Yocwa 1 - Acoli Baibul

Yubbe pi camo lobo Kanaan

¹ Ka Moses latic pa Rwot doŋ oto woko, Rwot owaco bot Yocwa wod pa Nun ma lakony pa Moses ni,

² “Laticca Moses doŋ oto woko; pienno in aye doŋ ia malo, iciŋol loka Jordan man, in ki lwak jo-ni ducu, wucit wa i lobo ma abemiyo botgi-ni, ma abimiyo bot gin jo Icrael.

³ Kabedo ducu ma tyenwu binyono abimiyo botwu, kit ma yam aciko ki Moses.

⁴ Cakke wa i tim ki i Lebanon kany o kwede wa i kulu madit, en aye kulu Euprate, lobo ducu pa jo Kit nio wa i Nam Madit ma yo tuŋ potoceŋ, ducu bibedo lobowu,

⁵ Pe tye dano mo ma bicuŋ i nyimi i kare me kwoni ducu. Kit ma yam abedo ki Moses, abibedo kwedi kit meno; pe abibwoti, pe abitenyi ata.

⁶ Bed oteka ma cwinyi nwaŋ, pien ibimiyo rok man leyo lobo ma yam akwoŋo pire bot kwarowu ni abimiyo botgi.

⁷ Ento bed oteka ma lacwinye nwaŋ, bed ma igwokke ka lubo cik ma yam laticca Moses ociki kwede i gin ma itiyo ducu; pe iŋak idok yo tuŋ acuc nyo yo tuŋ acam, wek ibed ki gum maber i kabedo ducu ma ibicito iye.

⁸ Buk man me cik pe bia ki i dogi, ento ibibedo ka Iwodone i cwinyi dyeceŋ ki dyewor, wek igwokke ka lubo gin ducu ma gicoyo iye-ni, Kit meno bimiyo nyimi bedo maleŋ, ka dok ticci ducu bicobbe kakare.

⁹ An doŋ atyeko ciki ba. Bed oteka ma cwinyi nwaŋ; pe komi omyel, pe cwinyi oryaŋŋe, pien Rwot Lubaŋani tye kwedi ka ma iwoto iye ducu.”

¹⁰ Yocwa ociko ludito ma giloyo lwak ni,

¹¹ “Wuwot i dye gony ka ciko lwak ni, ‘Wuyub camwu; pien odoŋ nino adek ci wucito ka ŋolo loka kulu Jordan, wucito iye ka camo lobo ma Rwot Lubaŋawu omiyo botwu me bedo mewu.’ ”

¹² Yocwa dok owaco bot jo Reuben, jo Gad ki nucu kaka pa Manace ni,

¹³ “Wupo lok ma yam Moses latic pa Rwot ocikowu kwede kun wacci, ‘Rwot Lubaŋawu doŋ otyeko miyowu kabedo me yweyowu, en doŋ omiyowu lobo man.’

¹⁴ Monwu ki litinowu ki dyaŋiwu gibidoŋ i lobo ma yam Moses omiyo botwu i ŋe Jordan kany; ento oteka lweny ma gitye i kinwu ducu gibikato loka ca ki jami lwenygi ducu i nyim omegigi pi konyogi,

¹⁵ nio ka Rwot omiyo yweyo bot omegiwu macalo omiyo botwu-ni, ci gin bene gicamo lobo ma Rwot Lubaŋawu omiyogi. Ka doŋ wubidok i lobo ma mewu-ni, ci doŋ wubibedo iye matwal, en aye lobo ma yam Moses latic pa Rwot omiyo botwu i ŋe Jordan kany ma tuŋ wokceŋ.”

¹⁶ Ci gugamo dog Yocwa ni, “Gin ma doŋ iciko ducu wabitiyo, dok ka ma icwalowa iye ducu wabicito.

¹⁷ Kit macalo yam waworo dog Moses i lok ducu-ni, wabiworo dogi bene kit meno. Rwot Lubaŋa keken aye obed kwedi, kit ma yam obedo ki Moses!

¹⁸ Dano mo ka okwero lokki ce ojemo i kom cikki ki gin ducu ma iciko, gibineke woko. In aye ibed oteka ma cwinyi nwaŋ.”