Yakobo 3 - Acoli Baibul

Leb

¹ Utmegina, pe myero jo mapol i kinwu gudok lupwony, pien wuŋeyo ni wan lupwony gibiŋolo kop mapek i wiwa makato jo mukene.

² Wan ducu ŋat acel acel timo lwak roc mapol, ento ka ce inen ŋat mo pe roco i gin ma en loko, ci dano-nu noŋo dano maber twatwal, twero loyo kome ducu.

³ Wan warwako nyonyo i dog aguragura wek guwinywa, ci wawiro komgi ducu dok tuŋ ka ma wamito.

⁴ Koŋ wunen mel, ginen doŋo mada, dok yamo aye ma kologi, ento ŋat ma kwaŋo twero wiro cito ka ma en mito ki latin pol mo matidi keken.

⁵ Kit meno, leb obedo dul kom ma nen tidi mo, ento wakke mada i jami madoŋo. Nen kit ma mac matidi mo keken waŋo kwede buŋa madit!

⁶ Leb bene obedo calo mac. I kin dul komwa leb rom ki lobo ma gin ma en tiyo pe atir, ci balo komwa woko ducu, cwinyo mac i kwowa, i kit ma kwo wirre kwede ducu; mac me Geena moko i kome.

⁷ Dano twero loyo kit lee ducu, wa winyi, twol-gu ki ginaketa ducu ma bedo i nam, dok bene giloyogi woko yam con.

⁸ Ento pe tye dano mo ma twero loyo leb. Leb aye twon gin mo ma pe jukke, opoŋ ki kwir ma neko dano.

⁹ Leb en aye gin ma wapwoyo kwede Rwot Lubaŋa Wonwa, en leb acel-lu bene waceno kwede dano ma giketogi i cal pa Lubaŋa.

¹⁰ Pwoc ki ceno dano a i dog acel-lu. Utmegina, pe myero obed kit meno.

¹¹ Waŋ it acel twero mol iye pii mamit ki makecce?

¹² Utmegina, oduro mono twero nyak yaa? Nyo olok twero nyak oduro? Kit meno pii mamit bene pe twero mol kun a ki i waŋ it ma piine obedo kado kado.

Ryeko mua ki malo

¹³ Aŋa i kinwu ma ryek dok niaŋ jami? En myero onyut tic me ryekone ki mwolo, pi kwone maber.

¹⁴ Ento ka wutye ki nyeko marac i cwinywu, ki laro dito, pe wuwakke, pe bene wuwac lok goba i kom lok ada.

¹⁵ Kit ryeko macalo meno pe oa ki i polo ento obedo me lobo, pe woro lubaŋa, ento pa Catan.

¹⁶ Pien ka ma nyeko ki laro dito tye iye, inoŋo anyobanyoba ki tim ducu maraco tye iye.

¹⁷ Ento ryeko mua ki malo, mukwoŋo bedo leŋ, dok bedo me kuc, me mwolo, gamo tam ducu mabeco, opoŋ ki kica, ki nyako nyig maber, ŋat ma tye kwede pe poko kin dano, bedo ma cwinye atir.

¹⁸ Jo ma kelo kuc gicoyo kodigi i kuc me nyako kit ma atir.