Yocwa 23 - Acoli Baibul

Yocwa ociko lwak

¹ Ka kare okato malac ma Rwot doŋ otyeko miyo yweyo bot jo Icrael i kom lumerokgi ducu ma yam orumogi dyere-ni, onoŋo Yocwa doŋ oti woko, mwaka me ditte doŋ dwoŋ.

² Olwoŋo jo Icrael ducu, ki ludoŋogi, ludito wigi, luŋolkopgi ki ludito ticgi ducu, ci owaco botgi ni, “Ao kombeddi doŋ ati woko, mwaka me ditta doŋ dwoŋ.

³ Wun doŋ wutyeko neno gin ducu ma Rwot Lubaŋawu otiyo piwu i kom rok magi ducu, pien Rwot Lubaŋawu aye obedo ka lweny i komgi piwu,

⁴ Nen ka doŋ atyeko poko rok mapatpat ma, pud gudoŋ i kinwu me bedo ginaleya pa kakawu, kacel ki rok ducu ma yam doŋ aloyogi woko, cakke ki i Jordan o kwede wa i Nam Madit ma yo tuŋ potoceŋ.

⁵ Rwot Lubaŋawu bidirogi woko cen kun ryemogi woko ki i nyimwu, ci wubicamo lobogi kit ma yam Rwot Lubaŋawu ocikke kwede botwu-ni,

⁶ Pienno wucuŋ matek kun, wulubo gin ducu ma gicoyo i buk me cik pa Moses, pe wuŋak wudok yo tuŋ acuc nyo yo tuŋ acam.

⁷ Pe wunyebbe ki bedo kacel ki lurok ma pud gudoŋ i kinwu-ni, pe wutuc nyiŋ Iubanagi, pe wukwoŋ kwoŋ mo ki nyiŋ lubaŋagi, pe wuworgi, pe wuryebbe i nyimgi,

⁸ Ento wumok likiŋ i kom Rwot Lubaŋawu kit ma wubedo ka timone o kwede wa onyoo-ni.

⁹ Rwot doŋ otyeko ryemo rok madito ki matego woko ki i nyimwu; ŋat mo peya onen ma obedo ki twero me cuŋ i nyimwu.

¹⁰ Dano acel mo ki i kinwu romo ryemo jo alip kulu, pien Rwot Lubaŋawu aye tye ka lweny piwu kit ma yam owaco botwu-ni.

¹¹ Doŋ ba, myero wugwokke matek, wunen ni wumaro Rwot Lubaŋawu;

¹² pien ka wudok cen kun wuribbe ki lurok ma gudoŋ i kinwu, ka ce wucako nyomme kwedgi kun wunyomo anyiragi ka dok gin bene ginyomo anyirawu,

¹³ ci wuŋe atir ni, Rwot Lubaŋawu pe dok bimedde ki ryemo lumerokwu woko ki i nyimwu; ento gin aye gibidoko macalo owic ki layutta me cikowu, ki odoo gayi me jwato pyerwu ki okuto me cobo waŋwu, nio ka wubito wutum woko ki i lobo man maber ma Rwot Lubaŋawu doŋ omiyo botwu-ni,

¹⁴ “Kombeddi an doŋ atye cok ka lubo yo ma gin me wi lobo ducu mol ci to iye-ni, wun bene wuŋeyo ki i cwinywu wa ki tipo komwu ducu ni, gin mabeco ducu ma yam Rwot Lubaŋawu ociko piwu gin ducu gucobbe kakare, pe tye acel mo ma pe otimme,

¹⁵ Ento kit ma yam Rwot Lubaŋawu ocobo lok ducu mabeco ma yam ociko piwu-ni, kit meno bene Rwot dok bikelo gin ducu maraco i komwu, nio ka, bityekowu woko ki i lobo man maber ma en omiyo botwu-ni,

¹⁶ ka ce wuturo gicikke pa Rwot Lubaŋawu ma yam ocikowu kwede kun wucito ka woro lubaŋa mogo mukene, wuryebbe i nyimgi. Kiniga bimako Rwot i komwu, ci wubito wutum woko oyotoyot ki i lobo man maber ma en omiyo botwu.”