Obadia 1 - Acoli Baibul

Lubaŋa bijuko wakke pa jo Edom

¹ Man en lok ma Lubaŋa onyuto bot Obadia, Rwot Lubaŋa owaco lok man ma okemo Edom. Wan doŋ wawinyo lok mua ki bot Rwot, gityeko cwalo lakwena me cito bot lurok ka waco ni. “Wua malo! Wek wacitu ka lweny kwede!”

² Rwot owaco bot jo Edom ni, “Nen, abimiyo wudoko jo manok i kin lurok, ma jo ducu bicayowu matek mada,

³ Wakke ma tye i cwinywu onoŋo obwolowu, wun jo ma wubedo i kin got mubar, ma wubedo i kabedo ma tye malo twatwal-li, ka doŋ wuwaco ki i cwinywu ni, ‘Aŋa kono ma twero dwoka piny i ŋom!’

⁴ Kadi bed wubed malo calo ocur, kadi wuger odiwu malo i kin lakalatwe, ento pud abicorowu woko piny aye ki kunnu. Man lok pa Rwot kikome.

⁵ “Ka ce lukwo ma gin luyak gubino botwu dyewor, kadi bed giyak jamiwu mukato kare, gin pe gibikwalo ka jami ma romogi keken? Ka ce lupwon nyig olok gubino botwu, nyig olok mogo pe twero doŋ ma dok wubibekone lacen?

⁶ Giyako Ecau marac twatwal guyenyo wa lonyo ducu ma yam en okano!

⁷ Jo ducu ma yam wuribbe kwedgi gubwolowu abwola, guryemowu guterowu wa i waŋ lobo; gin jo ma yam wubedo kwedgi ki kuc-ci doŋ guloyowu woko; ki luremwu ma yam wugenogi bene guciko owic ka ma wuwoto iye, ma niaŋ iye tek mada,

⁸ I nino meno en aye abityeko iye jo ma ryek woko ki i Edom, kacel ki jo ma giniaŋ bene ma gibedo i got Ecau, Man lok ma Rwot kikome aye oloko,

⁹ Dok in Teman, jo ma gin twoni lwennyi komgi bionyo koyo woko lirut, dok dano acel acel ma bedo i got Ecau gibineko woko.

¹⁰ Pi tim me bwami ki nek ma itimo i kom omeru Yakobo, lewic bimaki pire matek, in bene gibineki dok nyiŋi birwenyo woko matwal. Gin mumiyo giketo can i kom jo Edom

¹¹ “I nino ma onoŋo wucuŋ cen ca, i nino ma welo mogo guyako iye lonyone gucito kwede woko-ni, kun lurok bene gudonyo i dogcelle ka gubolo kwir pi Jerucalem, wun bene wubedo rac calo gin.

¹² Onoŋo pe bedo ber botwu me bedo ki yomcwiny i nino meno pi gin marac ma otimme i kom omegiwu; pe ber onoŋo me um i kom jo Juda, i nino ma gijwerogi iye. Dok pe obedo ber wun me wakke awaka i nino ma can opoto i komgi.

¹³ Onoŋo myero pe wudony i dogcel pa lwakka i nino ma onoŋo can opoto i komgi; pe onoŋo myero wubed ki um pi can mumakogi i nino me can madwoŋ mupoto i komgi; onoŋo myero pe wugud jamigi mo i nino ma can madwoŋ opoto ikomgi.

¹⁴ Pe onoŋo myero wucuŋ i aŋakaŋaka yo me ŋolo jo munoŋo giriŋo woko me laro komgi; dok pe onoŋo myero doŋ wumak danogi ma gubwotte ki miyogi i cin lukworgi, i nino me can.

¹⁵ Pien nino pa Rwot doŋ cok bino i kom rok ducu. Gin ma wun doŋ wutyeko timo, gibitimo i komwu bene, tim mewu bidwogo i wiwu gire.

¹⁶ Kit gin ma wubedo ka matone i wi got mera maleŋ, rok ducu ma orumowu bene gibimato; gibimato matek dok gibimwonyo woko, ci gibidoko macalo jo ma yam gipe. Jo ‘Icrael ma gubwot gibilogi malo

¹⁷ “Ento jo mubwot gibibedo i wi got Cion, ci bibedo kabedo maleŋ; jo me ot pa Yakobo gibibedo ki lobo ma megi kikome.

¹⁸ Jo me pt pa Yakobo gibidoko mac, ki jo me ot pa Yucepu gibibedo leb mac, jo me ot pa Ecau gibibedo megi ren kaal; gibiwaŋogi ci gibityekogi woko ducu, pe tye dano mo me ot pa Ecau ma, bidoŋ; pien Rwot doŋ otyeko loko.

¹⁹ Jo Negeb gibileyo got Ecau, jo Cepela bileyo lobo pa jo Piliciti; gibileyo lobo Epraim ki lobo Camaria ento Benjamin bileyo Gilead.

²⁰ Jo Icrael ma giterogi i opii i Kalak, gibileyo Kanaan nio wa Jarepat; ki opii ducu ma yam gimakogi ki i Jerucalem ma gitye i Ceparad gibileyo gaŋi ducu me Negeb.

²¹ Lular dano gibibino giito malo i wi got Cion me loyo got Ecau; Rwot aye bibedo lakergi.”