Yocwa 2 - Acoli Baibul

Gicwalo lurot-piny i Jeriko

¹ Yocwa wod pa Nun ocwalo jo aryo nia ki i Citim i muŋ ka roto piny kun waco botgi ni, “Wucit ka neno lobo, makatone aye Jeriko.” Ka gucito, ci gutiro i ot pa dako ma lakwele ma nyiŋe Rakab, gubuto kunnu.

² Gitito pigi bot kabaka me Jeriko ni, “Nen, jo Icrael mogo gubino kany ka roto piny.”

³ Ci kabaka me Jeriko ocwalo kwena bot Rakab ma kun wacce ni, “Kel dano ma gubino boti kany, dano ma gudonyo i odi-ni, pien gubino ka roto lobowa ducu.”

⁴ Ento dako-nu onoŋo otero jo aryo-nu okanogi woko, ci en ogamo ni, “Ada, jo-nu gubino bota, ento onoŋo pe aŋeyo ka ma gua iye.

⁵ I kare ma dog gaŋ gicok lorone woko, ma piny col-li, jo-nu gukato woko, ci ka ma gucito iye aye pe aŋeyo. Wuryem korgi oyotoyot, ci wubimakogi iyo,”

⁶ kun onoŋo oterogi i wi ot malo, ci okanogi i kin tol tworo ma ocano kikore i wi ot kunnu.

⁷ Kit meno dano gucako ryemo korgi i yo ma kemo kulu Jordan nio kwede wa i waŋ wat. Ka luryem korgi gukato woko, ci dog gaŋ giloro woko cut.

⁸ I kare ma jo-nu peya gubuto piny, en ocito botgi i wi ot,

⁹ ci owaco botgi ni, “Aŋeyo ni Rwot otyeko miyowu lobo man, lworo bene otyeko makowa piwu, ki jo ma gibedo i lobo-ni komgi oonyo koyo woko piwu,

¹⁰ pien wawinyo kit ma Rwot otwoyo ki pii me Nam Makwar woko i nyimwu i kare ma wua woko ki i Ejipt, ki gin ma wutiyo i kom luker aryo pa jo Amor ma yam gibedo loka Jordan tuŋ kany, gin aye Cikon ki Og, ma wujwerogi woko liweŋ-ŋi.

¹¹ I kare ma wawinyo pire-ni cwinywa ocako ŋabbe aŋaba cut, tipo kom dano oto woko lirut piwu, pien Rwot Lubaŋawu aye Lubaŋa ma tye malo i polo ki piny i wi lobo bene.

¹² Kombeddi doŋ wukwoŋŋa kwoŋ ki nyiŋ Rwot ni, kit macalo atyeko timowu maber-ri, wun bene wubitimo jo me ot pa wora maber, ci wumiya lanyut ma moko adane,

¹³ wek wular kwo pa wora ki pa maa, ki pa omegina ki lumegina, ki jo ducu ma gitye botgi, wek wular kwowa wawek to.”

¹⁴ Jo meno gugamo ni, “Wan aye wabito ma ka wun. Ka pe wubitito gin ma watimo kany-nyi, ci wan wabitimowu maber ki gen madwoŋ ka Rwot bimiyowa lobo-ni.”

¹⁵ Lacen dako-nu omiyo gukato woko ki i waŋ dirica ma noŋo en cwalogi piny ki tol, pien onoŋo ode gigero okubbe i kom cel murumo gaŋ-ŋi, omiyo en yam bedo i kom cel.

¹⁶ Ci en ocikogi ni, “Koŋ wucit wa i kin godi, wek luryem korwu pe gurwatte kwedwu iyo. Koŋ wukanne kunnu pi nino adek, nio ka luryem korwu gudwogo; ka lacen wun doŋ wucit giwu.”

¹⁷ Jo-nu guwaco bote ni, “Pe wabibedo ki bal mo i kom kwoŋ man ma imiyo wakwoŋo boti-ni.

¹⁸ Nen ba, ka monywa obino i lobo-ni, ci ibitweyo tol man makwar-ri i waŋ dirica ma imiyo wakato woko kun wawok ki iye-ni. Ci ibilwono woru ki meni ki omegini ki jo ma i ot pa woru ducu, icokogi i ot boti kany.

¹⁹ Ka ŋat acel mo okato gire woko ki i doggola odi ocito i gudo, bal me remone bidok i wiye, wan pe wabibedo ki bal mo iye,

²⁰ Ento ka ce itito gin ma watimo kany-nyi, ci pe wabibedo ki bal mo pi kwoŋ ma imiyo wakwoŋo-ni.”

²¹ Dako ogamo ni, “Doŋ obed kumeno kit macalo wuloko-ni.” Ka ocwalogi gucito, ci en otweyo tol makwar-ri i waŋ dirica ode.

²² Ka gucito ci guwoto atir wa i godi, gubedo kunnu pi nino adek, nio ka luryem korgi gudok woko; lulub korgi gubedo ka yenyogi kwe i waŋayo, ci pe gumedo ki noŋogi,

²³ Jo aryo-nu gulor piny ki i wi godi, gukato loka ca ci gucito bot Yocwa wod pa Nun, gutito bote lok ducu ma otimme i komgi.

²⁴ Ka dok guwaco bot Yocwa ni, “Adada Rwot doŋ otyeko miyo lobo meno ducu i ciŋ wa; dok nen ni jo ducu ma gibedo i lobo-nu piwa oneko komgi woko lirut.”