge-ni,

¹⁶ ci pii ma mol piny ma a ki tuŋ malo-ni ogut ocuŋ woko ma opoŋ otiŋŋe malo likuŋ ma ojer wa i Adam, en gaŋ ma cok ki Jaretan. Pii mogo ma mol kemo nam me Araba, ma Nam me Kado-ni, kingi ducu oŋol woko, ci lwak gukato loka tuŋcel, mukemo Jeriko.

¹⁷ I kare ma jo Icrael ducu gimol gikato ki i lobo mutwo-ni, onoŋo ajwagi ma gutiŋo canduk me gicikke pa Rwot-ti gucuŋ i dye Jordan, nio ka rok ducu otyeko kato loka Jordan.