Nwoyo Cik 5 - Acoli Baibul

Cik apar

¹ Moses olwoŋo jo Icrael ducu ci owaco botgi ni, “Wun jo Icrael, wuwiny cik ducu ki gin ma giŋolo ma aloko tin ma wuwinyo ki itwu; myero wupwonygi dok wugwokke wek wulubgi.

² Yam Rwot Lubaŋawa oketo gicikke kwedwa i Koreb.

³ Rwot yam pe oketo gicikke man ki kwarowa, ento ocikke kwedwa wan jo ducu ma watye kany tin makwo-ni,

⁴ Rwot yam oloko kwedwu waŋ ki waŋ i te got ki i dye mac,

⁵ ma kun an acuŋ i kin Rwot ki wun i kare meno kun atito botwu lok pa Rwot; pien yam wubedo ka lworo mac, ci pe wumedo ki ito malo wa i wi got. En yam owaco ni,

⁶ “‘An a Rwot Lubaŋani ma yam akwanyi woko ki i lobo Ejipt, i ot me opii.

⁷ “‘Pe ibed ki lubaŋa mukene, kono an kena.

⁸ “‘Pe iti cal apayani mo, nyo cal gin mo ma tye malo i polo, nyo gin ma tye piny i wi lobo, nyo gin ma tye i pii ma i te lobo.

⁹ Pe iryebbe piny i nyimgi, pe iworgi; pien an aye a Rwot Lubaŋani, an Lubaŋa ma lanyeko, Aketo can i kom likwayo pi bal pa kwarogi nio i yalwak me adek ki me aŋwen pa jo ma kwera,

¹⁰ ento anyuto mar ma pe lokke i kom jo alip ki alip ma gimara, ma gimako cikka.

¹¹ “‘Pe ilwoŋ nyiŋ Rwot Lubaŋani me nono; pien Rwot bimiyo kop loyo dano ma lwoŋo nyiŋe me noŋo.

¹² “‘Gwok nino me cabit, ikwer obed maleŋ, kit ma yam Rwot Lubaŋani ociki.

¹³ Ibitic matek pi nino abicel, kun itiyo iye ticci ducu;

¹⁴ ento nino me abirone en aye cabit pa Rwot Lubaŋani. I nino meno pe igud iye tic mo, in kikomi, nyo wodi, nyo nyari, kadi opiini nyo aŋecani, kadi twonni nyo kanani nyo dyaŋŋi mo ducu, kadi labedo ma bedo i gaŋwu, wek opiini ki aŋecani guywe macalo in.

¹⁵ Myero ipo ni, yam in ibedo opii i lobo Ejipt, ci Rwot Lubaani okwanyi woko ki kunnu ki twero me bade ki ciŋe ma oryeyo; mumiyo Rwot Lubaŋani ociki ni igwok nino me cabit.

¹⁶ “‘Wor woru ki meni, macalo Rwot Lubaŋani ociki, wek iri i lobo, dok wek ibed ma nyimi leŋ, i lobo ma Rwot Lubaŋani bimiyo boti.

¹⁷ “‘Pe ineki.

¹⁸ “‘Pe itim abor.

¹⁹ “‘Pe ikwal gin mo,

²⁰ “‘Pe ibed caden me goba i kom lawoti.

²¹ “‘Cwinyi pe opukke i kom dako pa lawoti, pe ipar ot pa lawoti, kadi potone, nyo opiine, nyo aŋecane, nyo twonne, nyo kanane nyo kadi gin mo ma lawoti tye kwede.’

²² “Rwot yam oloko lok man bot jowu mucokke ducu kun loko ki dwan maloŋo ki i dye mac ki pol ki colpiny ma ocido licuc; pe dok omedo iye lok mukene. Yam en ocoyo lok man ducu i kom kidi aryo ma apada, omiyogi bota.

Lworo pa lwak

²³ “Ka yam wuwinyo dwan man ma a ki i dye colpiny, kun got tye ka waŋ ki mac, wubino bota cok, ludito wi kakawu ducu, ki ludoŋo mewu.

²⁴ Ci wuwacci, ‘Nen, Rwot Lubaŋawa doŋ onyutowa deyone ki ditte, dok watyeko winyo dwane bene ka katti ki i dye mac; doŋ tin waneno ka Lubaŋa loko ki dano ci dano pud kwo.

²⁵ Doŋ piŋo myero wato kombeddi? Pien mac man madit bityekowa woko; ka pud wamedde dok ka winyo dwan Rwot Lubaŋawa ma loko kwedwa-ni, ci wabito woko.

²⁶ Aŋa ma i kin jo ducu ma gitye ki kom ma yam koŋ owinyo dwan Lubaŋa makwo ma loko ki i dye mac, kit ma wan wawinyo-ni, ci pud gubedo makwo?

²⁷ In inyik cok, iwiny lok ducu ma Rwot Lubaŋawa biloko, ci itit botwa lok ducu ma Rwot Lubaŋawa biloko boti; wan wabiwinyo ci walubo.’

²⁸ “Rwot yam owinyo lokwu ma wuloko bota-ni; ci Rwot owacca ni, ‘Atyeko winyo lok pa jo man ma guloko bota; lok ma guwaco ducu guloko maber.

²⁹ Kono yam gibedo jwijwi ki cwiny macalo meno, me lwora ki me gwoko cikka ducu, wek nyimgi obed leŋ kacel ki pa litinogi matwal, kono ber!

³⁰ Cit iwac botgi ni, “Doŋ wudok i kemawu.”

³¹ Ento in icuŋ cok ka ŋeta kany, ci abititti lok ducu ma aciko, ki lwak cik ki gin ma aŋolo ducu ma ibipwonyogi kwede, wek gulubgi i lobo ma atye ka miyogi me bedo megi.’

³² Doŋ wun wugwokke wek wulub gin ma Rwot Lubaŋawu ocikowu kwede; pe wuŋak wudok-yo tuŋ acuc nyo tuŋ acam.

³³ Wuwot kun wulubo yo ducu ma yam Rwot Lubaŋawu ocikowu kwede, wek wubed makwo, wek yo nyimwu obed leŋ, wek wuri pi kare malac i lobo ma wubicamo doko mewu.