Yocwa 21 - Acoli Baibul

Gaŋi pa Lulevi

¹ Ludito wi kaka pa kwaro pa Lulevi gubino bot ajwaka Eleajai ki Yocwa wod pa Nun ki ludito wi kaka pa jo Icrael mukene ducu.

² Gubino botgi i Cilo i lobo Kanaan, guwaco botgi ni, “Rwot yam ociko ki i dog Moses ni myero gimi botwa gaŋi me bedowa kacel ki lobo ma i ŋetgi me olet-gu pi kwayo limwa makwo.”

³ Ci jo Icrael gulubo cik pa Rwot, gumiyo gaŋi magi bot Lulevi kacel ki lobo me oletgi kun gikwanyo ki i kom ginaleyagi:

⁴ Kwir okwoŋo poto i kom jo Kokat ci Lulevi ma likwayo pa ajwaka Aron gulimo gaŋi apar wiye adek ki bot jo Juda, jo Cimeon ki jo Benjamin kun onoŋo giyerogi ki bolo kwir.

⁵ Jo Kokat mudoŋŋe gulimo gaŋi apar ki bot jo Epraim, jo Dan ki nucu kaka pa jo Manace muporo doggolagi.

⁶ Jo Gercon gulimo gaŋi apar wiye adek ki bot jo Icakar, jo Acer, jo Naputali ki nucu kaka pa Manace ma i Bacan muporo doggolagi.

⁷ Jo Merari gulimo gaŋi apar wiye aryo ki bot jo Reuben, jo Gad ki jo Jabulon muporo doggolagi.

⁸ Gaŋi magi ki lobo olet ma i ŋetgi jo Icrael gumiyo bot jo Levi kun gibolo kwir, kit macalo Rwot yam ociko ki i dog Moses.

⁹ Gaŋi ma gulimo ki bot kaka pa Juda ki Cimeon,

¹⁰ gaŋi ma gimiyo bot likwayo pa Aron, ma gin aye doggola acel i kin jo Kokat ma Lulevi-ni nyiŋgi ene.

¹¹ Kwir okwoŋo poto i komgi ci gimiyo botgi Kiriat-arba, en aye Kebron, ma i lobo godi me Juda, kacel ki lobo olet ma orume dyere. Arba obedo kwaro pa jo Anak.

¹² Ento potti ducu ma i ŋet gaŋ meno, ki gaŋi matino ma i ŋete yam onoŋo gimiyogi woko bot Kaleb wod pa Jepune me bedo mere.

¹³ Gimiyo Kebron ki lobo olet ma i ŋete bot likwayo pa ajwaka Aron, en aye gagŋ me laro lunek dano, Libna ki lobo olette,

¹⁴ Jatir ki olette, Ectemoa ki olette,

¹⁵ Kolon ki olette, Debir ki olette,

¹⁶ Ain ki olette, Juta ki olette, Bet-cemec ki olette, gaŋi aboŋwen mua ki bot kaka aryo-nu.

¹⁷ Ka doki gimiyo botgi gaŋi magi mua ki bot jo Benjamin: Gibeon, Geba,

¹⁸ Anatot ki Almon, gaŋi aŋwen ki olet ma i ŋetgi.

¹⁹ Gaŋi ducu ma gimiyo bot likwayo pa ajwaka Aron gubedo apar wiye adek, kun gaŋ acel acel tye ki lobo me olet i ŋete.

²⁰ Lulevi me doggola mogo pa jo Kokat mudoŋ gulimo gaŋi magi ma i lobo pa jo Epraim:

²¹ Cekem, gaŋ me laro lunek dano ma i lobo godi me Epraim, ki olette, Gejer ki olette,

²² Kibjaim ki olette, Bet-koron ki olette, gaŋi aŋwen,

²³ Ki bot kaka pa Dan gulimo Elteke, Gibeton,

²⁴ Aijalon ki Gat-rimmon, gagi aŋwen ki olet ma i ŋetgi.

²⁵ Ki bot nucu kaka pa Manace gulimo Taanak ki Gat-rimmon ki olet ma i ŋetgi.

²⁶ Kumeno gaŋi ducu ma gimiyo bot doggola mukene pa jo Kokat gubedo apar, kun gaŋ acel acel tye ki lobo olet i ŋete,

²⁷ Jo Gercon ma doggola mukene pa Lulevi gulimo gaŋi aryo ki bot nucu kaka pa Manace, gin aye Golan ma i Bacan ma gaŋ me laro lunek dano ki olet ma i ŋete, ki Be-eciterot ki olette.

²⁸ Ki bot jo Icakar gulimo Kicion, Oaberat,

²⁹ Jarmut ki En-ganim, gaŋi aŋwen ki olet ma i netgi.

³⁰ Ki bot jo Acer gulimo Mical, Abdon,

³¹ Kelkat ki Rekob, gaŋi aŋwen ki olet ma i ŋeti,

³² Ki bot jo Naputali gulimo Kedec i Galilaya, gaŋ me laro lunek dano, Kamot-dor ki Kartan, gaŋi adek ki olet ma i ŋetgi.

³³ Kumeno gaŋi ducu ma gimiyo bot doggola mapatpat pa jo Gercon obedo apar wiye adek, kun gaŋ acel acel tye ki lobo olet i ŋete.

³⁴ Lulevi mukene, ma gin aye doggola pa jo Merari, gulimo ki bot jo Jabulon Jokneam, Karta,

³⁵ Dimna ki Nakalal, gaŋi aŋwen ki olet ma i ŋetgi,

³⁶ Ki bot jo Reuben gulimo Bejer, Jakaj,

³⁷ Kedemot ki Mepat, gaŋi aŋwen ki olet ma i netgi.

³⁸ Ki bot jo Gad gulimo Ramot ma i Gilead ma gaŋ me laro lunek dano, Makanaim,

³⁹ Kecbon ki Jajer, gaŋi aŋwen ki olet ma i ŋetgi.

⁴⁰ Gaŋi ducu ma gimiyo bot doggola mapatpat pa jo Merari, en aye bot doggola pa Lulevi mudoŋŋe, obedo apar wiye aryo.

⁴¹ Gaŋi ducu pa Lulevi ma gitye i dye lobo pa jo Icrael gubedo pyeraŋwen wiye aboro, ki oletgi.

⁴² Gaŋ acel acel onoŋo tye ki lobo olet ma orume dyere; gaŋigi ducu gubedo kit meno.

Jo Icrael gucamo lobo

⁴³ Kit meno Rwot omiyo bot jo Icrael lobo ducu ma yam okwoŋo pire ni ebimiyo bot kwarogi-ni; gucamo lobone kit meno, ci gubedo iye,

⁴⁴ Rwot omiyogi yweyo i kabedogi ducu kit ma yam okwoŋo bot kwarogi; pe lamerokgi acel mo ocun i nyimgi, pien Rwot onoŋo omiyo lumerokgi ducu i ciŋgi.

⁴⁵ Lok mabeco ducu ma yam onoŋo Rwot ociko ki jo Icrael ocobbe kakare, pe onen lok mo ma pe otimme.