Nwoyo Cik 7 - Acoli Baibul

Jo Icrael gin rok maleŋ bot Rwot

¹ “Rwot Lubaŋawu tye ka terowu i lobo ma wubidonyo iye ka camone me bedo mewu, dok en biryemo rok mapol woko ki i nyimwu, jo Kit, jo Girgac, jo Amor, jo Kanaan, jo Periji, jo Kiv ki jo Jebuc, gin rok ducu abiro ma gidito dok gitego makatowu.

² Ka Rwot Lubaŋawu omiyogi i ciŋwu ci wuloyogi, ci myero wudyergi i ciŋ Rwot, wujwergi woko liweŋ, Pe wuket gicikke mo kwedgi, pe wutimgi kica.

³ Pe wunyomme kwedgi kun wumiyo anyirawu bot awobegi nyo wunyomo anyiragi ki awobewu.

⁴ Pien gibiloko cwinyawobewu woko, pe dok gibilubo kora, ento gibiworo lubaŋa mogo mukene; ci miyo kiniga mako Rwot i komwu, en bityekowu woko oyot.

⁵ Ento wubitimogi kit man: wubimuko keno jogigi woko, wubinido wir jogi woko, wubitoŋo yadi ma gipito ka ma giworo iye jok ma dako ma gilwoŋo Acera, ki waŋo cal apayagi ki mac.

⁶ “Pien wun aye wudoko jo maleŋ pi Rwot Lubaŋawu, Rwot Lubaŋawu otyeko yerowu ki i kin rok ducu ma tye i wi lobo wubed jone kikome.

⁷ Gin mumiyo mar pa Rwot Lubaŋawu omoko i komwu ci oyerowu, pe ni wun aye welwu dwoŋ makato rok mukene, pien onoŋo wun yam wunok i kin rok ducu.

⁸ Rwot yam okwanyowu woko ki twero me bade, okokowu ki i ot me opii ki i ciŋ Parao kabaka me Ejipt pien en marowu, dok tye ka cobo kwoŋ ma yam en okwoŋo bot kwarowu.

⁹ Myero doŋ wuŋe ni, Rwot Lubaŋawu en Lubaŋa kikome, Lubaŋa ma genne, ma gwoko gicik kene, dok gwoko mar mere ma pe lokke bot jo ma gimare ki ma gimako lok ma en ociko ducu, nio wa i yalwak alip kulu.

¹⁰ Dok eo culo kwor i kom jo ma gikwere kikomgi, kun nekogi woko. En pe bijalo dano ma okwere; biculo kwor i kom dano meno kikome.

¹¹ Pi meno wugwokke wek wulub lok ma en ociko ki cik ducu ki gin ma en oŋolo ducu ma acikowu kwedetin.

Gum ma bino pi gwoko cik

¹² “Pien wun wuwinyo cik magi ma giŋolo, kun wugwokogi dok wucobogi, miyo Rwot Lubaŋawu bene bigwoko gicikkene kwedwu, ki mar mere ma pe lokke ma yam en okwoŋo pire bot kwarowu.

¹³ En bimarowu, bimiyowu gum, dok bimiyo wunya mapol; bimiyo gum i kom litino ma wubinywalo ki i kom gin ma bicek i potowu, kalwu ki koŋo vinowu ki moo mewu, kacel ki litino ma dyaŋiwu ki romiwu binywalo, i lobo ma yam en okwoŋo pire bot kwarowu ni ebimiyowu.

¹⁴ Gibimiyowu gum makato rok ducu; pe binen laco mo nyo dako mo ma bibedo lalur i kinwu nyo i kin limwu makwo.

¹⁵ Rwot bikwanyo kit two ducu woko ki i kinwu; pe biketo i komwu two mo i kin two maraco me Ejipt ma wun wuŋeyo-ni, ento biketogi i kom jo ducu ma kwerowu.

¹⁶ Wun bene wubityeko rok ducu ma Rwot Lubaŋawu biketogi i ciŋwu; kica pe omakwu i komgi. Pe wubiworo lubaŋagi, pien bidoko owic botwu.

¹⁷ “Ka ilwodo lok ki i cwinyi ni, ‘Rok magi ducu gin gidito makato an, abicamogi niŋniŋ?’

¹⁸ pe ibibedo ki lworo mo i komgi, ento ibipo gin ma yam Rwot Lubaŋawu otiyo i kom Parao ki i kom jo Ejipt ducu.

¹⁹ Ibipo kit ma yam otemo kwede cwinygi ki tic madito kun ineno ki waŋi, kacel ki lanyut ki taŋo mapol, ki twero me bade ki ciŋe ma oryeyo, ma Rwot Lubaŋawu yam okwanyi kwede woko ki kunnu; Rwot Lubaŋawu bitiyo kit meno i kom rok ducu ma ibedo ka lworogi-ni.

²⁰ Dok bene Rwot Lubaŋawu bicoro pino jobi i kingi, nio waŋ ma jo ma yam gudoŋ, ki jo ma gikanne woko ki boti doŋ ginekogi woko,

²¹ Pe atiba omaki i komgi, pien Rwot Lubaŋawu tye i kinwu, ma en Lubaŋa madit ma ryaŋo kom dano.

²² Rwot Lubaŋawu bijero rok magi woko ki i nyimwu motmot; pe wutwero tyekogi ducu oyotoyot, miyo gi-tim bimedde mapol, ma okato komwu woko.

²³ Ento Rwot Lubaŋawu bimiyogi i ciŋwu, ci bibaŋogi woko matek twatwal, nio ka wutyekogi woko.

²⁴ Dok en bimiyo lukergi i ciŋwu, ci wubimiyo nyiŋgi rwenyo woko piny i te polo. Pe binen dano mo ma bicuŋ ka lweny i komwu, nio ka wutyekogi woko.

²⁵ Cal lubaŋagi ma gipayo apaya wubiwaŋogi woko ki mac. Pe wubiparo ryal ki jabu ma gimwono i komgi pe wubikwanyo me bedo mewu, wek pe odok owic me makowu; pien meno aye gin me kwer mada ki bot Rwot Lubaŋawu,

²⁶ Pienno pe ibikelo gin me kwer i odi, miyo odi doko gin ma gilamo kome, macalo eno Myero ikwer woko adada, ica pire woko matwal; pien gin ma doŋ gilamo kome me aneka.