Yocwa 13 - Acoli Baibul

Lobo ma odoŋ ma peya giloyo

¹ I kare ma Yocwa doŋ oti woko, ma mwaka me ditte doŋ dwoŋ, Rwot owaco bote ni, “In doŋ iti woko ma mwaka me ditti doŋ dwoŋ, ento pud lobo odoŋ mabup ma myero obed mewu.

² Magi aye nyiŋ lobo ma pud gudoŋ: lobo pa jo Pilciti ducu ki berre, ki lobo pa jo Gecur ducu.

³ (Lobo meno ducu gikwano ni pa jo Kanaan, cakke wa i Cikor ma i ŋet Ejipt yo tuŋ wokceŋ dok kwede i yo tuŋ acam o wa i waŋ lobo me Ekron; tye i te loc pa rwodi abic pa jo Piliciti, rwodi me Gaja, Acidod, Acikelon, Gat ki Ekron.) Pud odoŋ lobo ducu pa jo Ayi bene

⁴ yo tuŋ acuc; ka doki lobo ducu pa jo Kanaan cakke ki i Me-ara pa jo Cidon cito kwede wa i Apek ma i waŋ lobo pa jo Amor;

⁵ ki lobo pa jo Gebal, ki Lebanon ducu ma tuŋ kunyaŋo, cakke ki i Baal-gad ma i te got Kermon o kwede i yo ma donyo i Kamat.

⁶ An ki koma abiryemo woko ki i nyim jo Icrael jo ducu ma gibedo i lobo godi, cakke ki i Lebanon o kwede i Micrepot-maim, en aye jo Cidon ducu. In aye ipok lobo-ni bot jo Icrael ki bolo kwir wek obed ginaleyagi, kit ma yam aciki kwede-ni,

⁷ Kombeddi doŋ ipok lobo man obed me aleya pa kaka aboŋwen mudoŋ ki pa nucu kaka pa Manace.”

Lobo ma yam gipoko loka Jordan tug wokceg

⁸ Nucu kaka mukene pa jo Manace, kacel ki jo pa Reuben ki jo pa Gad onoŋo doŋ gutyeko gamo ginaleyagi ki i loka Jordan tuŋ wokceŋ, kit macalo Moses latic pa Rwot omiyo botgi,

⁹ cakke ki i Aroer ma tye i dog nota me kulu Amon ki gaŋ ma tye i dye nota-nu, kacel ki abami me Medema o wa i Dibon;

¹⁰ ki gaŋi ducu pa Cikon kabaka pa jo Amor ma yam obedo ka loc i Kecbon o kwede i waŋ apokki lobo pa jo Ammon;

¹¹ ki lobo Gilead bene, ki lobo pa jo Gecur ki jo Maaka, got Kermon ducu, ki lobo Bacan ducu o wa i Caleka;

¹² ki ker ducu pa Og ma gaŋ kalle yam gubedo Acitarot ki Edrei i lobo Bacan. En kene aye yam odoŋ ki i kin jo Repaim; kabaka aryonu Moses oloyogi, oryemogi woko.

¹³ Ento jo Icrael pe guryemo jo Gecur ki jo Maaka; jo Gecur ki jo Maaka pud gibedo i dye jo Icrael o wa onyoo.

¹⁴ Kaka pa Levi keken aye Moses pe omiyo botgi lobo mo me aleya; gityer ma giwaŋo ki mac bot Rwot Lubaŋa pa Icrael aye gubedo ma ka ginaleyagi, kit ma Rwot yam owaco bote-ni.

Kaka pa Reuben

¹⁵ Moses yam omiyo ginaleya bot kaka pa jo pa Reuben muporo dogolagi ducu.

¹⁶ Pienno waŋ lobogi ocakke ki i Aroer ma tye i dog nota kulu Amon, ki gaŋ ma tye i dye nota-nu, okwako lobo abami ducu ma orabo ŋet Medeba;

¹⁷ kacel ki Kecbon ki gaŋine ducu ma guryeyo wi abami kunnu, Dibon, Bamot-baal, Bet-baalmeon,

¹⁸ Jakaj, Kedemot, Mepat,

¹⁹ Kiriataim, Cibma, Jeret-cakar ma gigero i wi got ma i dye nota,

²⁰ Betpeor, pwor got Piciga, ki Bet-jecimot,

²¹ meno aye gaŋi ducu ma gitye i wi abami, ki ker ducu pa Cikon kabaka pa jo Amor ma gaŋ kalle yam tye i Kecbon, ma yam Moses olwenyo kwede oloyo woko, kacel ki ludito pa jo Midian ma gubedo i lobo-nu i te loc pa Cikon; nyiŋgi aye Eyi, Rekem, Jur, Kur ki Reba,

²² Balaam wod pa Beor bene, ma Latyet, obedo i kin jo ma jo Icrael gunekogi ki pala lucwan.

²³ Kulu Jordan obedo waŋ lobo pa jo Reuben. Meno aye obedo ginaleya pa jo pa Reuben ma oporo wel doggolagi, meno aye gaŋigi ki gaŋi matino ma i ŋetgi.

Kaka pa Gad

²⁴ Moses omiyo ginaleya bot jo pa Gad bene muporo wel doggolagi.

²⁵ Lobogi obedo Jajer ki gaŋi me lobo Gilead ducu, ki nucu lobo pa jo Ammon o wa i Aroer ma tye i ŋet Raba, yo tuŋ wokceŋ,

²⁶ cakke ki i Kecbon cito kwede wa i Ramat-mijpe ki Betonim, dok cakke ki i Makanaim cito kwede i waŋ lobo me Lo-debar,

²⁷ kacel ki Bet-aram, Bet-nimra, Cukot ki Japon, gaŋi ma i nota, en aye lobo mudoŋ ki i kom ker pa Cikon kabaka me Kecbon. Waŋ lobogi obedo kulu Jordan cito kwede wa i but nam me Kineret tuŋ acuc, loka Jordan tuŋ wokceŋ,

²⁸ Meno aye obedo ginaleya pa jo pa Gad muporo wel doggolagi, meno aye gaŋigi ki gaŋi matino ma i ŋetgi.

Nucu kaka pa Manace

²⁹ Moses omiyo ginaleya bot nucu kaka pa. Manace bene; opoko bot nucu kaka pa Manace muporo wel doggolagi.

³⁰ Lobogi ocakke ki i Makanaim, okwako lobo Bacan ducu, en aye ker pa Og kabaka me Bacan ducu liweŋ, ki gaŋi me Jair ducu ma gitye i Bacan, gaŋi pyerabicel,

³¹ ki nucu lobo Gilead, kacel ki Acitarot ki Edrei ma gin aye gaŋ kal pa Og i lobo Bacan. Meno ducu gipoko bot jo pa Makir wod pa Manace, pi nucu kaka pa jo Makir muporo wel doggolagi,

³² Meno aye ginaleya ma yam Moses opoko i lobo aroo me Moab ma loka Jordan tuŋ wokceŋ mukemo Jeriko.

³³ Ento ki tun bot jo Levi Moses pe omiyogi ginaleya mo; onoŋo Rwot Lubaŋagi aye obedo ginaleyagi, kit ma yam owaco botgi-ni.