Yocwa 11 - Acoli Baibul

Jo Icrael guloyo Jabin ki jo muribbe kwede

¹ Ka Jabin kabaka me Kajor owinyo pire, ci ocwalo kwena bot Jobab kabaka me Madon, ki bot kabaka me Cimron ki kabaka me Akicap,

² ki bot luker ma gitye yo tuŋ acam i lobo godi, ki i Araba i ŋet nam me Kinerot yo tun acuc, ki i lobo ma i pwor, ki i Napot-dor ma yo tun potoceŋ,

³ bot jo Kanaan ma yo tun wokceŋ ki tun potoceŋ, ki bot jo Amor, jo Kit, jo Perej, jo Jebuc ma i lobo godi, ki jo Kiv ma i te got Kermon i lobo Mijpa.

⁴ Luker meno ducu gubino ki buca monygi ducu, mony madwoŋ ma welgi rom ki kweyo me dog nam, ki lwak aguragura ki gadigadi lweny mapol.

⁵ Gutoro monygi ducu kacel, ci gubino” gugony kacel i ŋet pii me Merom pi lweny i kom jo Icrael.

⁶ Rwot owaco bot Yocwa ni, “Pe lworo omaki i komgi, pien diki ca onyoo noŋo doŋ amiyogi i ciŋ-jo Icrael, noŋo doŋ gunekogi woko ducu. Wubitoŋo odoŋ aguraguragi ducu, wuwaŋo gadigadi lwenygi woko ki mac.”

⁷ Yocwa ocito opoto i komgi atura ki lwak monnye ducu ki i ŋet pii me Merom, olwenyo kwedgi.

⁸ Ci Rwot omiyogi i ciŋjo Icrael, gulwenyo i komgi matek, guryemo korgi o kwede wa i Cidon Maditte ki i Micrepot-maim, yo tun potoceŋ ki wa i nota me Mijpe yo tuŋ wokceŋ kun ginekogi weŋ ma acel mo pe guweko obwot.

⁹ Yocwa otimogi kit ma nene Rwot ocike kwede; otoŋo odoŋ aguraguragi ducu, owaŋo gadigadi lwenygi woko awaŋa.

¹⁰ Ka man otum, Yocwa odok cen ka mako Kajor, oneko kabakane ki pala lucwan. I kare ca onoŋo Kajor aye gaŋ madit ma loyo lwak ker meno ducu.

¹¹ Jo Icrael guneko jo ma onoŋo gitye iye ducu ki pala lucwan, gujwerogi woko liweŋ, pe guweko gin mo makwo obwot; ci guwaŋo Kajor woko.

¹² Kit meno Yocwa omako luker meno ducu, ki gaŋigi, onekogi woko ki pala lucwan, omedo ki jwerogi woko liweŋ macalo gin ma gidyero bot Rwot, kit ma Moses latic pa Rwot onoŋo ocike kwede-ni,

¹³ Ento jo Icrael pe guwaŋo gaŋi ma gigero i wi lobo ma gitoro malo macalo got-ti, kono Kajor keken aye Yocwa owaŋo woko.

¹⁴ Jo Icrael guyako gaŋi meno ducu, gutero lim makwo ki jami ma guyako obedo megi; ento guneko dano woko ducu ki pala lucwan nio ka gutyekogi woko ducu, pe guweko gin mo makwo obwot.

¹⁵ Kit macalo Rwot yam ociko ki laticce Moses, Moses bene ociko ki Yocwa kit meno, ci Yocwa oketo i tic; otiyo gin ducu ma yam Rwot ociko ki Moses, pe oweko cik mo odoŋ ma pe ocobo kakare.

¹⁶ Yocwa omako lobo meno ducu kit meno, lobo godigodi, ki Negeb ducu, lobo Gocen, pwor got. Araba ki lobo godi me Icrael ki lobo pwor-gu ma i ŋete,

¹⁷ cakke wa i kom got Kalak ka ma lobo otiŋŋe odok kwede tuŋ Ceir, o wa i Baal-gad ma i nota Lebanon ma i te got Kermon. Omako lukergi ducu, onekogi woko.

¹⁸ Yocwa obedo ka lweny ki luker meno pi kare malac.

¹⁹ Pe tye gaŋ mo ma oyubo lok me kuc ki jo Icrael, kono nyo jo Kiv ma gibedo i Gibeon keken; gaŋi ducu gumakogi ki lweny,

²⁰ pien Rwot aye obedo ka miyo cwinygi obedo tek wek gubin ka lweny i kom jo Icrael ka wek gujwergi woko liweŋ ma pe kica mako dano mo i komgi, ento ginekgi woko, mo pe odoŋ, kit ma yam Rwot ociko ki Moses.

²¹ I kare meno bene Yocwa ocito ka jwero jo Anak woko ki i lobo godi; ojwerogi ki i Kebron, Debir ki Anab, i lobo godi me Juda ki me Icrael; ojwerogi woko liweŋ kacel ki gaŋigi ducu.

²² Pe guweko jo Anak mo obwot, ki i lobo pa jo Icrael; kono nyo i Gaja keken ki i Gat ki i Acidod, kunnu aye jo Anak mogo gudoŋ iye.

²³ Yocwa omako lobo ducu kit meno, kit macalo yam Rwot oloko bot Moses; lacen omiyo bot jo Icrael me bedo ginaleyagi i kakagi, ma lubo kit ma kwir omakogi kwede, ci lobo doŋ ocako ywe, lweny doŋ obedo pe.