Yocwa 14 - Acoli Baibul

Gicako poko lobo Kanaan

¹ Magi aye ginaleya ma jo Icrael gulimo ki i lobo Kanaan, ma jo magi aye gupoko botgi: ajwaka Eleajar, Yocwa wod pa Nun ki ludito kaka ma i odi pa kwarogi.

² Ginaleyagi gipoko ki bolo kwir kit ma yam Rwot ociko bot Moses ni myero gipok kwede bot kaka aboŋwen ki nucu mudoŋ-ŋi,

³ Moses onoŋo yam opoko lobo aleya bot kaka aryo ki nucu ki i loka Jordan. Jo Levi keken aye pe gimiyo botgi lobo mo me aleyagi.

⁴ Likwayo pa Yucepu onoŋo gupokke i kaka aryo, jo Manace ki jo Epraim; ento pe gimiyo dul lobo mo bot jo Levi me aleyagi; gimiyogi gaŋi me bedogi keken ki olet me kwayo dyaŋigi ki Limgi mukene makwo.

⁵ Jo Icrael gupoko lobo i kingi kun gitiyo kit ma onoŋo Rwot ociko ki Moses.

Gimiyo Kebron bot Kaleb

⁶ I kare meno jo pa Juda gubino bot Yocwa i Gilgal, ci Kaleb wod pe Jepune ma jo Keniji owaco bote ni, “In iŋeyo gin ma yam Rwot ociko bot Moses ma dano pa Lubaŋa-ni, ma ociko ki i Kadec-bamea, lok ma dok i komi ki i koma.

⁷ Onoŋo doŋ mwaka me ditta romo pyeraŋwen i kare ma Moses latic pa Lubaŋa ocwala ki i Kadec-bamea pi roto lobo, ci adwogo ki lok kit ma yam tye kwede i cwinya.

⁸ Utmegiwa ma yam gucito kweda-ni gumiyo cwiny lwak oŋabbe aŋaba, ento an yam alubo gin ma Rwot Lubaŋana mito ducu kikore.

⁹ Moses okwoŋo kwoŋ i nino meno kun wacci, ‘Adada, lobo ma yam inyono ki tyeni bibedo ginaleyani ki pa likwayi matwal, pien ibedo ka lubo gin ma Rwot Lubaŋana omito ki cwinyi ducu.’

¹⁰ Kombeddi nen ka Rwot pud ogwoka atye makwo wa onyoo kit ma yam owaco-ni, odoko doŋ mwaka pyeraŋwen wiye abic a kwede wa i kare ca ma Rwot owaco iye lok man bot Moses, ma onoŋo jo Icrael pud gitye ka wirre i tim kuca; kombeddi doŋ inen, mwaka me ditta doŋ oromo pyeraboro wiye abic.

¹¹ Ento koma pud tek wa i kare man ma rom ki i kare ma yam Moses ocwala kwede ca; i kare-ni tek koma pud rom ki tek koma macon ca, pud aromo lweny, aromo cito ka mo-ni ci adwogo bene.

¹² Pienno miya lobo-ni ma bedo lobo godi, ma yam Rwot owaco pire i kare ca. Yam iwinyo i kare meno ni jo Anak gitye kunnu kun gitye ki cog gaŋigi madito ma girumogi woko ki cel matego; ka gwok nyo Rwot bibedo kweda ci abiryemogi woko kit macalo Rwot yam owaco.”

¹³ Yocwa olamo gum i kome, ci omiyo Kebron bot Kaleb wod pa Jepune wek obed ginaleyane.

¹⁴ Kit meno Kebron odoko ginaleya pa likwayo pa Kaleb wod pa Jepune ma jo Keniji o wa onyoo, pien obedo ka lubo gin ma Rwot Lubaŋa pa Icrael mito ducu kikore.

¹⁵ Nyiŋ Kebron okwoŋo bedo Kiriat-arba, dok Arba meno yam obedo dano madit makato ducu ki i kin jo Anak. Ci lobo doŋ oywe, lweny obedo pe.