Yakobo 1 - Acoli Baibul

Mot

¹ Waraga man oa ki bot Yakobo ma latic pa Lubaŋa ki Rwotwa Yecu Kricito. Bot kaka apar wiye aryo ma guket woko ata: Amotowu ba.

Niye ki mwolo

² Utmegina, wubed ki yomcwiny madwoŋ ka gitemowu i yo mapatpat,

³ pien wuŋeyo ni temo niyewu miyo wudiyo cwinywu.

⁴ Wek diyo cwiny ocob ticce kakare, wek wubed jo muteggi, ma roc mo pe i komwu, dok wubed ma gin mo bene pe orem botwu.

⁵ Ka ce tye ŋat mo i kinwu ma ryekone nok, myero en oleg Lubaŋa ma miyo bot jo ducu ki yomcwiny, kun pe twono ŋat mo; ci bimiye.

⁶ Ento myero en oleg ki niye, ma pe kalo akala; pien ŋat ma kalo akala rom ki pii me nam ma twagge, ma yamo coro tagge atata.

⁷ Kit dano macalo meno myero pe otam ni ebinoŋo gin mo ki bot Rwot,

⁸ pien en obedo ma tamme aryo, ma pe cuŋ matek i kit yo me kwone ducu.

Can ki lonyo

⁹ Lacan myero owakke ka gitiŋe malo,

¹⁰ lalonyo bene kit meno myero owakke ka gidwoke piny; pien lalonyo birwenyo woko calo tur lum.

¹¹ Pien ceŋ tuc ki lyetone matek, ci nero lum, ture o, berre bene rwenyo woko. Lalonyo bene kit meno birwenyo woko ata i dye ticce me kare ducu.

Temo cwiny ki bita

¹² Ŋat ma gitemo cwinye ka ocuŋ matek tye ki gum; pien ka doŋ giteme, ce en oloyo, ci binoŋo mot me lalukana me kwo ma Rwot ociko me miyo bot jo ma en maro.

¹³ ka gibito ŋat mo, en pe myero owacci, “Lubaŋa aye ma bita”, pien Lubaŋa pe gibito ki tiyo gin marac, en bene pe bito ŋat mo.

¹⁴ Dano acel acel gire mitine kene aye ma bite, ywaye, kun omo cwinye.

¹⁵ Miti ka oyac ci nywalo bal. bal ka doŋ odoŋo muteggi nywalo to.

¹⁶ Utmegina ma amaro, pe wuwek gibwolwu.

¹⁷ Pien kit gin mo ducu maber, ki mot ducu mabeco twatwal ma gimiyowa, a ki malo, a ki bot Lubaŋa Won bino piny, ma en aye won gin ducu ma ryeny i polo, ma pe tye ki alokaloka mo, dok tipo mo ma nyuto lokkene bene pe.

¹⁸ pi mitine gire kene, en onywalowa ki lokke me ada, wek wabed calo cam ma i poto mukwoŋo cek ki i kin ginaketa ducu.

Winyo lok ki tiyone

¹⁹ Utmegina ma amaro, wuŋe lok man. Dano acel acel myero owiny lok oyotoyot, ento pe myero orune me gamone, dok bene myero odi kinigane.

²⁰ Pien kiniga pa dano pe cobo tic ma atir i nyim Lubaŋa.

²¹ Wubol woko cen gin ducu me lewic ki tim maraco ma doŋ onya botwu, wugam lok pa Lubaŋa ma opito i iwu ki mwolo, pien twero laro tipowu.

²² Ento wubed jo ma keto gin ma giloko i tic, pe wubed jo ma winyo awinya keken kun wubwolle kenwu.

²³ Pien ka ce dano mo obedo lawiny lok keken ma pe tiyo, ci bedo calo ŋat ma ŋiyo waŋe ma ginywale kwede i kiyo.

²⁴ Ento ka doŋ otyeko ŋine kekene, cito woko, wiye wil woko oyotoyot i calle ma en obedo ka nenone twatwal-li.

²⁵ Ento ŋat ma neno cik maber ma kelo kuc, ka ori iye, ma pe bedo calo ŋat ma winyo ka dok wiye wil woko, ento ŋat ma keto lok ma en owinyo i tic, gibimiye gum i gin ma en otiyo ducu.

²⁶ Ka ce dano mo otamo ni en ladini kun pe juko lebe, noŋo bwolle abwola kene ki i cwinye, dinine-nu konnye pe.

²⁷ Dini me ada maleŋ, ma cilo pe iye i nyim Lubaŋa Wonwa en ene: konyo litino kic ki mon ma coggi oto i kom can ma gitye kwede, ki gwokke ken i kom bal me lobo.