Yakobo 2 - Acoli Baibul

Apokapoka ma tere pe

¹ Utmegina, kit macalo doŋ wuye Rwotwa Yecu Kricito kwede-ni, ma en Rwot me deyo, pe dok wuket apokapoka mo i kin dano.

² Pien ka ce won agit jabu oruko boŋŋi mabeco obino kwede i cokkewu, ki lacan bene oruko boŋŋi mucido,

³ wukwoŋo tamo pi dano ma oruko boŋŋi mabeco-ni, kun wuwaco ni, “Bed kany, ladit,” ento bot lacan wuwacce ni, “Cuŋ kuca,” nyo ni, “Bed piny ka tyena kany.”

⁴ Meno noŋo pe doŋ wukelo apokapoka woko i kinwu kekenwu, kun wudoko bene luŋolkop ma tamwu ogom woko?

⁵ Wuwiny ba, utmegina ma amaro, pe Lubaŋa aye muyero jo ma lucan i wi lobo wek gubed lulonyo i niye, dok me miyogi ker ma yam ociko ni ebimiyo bot jo ma mare?

⁶ Ento wun wuketo lewic i kom lucan. Pe lulonyo aye ma burowu? Pe gin aye ma ywayowu kun giterowu tektek i nyim lukiko?

⁷ Pe gin aye luyet nyiŋ maber ma gilwoŋowu kwede?

⁸ Ka ce wumako cik me ker pa Lubaŋa kit ma yam gicoyo kwede i ginacoya ni, “Mar lawoti macalo imarre keni,” noŋo wutimo ber;

⁹ ento ka ce wupoko kin dano, noŋo wutimo rac, noŋo cik ŋolo kop i komwu ni wun lubalo.

¹⁰ Pien ŋat ma gwoko cik ducu, ka ce opoto i cik acel keken, noŋo oturo cik ducu.

¹¹ Pien ŋat ma owaco ni, “Pe itim abor,” owaco bene ni, “Pe ineki.” Ka inen ce pe itimo abor ento ineko dano, noŋo doŋ ituro cik.

¹² Lok ma wuloko, ki gin ma wutiyo, myero obed macalo pa jo ma gibiŋolo kop botgi i te cik ma kelo kuc.

¹³ Pien ŋolo kop pe timo kica bot ŋat ma yam pe otimo kica; ento latim kica pe lworo laŋolkop.

Niye ma pe ki tic

¹⁴ Konyo gin aŋo, utmegina, ka ŋat mo waco ni etye ki niye kun pe keto i tic? Ci niye meno twero lare?

¹⁵ Ka ce omeru nyo lameru boŋone pe, kun cam me nino ducu bene remo,

¹⁶ ci ŋat mo i kinwu waco botgi ni, “Wucit ki kuc, komwu obed momor, wuyeŋ,” kun pe wumiyo botgi gin mo ma mitte pi pito kom, ci meno konyo aŋo?

¹⁷ Kit meno, niye kene ka pe giketo i tic, doŋ oto woko.

¹⁸ Ŋat mo biwaco ni, “In itye ki niye, ento an atye ki tic; nyutta niyeni laboŋo tic mo, ka doŋ abinyutti niyena ki ticca.”

¹⁹ Iye ni Lubaŋa tye acel, itimo ber. Kadi cen-gu bene giye kit meno, dok komgi myel.

²⁰ In lamiŋ, imito ginyutti ni, niye ma pe ki tic konnye pe?

²¹ Kwarowa Abraim yam pe gikwano ni kite atir pi tic, i kare ma en otyero wode Icaka me bedo gitum i wi keno tyer?

²² Doŋ ineno ni niyene yam ocobbe ki tic,

²³ omiyo lok ma yam gicoyo ocobbe kakare ni, “Abraim oye Lubaŋa, omiyo gikwane ni en dano ma kite atir”; dok bene gilwoŋe ni en larem Lubaŋa.

²⁴ Doŋ ineno ni dano gikwane ni kite atir pi tic, ento pe pi niye keken.

²⁵ Kit meno bene, Rakab, dako ma malaya, pe yam gikwane ni kite atir pi ticce, i kare ma yam en ojolo lukwena ka ocwalogi gucito woko i yo mukene?

²⁶ Kit macalo ka yweyo doŋ pe i kom, noŋo kom doŋ oto woko, kit meno bene, niye ka pe giketo i tic, noŋo doŋ oto woko.