Nwoyo Cik 8 - Acoli Baibul

Lobo maber ma jo Icrael gibicamo

¹ “Cik ducu ma atye ka cikowu kwede tin-ni ber, wunen ni wulubo gi, wek wubed makwo, wunya mapol, wucit wucam lobo ca ma yam Rwot okwoŋo pire ni ebimiyo bot kwarowu.

² Dok myero wupo kom yo ducu ma yam Rwot Lubaŋawu otelowu iye i tim pi mwaka pyeraŋwen, wek emi wudok mamwol, kun temo iwu wek eŋe gin ma tye i cwinywu, ka nyo wubimako cikke, nyo pe.

³ Kit meno en omiyo wudoko mamwol, dok omiyo kec onekowu, ci opitowu ki manna ma onoŋo yam pe wuŋeyo, kadi wa kwarowu bene yam pe guŋeyo; wek oniaŋwu ni, dano pe kwo ki kwon keken, ento dano kwo ki lok ducu ma a ki i dog Rwot.

⁴ Boŋŋi arukawu yam pe guti gutum woko ki i komwu, tyenwu bene yam pe okwot, i kin mwaka pyeraŋwen kulu.

⁵ Doŋ myero wuŋe ki i cwinywu ni, Rwot Lubaŋawu tye ka tiro kitwu macalo dano tiro kwede kit latinne.

⁶ Pi meno, wugwok cik ducu pa Rwot Lubaŋawu, kun wuwoto ma wulubo yone dok kun wulwore.

⁷ Pien Rwot Lubaŋawu tye ka terowu i lobo maber, ma opoŋ ki lwak nota ora ma igi ki pii, ki waŋ it ki waŋ pii maloŋo, ma gimol ki i nota ki i wi godi.

⁸ En lobo ma ceko ŋano ki cayiri, ki ma ceko olok ki oduro ki okwer pomegranat, lobo ma moo jeituni ki moo kic dwoŋ iye.

⁹ En lobo ma wubicamo iye cam mabup laboŋo can gin mo, ka ma gin mo pe birem iye botwu; en lobo ma gweŋŋe bedo nyonyo, ka ma wubikwinyo iye mola ki i cere.

¹⁰ Wubicam wubiyen, ci wubipwoyo Rwot Lubaŋawu pi lobo maber ma omiyowu-ni.

Wilwic i kom Rwot bikelo can

¹¹ “Wugwokke kekenwu wek pe wiwu owil woko i kom Rwot Lubaŋawu, kun pe doŋ wugwoko lok ma en ociko; ki gin ma oŋolo, ki lwak cikke ducu ma atye ka cikowu kwede tin;

¹² wek wiwu pe ocak doko dito ka doŋ wucamo, wuyeŋ, ma doŋ wugero odi mabeco ma wubedo iye,

¹³ dok ka dyaŋiwu ki romiwu doŋ onya mapol, ki ryalwu ki jabuwu omedde madwoŋ, ki jami ducu ma wutye kwedgi doŋ onya omedde madwoŋ,

¹⁴ Pe wiwu owil woko i kom Rwot Lubaŋawu, ma yam okwanyowu woko ki i lobo Ejipt, ki i ot me opii ca,

¹⁵ ma yam otelo wiwu wuwok kwede i tim malac ki malik bene, ma tye iye lwak twol ma kwirgi kec, ki oton, ki lobo ma orwo pii mako iye dano, ma pii pe iye-ni, ci en okelowu pii mua ki i pata got.

¹⁶ En bene opitowu i tim ki manna ma yam kwarowu pe giŋeyo, wek elokwu wudok mwol, kun temo ki cwinywu, wek otimwu ber lacen.

¹⁷ Wugwokke wuwek Lwodo lok ki i cwinywu ni, “Tek koma ki twero me bada gira aye omiyo alimo lonyo man.’

¹⁸ Wun wubipo i kom Rwot Lubaŋawu, pien en aye ma miyowu tek me limo lonyo; wek en omok gicikkene ma yam okwoŋo pire bot kwarowu, macalo pud tye wa kombeddi.

¹⁹ Ka ce wiwu owil woko i kom Rwot Lubaŋawu, ci wucako lubo kor lwak lubaŋa mukene, ki tiyo botgi ki ryebbe piny i nyimgi, atitowu atyer tin ni, wubito wutum woko liweŋ.

²⁰ Wubito wutum woko macalo lurok ma Rwot tye ka miyogi to gitum woko ki i nyimwu-ni, pien pe wumedo ki woro dog Rwot Lubaŋawu,