Yocwa 19 - Acoli Baibul

Lobo ma gipoko bot jo Cimeon

¹ Kwir ma gibolo me aryone opoto i kom Cimeon, pi kaka pa jo Cimeon muporo doggolagi; ginaleyagi obedo i dye lobo ma gimiyo bot jo me kaka pa Juda.

² Ginaleya pa jo Cimeon obedo gaŋ magi: Beer-ceba, Ceba, Molada,

³ Kajar-cual, Bala, Ejem,

⁴ Eltolad, Betul, Korma,

⁵ Jiklag, Betmarkabot, Kajar-cuca,

⁶ Bet-lebaot ki Caruken, gagi apar wiye adek ki gaŋi matino ma i ŋetgi;

⁷ En-rimmon, Eter, ki Acan, gaŋi aŋwen ki gaŋi matino ma i ŋetgi,

⁸ kacel ki lwak pacci ducu ma orumo ŋet gaŋi-nu o kwede wa Baalat-beer, ma gilwogo bene ni Rama me Negeb. Meno aye obedo ginaleya pa jo Cimeon ma oporo doggolagi.

⁹ Ginaleya pa jo Cimeon obedo dul ma gipoko ki i kom ginaleya pa jo Juda; onoŋo dullobo ma gipoko bot jo Juda obedo lac mada ma obwono komgi woko, mumiyo jo Cimeon gulimo ginaleyagi i dyegi.

Lobo ma gipoko bot jo Jabulon

¹⁰ Kwir ma gibolo me adekke opoto i kom kaka pa jo Jabulon muporo doggolagi ducu, ci lobo me ginaleyagi oo wa i Carid.

¹¹ Wag lobogi owoto yo tun potoceg oo wa i Mareal, ka ogudo kwede Dabecet ki nota ora ma i ŋet Jokneam yo tun wokceŋ.

¹² Cakke ki i Carid bene waŋ lobone mukene mukemo wokceŋ ma yo tuŋ kunyaŋo ocito oo wa i waŋ lobo me Kiclot-tabor,

¹³ ka ocito kwede Dabera, ka oo i Japia. Ka oa ki kunnu okato yo tuŋ wokceŋ oo kwede Gat-keper ki Etkajin, ka ocito Rimmon ci olokke odok Nea.

¹⁴ Waŋ lobo yo tun acam ogom woko ocito Kanaton ci ogik i nota Iptakel.

¹⁵ Medde i kom meno gubedo ki Katat, Nakalal, Cimron, Iddat ki Beterekem; gubedo ki gaŋi apar wiye aryo ki gaŋi matino ma i ŋetgi.

¹⁶ Meno aye ginaleya pa jo Jabulon ma oporo doggolagi, gaŋi magi ki gaŋi matino ma i ŋetgi.

Lobo ma gipoko bot jo Icakar

¹⁷ Kwir ma gibolo me aŋwenne opoto i kom Icakar pi kaka pa jo Icakar muporo doggolagi.

¹⁸ I lobogi onoŋo tye iye gaŋi magi: Jejreel, Kecuiot, Cunem,

¹⁹ Kaparaim, Sion, Anakarat,

²⁰ Rabit, Kicion, Ebej,

²¹ Remet, Enganim, En-kada, Bet-pajej.

²² Waŋ lobogi ogudo Tabor bene, Cakajuma ki Bet-cemec, ci ogik i kulu Jordan. Gaŋigi ducu obedo apar wiye abicel, ki gaŋi matino ma i ŋetgi.

²³ Meno aye ginaleya pa jo Icakar muporo doggolagi, gaŋi magi ki gaŋi matino ma i ŋetgi.

Lobo ma gipoko bot jo Acer,

²⁴ Kwir ma gibolo me abicce opoto i kom kaka pa jo Acer muporo doggolagi,

²⁵ Lobogi onoŋo tye iye gaŋi magi: Kelkat, Kali, Beten, Akicap,

²⁶ Alam melek, Amad ki Mical. Waŋ lobogi ogudo Karmel yo tuŋ potoceŋ, ki Cikor-libnat;

²⁷ lacen olokke odok tuŋ wokceŋ ocito Bet-dagon, ci ogudo lobo pa jo Jabulon ki nota Iptakel yo tuŋ acam i Bet-emek ki Neiel. Waŋ lobo ma yo tuŋ acam ocito Kabul,

²⁸ Ebron, Rekob, Kamon ki Kana ci oo wa i Cidon Maditte;

²⁹ lacen olokke ocito Rama oo kwede Turo ma gicelo ki cel gogo-ni, ci olokke ocito Koca ka ogik i dog nam. Gaŋigi mukene obedo Makalab,

³⁰ Umma, Apek ki Rekob, ducu pyeraryo ki gaŋi matino ma i ŋetgi.

³¹ Meno aye ginaleya pa jo Acer muporo doggolagi, gaŋi magi ki gaŋi matino ma i ŋetgi.

Lobo ma gipoko bot jo Naputali

³² Kwir ma gibolo me abicel opoto i kom kaka pa jo Naputali muporo doggolagi.

³³ Waŋ lobogi ocakke i Kelep i te yat kworo ma i Jaananim owok ki i Adami-nekeb ki Jabneel, ocito wa i Lakun ka ogik kwede i kulu Jordan.

³⁴ Ki kunnu waŋ lobo olokke okemo yo tuŋ potoceŋ ocito Ajinot-tabor, oa ki kunnu ocito Kukok; kumeno ogudo lobo pa jo Jabulon yo tuŋ acuc, lobo pa jo Acer yo tuŋ potoceŋ ki kulu Jordan yo tuŋ wokceŋ.

³⁵ Gaŋigi ma gicelo ki cel gogo obedo Jidim, Jer, Kammat, Rakat, Kineret,

³⁶ Adama, Rama, Kajor,

³⁷ Kedec, Edrei, En-Kajor,

³⁸ Yiron, Migdalel, Korem, Bet-anat ki Bet-cemec: Gaŋigi ducu obedo apar wiye aboŋwen ki gaŋi matino ma i ŋetgi.

³⁹ Meno aye ginaleya pa jo Naputali ma oporo doggolagi, gaŋi magi ki gaŋi matino ma i ŋetgi.

Lobo ma gipoko bot jo Dan

⁴⁰ Kwir, ma gibolo me abiro opoto i kom kaka pa jo Dan muporo doggolagi.

⁴¹ I lobo me ginaleyagi onoŋo tye iye gaŋi magi Jora, Ectaol, Ir-cemec,

⁴² Caalahin, Aijalon, Itla,

⁴³ Elon, Timna, Ekron,

⁴⁴ Elteke, Gibeton, Baalat,

⁴⁵ Jekud, Bene-barak, Gat-rimmon,

⁴⁶ Mejarkon ki Rakon ki lobo ma i nyim Jopa.

⁴⁷ Ento ka lobo pa jo Dan orwenyo woko ki i ciŋgi, gucito gulwenyo i kom gaŋ mo ma nyiŋe Lecem, gumayo, guneko dano ma gubedo iye ducu ki pala lucwan, guloko gaŋ meno odoko megi, gucako bedo iye. Guloko nyiŋ Lecem gucako ni, Dan macalo nyiŋ kwarogi Dan.

⁴⁸ Meno aye ginaleya pa jo Dan ma oporo doggolagi, gaŋi magi ki gaŋi matino ma i ŋetgi.

Lobo ma gimiyo bot Yocwa

⁴⁹ Ka doŋ gutyeko poko lobo i dul mapatpat me bedo ginaleyagi, jo Icrael gumiyo dul lobo bot Yocwa wod pa Nun obed ginaleyane i kingi.

⁵⁰ Gumiyo bote gaŋ ma en olego ki botgi kit ma Rwot ocikogi kwede, en aye Timnatcera ma i lobo godi pa jo Epraim. En dok ogero gaŋŋ eodoco ci obedo iye.

⁵¹ Meno aye ginaleya ma ajwaka Eleajar ki Yocwa ki ludito kaka ma i odi pa kwarogi gupoko bot jo Icrael i Cilo i nyim Rwot i doggola kema me rwatte kun gibolo iye kwir; gutyeko poko lobo kit meno.