Yocwa 17 - Acoli Baibul

¹ Dok gibolo kwir me poko dul lobo pa jo Manace, pien en aye latin kayo pa Yucepu. Yam onoŋo gimiyo Gilead ki Bacan bot Makir won Gilead, latin kayo pa Manace, pien onoŋo en lalweny.

² Ka dok gibolo kwir pi poko lobo bot jo me kaka pa Manace ma pud Odoŋ muporo doggolagi ducu, doggola pa Abiejer, Kelek, Aciriel, Cekem, Keper ki Cemida; gin aye likwayo ma co pa Manace wodpa Yucepu.

³ Jelopekad wod pa Keper onywalo anyira keken, awobene pe. Nyiŋ anyirane Makala, Noa, Kogla, Mirika ki Tirja.

⁴ Gin gubino i nyim ajwaka Eleajar ki Yocwa wod pa Nun, ci guwacci, “Rwot yam ociko Moses ni myero gimi ginaleya botwa kacel ki utmegiwa.” Mumiyo Yocwa omiyogi ginaleya kacel ki omegi wongi, kit ma Rwot onoŋo ociko-ni.

⁵ Kit meno jo pa Manace gugamo dul lobo apar medo i kom Gilead ki Bacan ma loka Jordan tuŋ wokceŋ,

⁶ pien anyira pa Manace bene dok gulimo ginaleya kacel ki awobene. Lobo Gilead onoŋo doŋ gimiyo bot likwayo mukene pa Manace.

⁷ Waŋ lobo pa jo Manace ocakke ki i Acer ocito kwede Mikmetat ma tye i ŋet Cekem yo tuŋ wokceŋ. Ka dok ocito, yo tuŋ acuc o kwede En-tapua.

⁸ Lobo Tapua obedo bot jo Manace, ento gaŋ Tapua kikome ma i waŋ lobo pa jo Manace onoŋo gimiyo bot jo Epraim.

⁹ Waŋ lobo dok ocito wa i nota ora Kana. Gaŋi ma tye kunnu i ŋet kulu-nu yo tuŋ acuc gimiyogi bot jo Epraim, kadi bed gitye i dye gaŋi pa jo Manace. Waŋ lobo pa jo Manace orabo ŋet kulu-nu yo tuŋ acam ocito kwede i nam

¹⁰ Lobo ma yo tuŋ acuc obedo pa jo Epraim ki lobo ma tuŋ acam obedo pa jo Manace, kun nam aye obedo waŋ lobogi yo tuŋ potoceŋ. Lobo pa jo Manace orwatte ki lobo pa jo Acer yo tuŋ acam, ki yo tuŋ wokceŋ orwatte ki lobo pa jo Icakar.

¹¹ Ento i lobo pa jo Icakar ki jo Acer jo Manace gubedo ki gaŋi magi: Bet-cean ki gaŋi matino ma i ŋete, ki Ibleam ki gaŋi matino ma i ŋete; gimiyogi bene dano ma gibedo i Dor ki En-dor ki i gaŋi matino ma i netgi, ki dano ma gibedo i Taanak ki Megiddo ki i gaŋi matino ma i ŋetgi. (Me adekke obedo Napat.)

¹² Ento gamo gaŋi meno loko doko megi oloyo jo Manace woko; jo Kanaan gucerre gumedo ki bedo i lobo kunnu.

¹³ Ento lacen ka jo Icrael gudoko tek, guketogi i tic muroni, pe guryemogi woko ducu liweŋ.

¹⁴ Kaka pa Yucepu guloko bot Yocwa kun giwaco ni, “Piŋo imiyo gibolo kwir piwa tyen acel keken, mumiyo walimo dul lobo acel keken me bedo ginaleyawa? Wan watye ki lwak dano madwoŋ mada, macalo Rwot doŋ obedo ka miyowa gum o wa onyoo.”

¹⁵ Yocwa ogamo ni, “Ka wutye ki lwak dano mapol, ci wucit i buŋa wucijwer dul lobo mo ma i lobo pa jo Perej ki jo Repaim, kit macalo lobo godi pa jo Epraim pe romowu-ni.”

¹⁶ Ento jo me kaka pa Yucepu gugamo ni, “Lobo godi pe biromowa; dok bene jo Kanaan ma gibedo i bar gitye ki gadigadi nyonyo me lweny, Jo Kanaan ma gibedo Bet-cean ki i gaŋi matino ma i ŋete ki gin ma gibedo i nota me Jejreel bene.”

¹⁷ Yocwa dok owaco bot likwayo pa Yucepu, jo Epraim ki jo Manace, ni, “Wun wutye ki lwak dano madwoŋ mada, dok wutye ki tek madwoŋ bene; pienno pe wubibedo ki dul lobo acel keken.

¹⁸ Lobo godi aye bibedo mewu, kadi obedo buŋa; wubijwero woko wucamo doko mewu o kwede wa i agikki waŋ lobo; pien wubiryemo jo Kanaan woko, kadi bed gitye ki gadigadi nyonyo me lweny, dok kadi bed gin jo matego.”