Yocwa 15 - Acoli Baibul

Lobo ma gipoko bot jo Juda

¹ Dul lobo ma gipoko bot kaka pa jo Juda ki bolo kwir muporo doggolagi obedo yo tuŋ acuc cok ki waŋ lobo pa jo Edom, i tim Jin ci ogik i Negeb tuŋ acuc.

² Waŋ lobogi yo tuŋ acuc ocakke i agikki nam me Kado ki i wen nam ma okemo tuŋ acuc;

³ ka dok ocito kwede yo tuŋ acuc ka ma giito iye malo i Akrabim, ka okato wa i Jin, ocito kwede malo i ŋet Kadec-bamea yo tuŋ acuc, orabo ŋet Kejeron o wa i Adar, ka dok olokke odok kwede Karka.

⁴ Ka dok okato ocito i Ajimon, oo i nota ora me Ejipt, ka ogik i dog nam Meno aye waŋ lobogi yo tuŋ acuc.

⁵ Waŋ lobogi yo tuŋ wokceŋ aye nam me Kado o ka ma kulu Jordan gik iye. Waŋ lobo yo tuŋ acuc ocakke i wen nam ka ma Jordan ogik iye,

⁶ ka dok cito Bet-kogla, kato kwede i ŋet Bet-araba yo tuŋ acam, o wa i got ma Boan wod pa Reuben ocibo.

⁷ Ka dok cito malo Debir kun oa ki i nota me Akor, kemo kwede yo tuŋ acam, ka doŋ lokke ka kemo Gilgal ma i nyim kor got ka ma giito iye malo i Adumim ma i ŋet nota ora yo tuŋ acuc, Ka doŋ kato cito wa i pii me En-cemec ci gik kwede i En-rogel.

⁸ Ki kunnu waŋ lobo lubo nota pa wod pa Kinom i kor got pa jo Jebuc yo tuŋ acuc (en aye Jerucalem). Ka dok waŋ lobo cito malo i wi got ma okemo nota pa Kinom yo tuŋ potoceŋ, i agikki luŋ me Repaim yo tuŋ acuc,

⁹ ci medde kun a ki i wi got cito i waŋ pii me Neputoa, kato kwede wa i gaŋi ma i got Epron, ci lokke mano yo tuŋ Baala (en aye Kiriat-jearim);

¹⁰ ka oa ki i Baala ci gono cito kun kemo tuŋ potoceŋ o kwede i got Ceir, kato kwede i kor got Jearim yo tuŋ acam (en aye Kecalon). Ka dok cito piny i Bet-cemec, kato kwede i ŋet Timna.

¹¹ Waŋ lobo a ki kunnu cito i kor got ma i ŋet Ekron tuŋ acam, ka dok lokke cito Cikeron, kato kwede wa i got Baala, cito i Jabneel; ka dok gik woko i dog nam

¹² Waŋ lobo yo tuŋ potoceŋ lubo dog Nam Madit ki Waŋ watte. Meno aye waŋ lobo ducu mukwako lobo pa jo Juda ma oporo doggolagi.

Kaleb oloyo Kebron ki Debir

¹³ Kaleb wod pa Jepune yam gimiyo dul lobo i kin jo pa Juda, kit ma onoŋo Rwot ociko ki Yocwa. Yocwa omiye Kiriat-arba, en aye Kebron. Arba obedo kwaro pa jo Anak.

¹⁴ Ci Kaleb oryemo likwayo adek pa Anak ma yam tye kunnu, gin Cecai, Akiman ki Talmai.

¹⁵ Oa ki kunnu ocito olwenyo i kom jo ma gibedo Debir. Nyiŋ Debir yam obedo Kiriat-ceper,

¹⁶ Ci Kaleb owacci, “Ka ŋatti mo olwenyo i kom Kiriat-ceper ce oloyo, ci abimiye nyara Akaca obed dakone.”

¹⁷ ‘Otiniel wod pa Kenaj omin Kaleb aye oloyo, ci Kaleb omiye nyare Akaca obedo dakone.

¹⁸ Ka nyako ocito bot cware, ci odiye ni openy poto mo bot wonne. Opye piny ki i wi kanane ci Kaleb openye ni, “Imito gin aŋo?”

¹⁹ Nyare ogamo ni, “Miya mot mo. Macalo doŋ iketa wa i lobo Negeb, dok imiya waŋ it mo bene.” Kaleb omiye Waŋ it ma tuŋ malo ki waŋ it ma tuŋ piny bene;

Gaŋi pa jo Juda

²⁰ Man aye ginaleya pa jo me kaka pa Juda ma oporo doggolagi.

²¹ Gaŋigi ma obedo ka ma lobogi ogik iye yo tuŋ acuc i Negeb, ma dok yo tuŋ waŋ lobo pa jo Edom gin ene: Kabeel, Eder, Jagur,

²² Kina, Dimona, Adada,

²³ Kedec, Kajor, Itnan,

²⁴ Jip, Telem, Bealot,

²⁵ Kajor-kadata, Keriot-kejeron, ma en aye Kajor,

²⁶ Amam, Cema, Molada,

²⁷ Kajar-gada, Kecmon, Betpelet,

²⁸ Kajar-cual, Beer-ceba, Bijiotia,

²⁹ Baala, Iyim, Ejem,

³⁰ Eltolad, Kecil, Korma,

³¹ Jiklag, Madmana, Cancana,

³² Lebaot, Cilim, Ain ki Rimmon; gin ducu gaŋi pyeraryo ki gaŋi matino ma i ŋetgi.

³³ Gaŋigi ma obedo i pwor gin ene: Ectaol, Jora, Acna,

³⁴ Janoa, Enganim, Tapua, Enam,

³⁵ Jarmut, Adulam, Coko, Ajeka,

³⁶ Caaraim, Aditaim, Gedera, ki Gederotaim; gaŋi apar wiye aŋwen ki gaŋi matino ma i ŋetgi.

³⁷ Jenan, Kadaca, Migdal-gad,

³⁸ Dilean, Mijpe, Jokteel,

³⁹ Lakic, Bojkat, Eglon,

⁴⁰ Kabon,” Lamam. Kitlic,

⁴¹ Gederot, Bet-dagon, Naama ki Makeda; gaŋi apar wiye abicel ki gaŋi matino ma i ŋetgi.

⁴² Libna, Eter, Acan,

⁴³ Ipta, Acna, Nejib,

⁴⁴ Keila, Akijib ki Mareca; gaŋi aboŋwen ki gaŋi matino ma i ŋetgi.

⁴⁵ Ekron ki gaŋi madito ki matinone ma i ŋete;

⁴⁶ dok cakke ki i Ekton cito kwede i dog nam gaŋi ducu ma gibedo yo tuŋ Acidod ki gaŋi matino ma i ŋetgi.

⁴⁷ Acidod kacel ki gaŋi madito ki matino ma i ŋete; Gaja ki gaŋi madito ki matino ma i ŋete cito wa i nota ora me Ejipt ki Nam Madit ki waŋ watte.

⁴⁸ I lobo godi, Camir, Jatir, Coko,

⁴⁹ Dana, Kiriat-cana, en aye Debir,

⁵⁰ Anab, Ectemo, Anim,

⁵¹ Gooen, Kolon ki Gilo; gaŋi apar wiye acel ki gaŋi matino ma i netgi,

⁵² Arab, Duma, Eean,

⁵³ Janim, Bettapua, Apeka,

⁵⁴ Kumta, Kiriat-arba, en aye Kebron, ki Jior; gaŋi aboŋwen ki gaŋi matino ma i ŋetgi.

⁵⁵ Maon, Karmel, Jip, Juta,

⁵⁶ Jejreel, Jokdeam, Janoa,

⁵⁷ Kain, Gibea ki Timna; gaŋi apar ki gaŋi matino ma i ŋetgi.

⁵⁸ Kalkul, Bet-jur, Gedor,

⁵⁹ Maarat, Bet-anot ki Eltekon; gaŋi abicel ki gaŋi matino ma i ŋetgi.

⁶⁰ Kiriat-baal, en aye Kiriat-jearim, ki Raba; gaŋi aryo ki gaŋi matino ma i ŋetgi.

⁶¹ Ka dok i tim, Bet-araba, Midin, Cekaka,

⁶² Nibcan ma gilwoŋo ni gaŋ me Kado, ki En-gedi; gaŋi abicel ki gaŋi matino ma i ŋetgi.

⁶³ Ento jo Jebuc, ma gin aye jo ma gibedo i Jerucalem, jo Juda pe guryemogi woko ki i lobogi, mumiyo jo Jebuc gunywako bedo kacel ki jo Juda i Jerucalem o kwede wa onyoo.