Yakobo 4 - Acoli Baibul

Mako Iarem ki lobo

¹ Gin aŋo ma kelo mony, ki gin aŋo ma kelo lweny i kinwu? Pe par ma wutye kwede aye tye ka lweny i dul komwu?

² wumito wunoŋ jami, ento pe wunoŋo, ci wucako neko dano. Dok wuparo jami pa jo mukene, ento pe wunoŋo, ka doŋ wuero lweny ki mony. Pe wunoŋo gin ma wumito, pien pe wulego.

³ Wulego, pe wunoŋo, pien wulego marac, wulego ni wunoŋ wek wuti kwede me cobo mitiwu keken.

⁴ Wun jo mubolo laremwu woko. Pe wuŋeyo ni, mako larem ki lobo miyo dano doko lakwor pa Lubaŋa? Pi meno, ŋat ma mito mako larem ki lobo lokke kene doko lakwor pa Lubaŋa.

⁵ Nyo wutamo ni, lok ma yam gicoyo lok ma tere pe ni, “En tye ki par madwoŋ twatwal ki nyeko i kom cwiny ma yam en oketo ni obed i iwa?”

⁶ Ento en medde ki miyo kicane; pi meno, lok ma yam gicoyo waco ni, “Lubaŋa pyem ki jo ma wakke, ento miyo kica bot jo mamwol.”

⁷ Pi meno, wumine me bedo i te loc pa Lubaŋa. Wulweny matek ki Catan, ci en biriŋowu woko.

⁸ Wunyik cok bot lubaŋa, ci en bene binyiko cok botwu. Wulwok ciŋwu woko, wun lubalo, ka doŋ wulony cwinywu obed maleŋ, wun jo ma tamwu tye aryo.

⁹ Cwinywu myero owaŋ, wukum, wukok bene. Nyerowu myero olokke odok kumo, ki yomcwiny ma wutye kwede olokke odok can.

¹⁰ Wumwolle kenwu i nyim Rwot, ci en bitiŋowu malo.

Ŋolo kop i kom omeru

¹¹ Utmegina, pe wulok lok mo marac kun ŋat acel acel loko i kom lawote. Ŋat ma loko lok marac i kom ominne, nyo ŋolo kop i kom ominne, noŋo oloko lok marac i kom cik, noŋo doŋ bene oŋolo kop ki cik. Ento ka in iŋolo kop ki cik, in doŋ pe lacob cik ento idoko laŋolkop.

¹² Lami-cik ki laŋolkop tye acel, en twero larowu ki nekowu. In aŋa mono ma iŋolo kop i kom lawoti-ni?

Pe iwakke pi nino ma diki

¹³ Koŋ wuwiny lokka, wun ma wuwaco ni, “Tin nyo diki wabicito i gaŋ munyo, wabityeko kunnu mwaka acel kun wacato wil dok wanoŋo magoba,”

¹⁴ kun kono pe wuŋeyo lok ma bitimme diki. Kwowu tye niŋniŋ? Wun wubedo calo lupu ma nen pi kare manok mo keken, ci lacen ke woko.

¹⁵ Ma ka loko lok kit meno, onoŋo myero wuwacci, “Ka Rwot oye, wabibedo kwo, wabitimo man nyo maca.”

¹⁶ Ento wun lunyatte, dok wuwakke bene. Lakit wakke macalo meno ducu rac.

¹⁷ Ŋat ma ŋeyo gin ma atir ma myero etim, ce pe otimo, noŋo doŋ otimo bal.